ރައްޔިތުންގެ މަޖިލީހުގެ ރައީސް ދިރިއުޅުއްވަން ދައުލަތުން ހަމަޖައްސަވާ ވަގުތީ ގެކޮޅު "މުރައިދޫގެ" ސަރަހައްދުގައި ރަތް ރޮނގުދަމައި ރެޑް ޒޯނެއްކަމަށް އެ ސަރަަހއްދު ކަނޑައެޅުމާއެކު ޕީއެންސީގެ ނާއިބު ރައީސް އަދި މާލެސިޓީ ކައުންސިލްގެ މެންބަރު އިބްރާހީމް ޝުޖާޢު ފާޑުވިދާޅުވެއްޖެއެވެ.

ޝުޖާޢު ވިދާޅުވީ، އަންނަ އަހަރުގެ ބަޖެޓުން ނަޝީދުގެ ގެކޮޅަށް 50 މިލިއަން ރުފިޔާ ކަނޑައަޅަފައިވާކަމަށެވެ. އޭނާ ވަނ އާސަންދަ ފައިސާ ކޮޅާއި، އެކަނިވެރި މައިން މަތިން ހަނދާންނެތިއްޖެކަމަށް ވިދާޅުވެ ފާޑުވިދާޅުވެފައެވެ. ހިތްތިރި ރައީސުން ހިތްމަތި ވެއްޖެކަމަށް ވިދާޅުވެ ޝުޖާ ވަނީ ރައްޔިތުން ވިސްނުމަށް ގޮވާލައްވަފއެވެ.

އަންނަ އަހަރުގެ ބަޖެޓުން ގަނޑުވަރަށް 50މިލިއަން. އާސަންދަ ފައިސާ ކޮޅާއި، އެކަނިވެރި މައިން މަތިން ހަނދާންނެތިއްޖެ. ހިތްތިރި ރައީސުން ހިތްމަތިވެއްޖެ. ރައްޔިތުން ވިސްނާ.

– އިބްރާހީމް ޝުޖާޢު

ޝުޖާޢު މިހެން ވިދާޅުވެފައިވާއިރު، މުރައިދޫގެ ސަރަހައްދު ރެޑް ޒޯންކަމަށް ކަނޑައަޅާފައިވާއިރު މިއީ ފަހުގެ ތާރީޚެއްގައި ރެޑް ޒޯން ކަނޑައެޅި ފުރަތަމަ ފަހަރެވެ. އެހެނީ ރައީސުލްޖުމްހޫރިއްޔާ ދިރިއުޅުއްވާ ރަސްމީ ގެކޮޅާއި، ރައީސުލްޖުމްހޫރިއްޔާގެ ނާއިބު ދިރިއުޅުއްވާ ގެކޮޅާއި އުއްތަމަ ފަނޑިޔާރު ދިރިއުޅުއްވާ ގެކޮޅު ސަރަހައްދުގައިވެސް ރަތް ރޮނގު ދަމާފައި ނުހުރެއެވެ.

ނަޝީދު ދިރިއުޅުއްވާ ގެކޮޅު ކައިރީގައި ރަތް ރޮނގު ދަމާފައިހުރުމުން އެސަރަހައްދުގައި މަޑުކޮށްގެން ހުރުމަކީވެސް މަނާކަމެކެވެ.