ރާއްޖެއާއި، އިންޑިއާއާއިއެކު ވެފައިވާ އެއްބަސްވުތައް ހާމަކުރުމަކީ ދިވެހި ސަރުކާރަށް ލާޒިމް ކަމެއްކަމަށާއި، އެކަން ނުކުރަން މަޖިލީހުގައި ކޮށްގެންތިބި ހުވައާއި ޚިލާފަށް މަސައްކަތް ކުރާ މެޖޯރިޓީ އޮތް ކޮމިޓީއަކުން ނިންމާ ނިންމުން ޞައްޚައެއް ނުވާނެކަމަށް ކުރީގެ އުއްތަމަ ފަނޑިޔާރު ޑރ.އަހުމަދު އަބްދުﷲ ދީދީ ވިދާޅުވެއްޖެއެވެ.

ރާއްޖެއާއި އިންޑިއާގެ ދެމެދުގައި ހަދާފައިވާ އެއްބަސްވުންތަކުގެ ކޮޕީ ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީއަށް ހޯދުމަށް އެ ކޮމިޓީގެ މެންބަރު އަދި މަޖިލީހުގެ ވިލިމާލެ ދާއިރާގެ މެންބަރު އަޙްމަދު އުޝާމު ހުށަހެޅުއްވި ގޮތަށް އެކަން ކުރަން އެ ކޮމިޓީން ފާސްނުވިއެވެ. މިނިންމުމާއިމެދު ގިނަ ބައެއްގެ ފާޑުކިޔުން 241 ކޮމެޓީއަށް ވަނީ އަމާޒުވެފައެވެ.

ޚާއްސަކޮށް މިދަނޑިވަޅަކީ އިންޑިއާއާއި، ރާއްޖެއާއި ދެމެދު އަސްކަރީ ގޮތުން ވެފައިވާ އެއްބަސްވުންތަކާއިމެދު ގިނަ ބައެއްގެ ހިތުގައި ގިނަ ދުވާލުތަކެއް އޮތް ދަނޑިވަޅަކަށްވާއިރު މިދަނޑިވަޅުގައި އެއްބަސްވުންތައް ހާމަނުކޮށް އިތުރަށް ފޮރުވުމަކީ މިކަމުގައި ގޮތްނޭގޭ ކަންތައްތަކެއް އެކުލެވޭ ކަމެއްކަމަށް ގިނަ ބަޔަކު ދަނީ ބުނަމުންނެވެ.

އެއްބަސްވުންތައް ހާމަކުރުމަށް ސަރުކާރުން ދެކޮޅު ހަދަމުންދާ މައްސަލާގައި ކުރީގެ އުއްތަމަ ފަނޑިޔާރު ޑރ.އަހުމަދު އަބްދުﷲ ދީދީ ވިދާޅުވީ މިފަދަ ކަންކަމަކީ ކޮމެޓީއަކުން ފާސްކޮށް ހުށަހަޅަންޖެހޭ އެއްބަސްވުންތަކެއް ނޫންކަމަށެވެ. މިފަދަ އެއްބަސްވުނަތަކަކީ ސަރުކާރަށް ހާމަކުރުން ލާޒިމް އެއްބަސްވުންތަކެއްކަމުގައެވެ. އެއްބަސްވުންތައް ހާމަކުރަން ދެކޮޅު ހައްދަވާ މެމްބަރަކުންނަކީ ލިބިފައިވާ މެޖޯރިޓީގެ ބޭނުން ކުރައްވައިގެން ތިއްބެވި ހުވަޔާއި ޚިލާފަށް ކުރައްވަމުންދާ މަސައްކަތްތަކެއްގެ ގޮތުގައި އަހުމަދު އަބްދުﷲ ދީދީ ވަނީ ސިފަ ކުރައްވާފައެވެ.

އެއީ ކޮމެޓީއަކުން ފާސްކޮށްގެން ހުށަހަޅަންޖެހޭ އެއްބަސްވުންތަކެއް ނޫން. އެ އެއްބަސްވުން ހުށަހެޅުމަކީ ސަރުކާރުގެ މައްޗަށް ލާޒިމުކަމެއް. ކޮންގެންތިބި ހުވަޔާޚިލާފަށް މަސައްކަތްކުރާ މެޖޯރިޓީ އޮތް ކޮމިޓީއަކުން ފާސްކުރާ، ތިބާވަތުގެ ނިންމުންތަކަކީ ޞައްޙަ ނިންމުންތަކެއް ނޫން.

– ޑރ.އަހުމަދު އަބްދުﷲ ދީދީ ވިދާޅުވިއެވެ.

ސަލާމަތީ ޚިދުމަތްތަކާ ބެހޭ ކޮމިޓީގެ އަޣުލަބިއްޔަތު އޮންނަނީ ވެރިކަން ކުރާ އެމްޑީޕީއަށެވެ. އެ ކޮމިޓީން އިއްޔެވަނީ އެ އެއްބަސްވުންތަކުގައި ކަންބޮޑުވާންޖެހޭ އެއްވެސް ކަމެއް ނެތް ކަމަށް ނިންމާފައެވެ. މި ގޮތަށް ނިންމާފައިވަނީ އެ އެއްބަސްވުންތަކާ ގުޅޭ މައުލޫމާތު ހޯދުމަށް ޑިފެންސް މިނިސްޓްރީއާއި އެމްއެންޑީއެފް ކޮމިޓީއަށް ހާޒިރުކުރުމަށް ފަހުގައެވެ.

