އިންޑިއާ މިލިޓަރީ އައުޓްގެ ނަމުގައި ރާއްޖޭގައި ހިންގާ ހަރަކަތާކީ ދިވެހި ފަސްގަނޑުގައި ތިބި ދިވެހި ދަރީން ހިންގާ ކެންޕެއިނެއް ކަމުގައި އިދިކޮޅު ޕްރޮގްރެސިވް ކޯލިޝަނުން ބުނެފިއެވެ.

ރާއްޖޭގައި ހިންގަމުންދާ "އިންޑިއާ އައުޓް" ކެމްޕެއިނަކީ މަސްތުވާތަކެތީގެ ނެޓްވޯކްތަކާއި ގުޅިފައިވާ މީހުން އަޑިގައި ތިބެގެން ސޯޝަލް މީޑިއާގެ ބޮޓުން ބޭނުންކޮށްގެން ހިންގާ ކެމްޕެއިނެއް ކަމުގައި ޑިފެންސް މިނިސްޓަރ މާރިޔާ އަހުމަދު ދީދީ ވަނީ މިއަދު ވިދާޅުވެފައެވެ.

މިނިސްޓަރ މާރިިޔާގެ ވާހަކަތާއި ގުޅިގެން އިދިކޮޅު ޕްރޮގްރެސިވް ކޯލިޝަނުންވަނީ މިވާހަތަކަށް ރައްދު ދީފައެވެ. އިދިކޮޅު ކޯލިޝަނުން ބުނެފައިވަނީ އިންޑިއާ މިލިޓަރީ އައުޓް ކެމްޕެއިނަކީ ދިވެހި ޤައުމުދެކެ ލޯބިވާ ދިވެހި ރައްޔިތުން ހިންގާ ކެމްޕެއިނެއްކަމަށެވެ. އިންޑިއާއަށް ވަޑައިގެން ދިވެހި ލިބާސް ތުރުކުރައްވައި އިންޑިއާގެ ޕޯޑިއަމްގައި ވާހަކަ ދެއްކުމަކުން ދިވެހިންގެ މިނިވަންކަން ވިއްކާ ނުލާކަމަށް ނުވާނެކަމަށް އިދިކޮޅުން ވަނީ ބުނެފައެވެ.

އިންޑިއާ މިލިޓަރީ އައުޓަކީ ދިވެހި ފަސްގަނޑުގައި އެއްވެސް ޤައުމެއްގެ ސިފައިން ބޭތިއްބުމަށް ބޭނުން ނުވާ، ދިވެހި ލޭ ހިނގާ ދިވެހި ރައްޔިތުން ހިންގާ ކެމްޕެއިނެއް. ދިވެހި ލިބާސް ލައިގެން އިންޑިއާގެ ޕޯޑިއަމްގައި ވާހަކަ ދެއްކުމަކުން އަދި ދިވެހި ޤައުމުގެ މިނިވަންކަން އިންޑިއާއަށް ވިއްކާނުލާކަމަށް ނުވާނެ.

– އިދިކޮޅު ކޯލިޝަނުން ބުނެފައިވެއެވެ.

މިނިސްޓަރ މާރިޔާ ވިދާޅުވީ އިންޑިއާ އައުޓް ކެމްޕެއިންގެ ހުރިހާވެސް އަމާޒަކީ ރާއްޖެއާއި އިންޑިއާއި ދެމެދު އޮތް ގާތް އެކުވެރި ގުޅުން ހީނަރުކުރުންކަމަށެވެ. އަދި އެއްވެސް އަސްލެއްނެތް ހަގީގަތާއި ޚިލާފް ވާހަކަ ދައްކައިގެން ދޭތެރެ ޖެއްސުމަކީ އެމީހުންގެ މަގްސަދުކަމަށެވެ. މިކަން ކުރަމުންދަނީ ރާއްޖޭގެ ސޯޝަލް މީޑިއާގައި ހަރަކާތްތެރިވާ މަދު ބޮޓުންތަކެއް ކަމުގައި މާރިޔާ ވަނީ ސިފަ ކުރައްވާފައެވެ.

މިމަސައްކަތުގައި އިސްކޮށް ހަރަކާތްތެރިވާ މީހުންނަކީ ސަރުކާރުން ޑްރަގާިއ ދެކޮޅަށް ކުރަމުންދާ މަސައްކަތާއި ނުހަނު ބޮޑަށް ކަންބޮޑުވާ، އެކަން ހުއްޓުވުމަށް ކުރާ މަސައްކަތާއި ދެކޮޅު ހަދާ މީހުންކަމަށްވެސް މާރިޔާ ވިދާޅުވިއެވެ. އަދި މިމީހުންނަކީ ޤާނޫނުތަކާއި ގަވާދުތަކަސް ބޯނުލަބާ، ކޮރަޕްޝަނާއި ފަސާދައިގެ އަމަލުތަކަށް ހިތްވަރު ދޭބައެއްކަމަށްވެސް މާރިޔާ ވިދާޅުވިއެވެ.

"އިންޑިއާ އައުޓް" ކެމްޕެއިނަކީ މަސްތުވާތަކެތީގެ ވިޔަފާރީގައި ހިމެނޭ މީހުން ހިންގާ ކެމްޕެއިނެއް: މާރިޔާ

ރާއްޖެއާއި އިންޑިއާއާއި އޮތް ގުޅުމުގެ ތެރެއިން އަދި ވެފައިވާ އެއްބަސްވުންތަކުގެ ތެރެއިން ގިނަ އަދަދެއްގެ މަސްތުވާތެކެތި މިހާރު ގެންދަނީ އަތުލައި ގަންނަމުން ކަމަށާއި، މިކަމަކީ "އިންޑިއާ އައުޓް" ހަރަކާތް ހިންގާ މީހުންނަށް ބަލަން އެހާ ފަސޭހަ މަންޒަރެއް ނޫންކަމަށް މިނިސްޓަރ މާރިޔާ ވިދާޅުވިއެވެ.

މާރިޔާ މިފަދައިން ވިދާޅުވިއިރު، ރާއްޖޭގައި ތިބި އިންޑިއާ ސިފައިން ބޭލުމަށާއި، އިންޑިއާއާއިއެކު ހަދާފައިވާ އެއްބަސްވުނަތައް ހާމަކުރުމަށް ގޮވާލައި އެތައް ސަތޭކަ ބަޔަކު ދަނީ މާލެއާއި އަތޮޅު ތެރޭގައިވެސް ބޮޑެތި އެއްވުންތައް ބާއްވަމުންނެވެ. މިއެއްވުނަތަކުގެ މައުލޫމާތު ބައިނަލް އަގުވާމީ މީޑިއާތަކުގެ ސަމާލުކަމަށް އައިސްފައިވާއިރު، ސަރުކާރުން ބުނަމުންދަނީ އިންޑިއާއާއި ރާއްޖެއާއި ދެމެދު ގޮތްނޭގޭ އަދި މިނިވަންކަމަށް ބުރޫއަރާފަދަ އެއްބަސްވުމެއް ހެދިފައި ނުވާނެކަމަށެވެ.