އިންޑިއާއެކު ހަދާފައިވާ އެއްބަސްވުން ކޮމިޓީއަކަށް ނުލިބޭ، ރަނގަޅަށް ދިރާސާއެއް ނުކުރޭ: އުޝާމް، ޢަލީ

އެއްބަސްވުމުގެ ހާޑު ކޮޕީއެއް ކޮމިޓީއަށް ހޯދުމަށް އުޝާމް ހުށައެޅުއްވި ހުށައެޅުއްވުމަށް ތަޢީދުކުރެއްވީ ކެންދޫ ދާއިރާގެ މެންބަރު ޢަލީ ޙުސައިންއެވެ. ޢަލީ ޙުސައިންވެސް ވަނީ އެއްބަސްވުން ޕްރޮޖެކްޓަރަށް އަޅުވައިގެން ސްކްރޯލް ކުރުމަކުން އެއީ ދިރާސާކުރެވުނީ ނޫންކަން ފާހަގަކުރައްވާ އެކަމުގެ ކަންބޮޑުވުން ފާޅުކުރައްވާފައެވެ. ޢަލީ ޙުސައިން ވަނީ ސަލާމަތީ ޚިދުމަތްތަކާއި ބެހޭ ކޮމިޓީއަކީ ޤާނޫނު އަސާސީން ބާރުލިބިގެން ހިންގާ ކޮމިޓީއަށްކަށް ވީހިނދު އެފަދަ އެއްބަސްވުންތައް ކޮމިޓީއާ ހިއްސާކުރެވެން ޖެހޭނެކަމަށް ވިދާޅުވެފައެވެ. ޢަލީ ޙުސައިން ވަނީ ޕްރެޒެންޓޭޝަންގައި ހުރި ބައެއް އިބާރާތްތަކާއި އަސްލު އެއްބަސްވުމުގައިހުރި ބައެއް އިބާރާތްތަކާއި ތަފާތުތަކެއް ހުރިކަންވެސް ފާހަގަކުރައްވާފައެވެ.

އިންޑިއާއެކު ހަދާފައިވާ އެއްބަސްވުމުގެ އަސްލު ކޮޕީއެއް ކޮމިޓީއަށް ހޯދުމަށް އުޝާމް ހުށައެޅުއްވި ނަމަވެސް، އެމްޑީޕީގެ އަޣްލަބިއްޔަތު އޮންނަ އެކޮމިޓީގައި ހިމެނިވަޑައިގަންނަވާ އެމްޑީޕީގެ މެންބަރުން އެކަމާއި ދެކޮޅު ހެއްދެވުމުން އެ ހުށައެޅުން ފާހެއް ނުވިއެވެ.

މެންބަރު އުޝާމްއާއި އަލީ ހުސައިން ހުށައެޅުއްވި ހުށައެޅުންވެސް ކޮމިޓީގެ މުޤައްރިރު ހިދަތޫ އުތުރު ދާއިރާގެ މެންބަރު މުޙައްމަދު އަސްލަމަށް މާބޮޑު ކަމަކަށް ވެވަޑައިނުގެންނެވިއެވެ. އަސްލަމް ވިދާޅިވީ، އުޝާމް އެއްބަސްވުންތައް ފެނިވަޑައިނުގަންނަވާކަމަށް ވިދާޅުވަނީ ކޮމިޓީއާއި ގުޅިވަޑައިގަތީ ފަހުންކަމުން ބައެއް ބައްދަލުވުންތަކުގައި ބައިވެރިވެވަޑައިގަތުމުގެ ފުރުޞަތު ނުލިބުމުންކަމަށެވެ.

އަސްލަމް ވަނީ ސްކްރީނަށް އެއްބަސްވުން އަޅުވައިގެން މެންބަރުން ބޭނުންވާ ސުވާލު ކުރުމުގެ ފުރުޞަތު ދެއްވާފައިވާނެކަމަށެވެ.

އިންޑިއާއެކު ހަދާފައިވާ އެއްބަސްވުމުގައި ޤައުމީ ސަލާމަތަށް ނުރައްކަލެއް ނެތްކަމަށް ކޮމިޓީން ނިންމެވި ނިންމުމުގައި ވަނީ، ތިން އެއްބަސްވުމުގައި ވެސް ގައުމީ ސަލާމަތަށް ނުރައްކާވާ ފަދަ ކަމެއް ހިމެނިފައިވާކަން ފާހަގަކުރެވިފައިވާކަމަށެވެ. އެއްބަސްވުންތަކަކީ ރާއްޖޭގެ މަސްލަހަތުތައް ހިމާޔަތްވާ ގޮތަށް ސޮއިކޮށްފައިވާ އެއްބަސްވުންތަކެއްކަމަށާއި، އެ އެއްބަސްވުންތަކަކީ ރާއްޖެއަށް ބޭނުންވެފައިވާ މުހިންމު ކަންކަމާ ގުޅޭ، ރަނގަޅު އެއްބަސްވުންތަކެއްކަމަށް ކޮމިޓީގެ ނިންމެވުމުގައިވެއެވެ.