ސިފައިންގެ އޮފިސަރަކު ރަހީނުކޮށް ފައިސާ ފޭރިގަތް މައްސަލަ ސީރިއަސް މައްސަލައެއްގެ ގޮތުގައި ފުލުހުން ބަލަން ފަށައިފިއެވެ.

ރޭގެ ދަންވަރުގެ ރަހީނުކޮށް ބޮޑެތި އަނިޔާތަކެއްދީފައިވަނީ އެމް.އެން.ޑީ.އެފްގެ ކޯސްޓްގާޑުގައި މަސައްކަތްކުރާ ސާޖަންޓް ޙަސަން ފަހީމްކަމަށެވެ. އޭނާ ރަހީނުކޮށް އަނިޔާތަކެއް ދީފައިވަނީ ފަންނު އޭސް ހާޑްވެއާ ކައިރީގައި އޮންނަ ހަނި ގޯޅިން ހިނގާފައި ދަނިކޮށް ރޭ ދަންވަރުގެ ވަގުތެއްގައެވެ. 37 އަހަރުގެ ސާޖަންޓް ޙަސަން ފަހީމް ރެއިން ފެށިގެން ހެނދުނާ ހަމައަށް އޭނާ ތަނަކަށް ގެންގޮސް ފައިސާ ހޯދަން ބަޔަކު ކުރި މަސައްކަތް ކާމިޔާބު ނުވުމުން އެމީހުން ވަނީ މިއަދު ހެނދުނުގެ ވަގުތެއްގައި އައިޖީއެމްއެޗް ކައިރިއަށް ގެންގޮސް މަގުމައްޗަށް އޭނާ ވައްޓާލާފައިކަމަށް ޢާއިލާއިން ބުނެފައިވެއެވެ.

ސްޓާފް ސާޖަންޓް ޙަސަން ފަހީމަށް ލިބިފައިވާ ޒަޚަމްތަކަށް އައިޖީއެމްއެޗްގައި ފަރުވާދިނުމަށް ފަހު، އިތުރު ޓެސްޓުތަކެއް ހަަދަައި މިހާރުވަނީ ގެއަށް ދޫކޮށްލާފައެވެ. މިމައްސަލަ ސީރިއަސް މައްސަލައެއްގެ ގޮތުގައި ފުލުހުންގެ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓުން މިހާރުވަނީ ބަލަން ފަށާފައެވެ. ފުލުހުން ވިދާޅުވީ، އަނިޔާތަކެއް ލިބިފައިވާ ދިވެހި ފިރިހެނަކު އައިޖީއެމްއެޗަށް ގެންގޮސް ފަރުވާދެމުންދާކަމުގެ މަޢުލޫމާތު މިއަދު ހެނދުނު ފުލުހުންގެ ސަމާލުކަމަށް އައިސްފައިވާކަމަށެވެ. މިއީ މީހަކު ރަހީނުކޮށް އަނިޔާކޮށް ފައިސާއާއި ފޯނު ފޭރިގެންފައިވާކަމަށް ތުހުމަތުކުރެވޭ މައްސަލައެއްކަމާއި މިކަމާގުޅިގެން އިތުރަން ބަލަންޖެހޭ ކަންކަން ބަލަމުން ގެންދާކަމަށް ފުލުހުން ވިދާޅުވިއެވެ. ނަމަވެސް އަދި މިކަމާގުޅިގެން މީހަކު ހައްޔަރުކޮށްފައި ނުވެއެވެ.

ރޭ ދަންވަރު، އެމްއެންޑީއެފްގައި މަސައްކަތްކުރާ ސްޓާފް ސާޖަންޓް ޙަސަން ފަހީމް ރަހީނުކޮށް، ބޮޑެތި ޒަޚަމްތަކެއް ދީފައިވާތީ، އެމްއެންޑީއެފުން އެކަން ހަރުކަށި އިބާރާތުން ކުށްވެރިކުރަން. pic.twitter.com/uMb4WAvPhu

— Maldives National Defence Force (@MNDF_Official) November 18, 2021

ރޭގެ ދަންވަރުގެ ވަގުތެއްގައި ސްޓާފް ސާޖަންޓް ޙަސަން ފަހީމް، ރަހީނުކޮށް އަނިޔާތަކެއް ދީފައިވާތީ، ދިވެހިރާއްޖޭގެ ޤައުމީ ދިފާއީ ބާރުންވަނީ އެކަން ހަރުކަށި އިބާރާތުން ކުށްވެރިކޮށް ނެރުނު ނޫސްބަޔާނުގައި ވަނީ ޤައުމީ ދިފަޢި ބާރުންވަނީ މި އަނިޔާވެރި ހަމަލާ ދިނުމުގައި ބައިވެރިވި ފަރާތްތައް ހޯދައި، އިންސާފުގެ ކުރިމައްޗަށް ގެނައުމަށް ކުރަންޖެހޭ މަސައްކަތްތައް ފުލުހުންގެ ޚިދުމަތުންކުރަމުންދާކަމަށެވެ. ޤައުމީ ދިފާޢީ ބާރުން ވިދާޅުވީ، ރައްޔިތުންގެ ހިތްތަކުގައި ބިރުވެރިކަން އުފައްދައި، ނުރައްކަލުގެ ތެރެއަށް ގެންދަން މަސައްކަތްކުރާ ފަރާތްތަކުން ކުރަމުންދާ ޢަމަލުތަކަކީ އެއްވެސް ފަރާތަކުން ޖާގަ ދެވިގެންވާނެ ޢަމަލުތަކެއް ނޫންކަމަށާ، ސިފައިންނަށް ދޭ މިފަދަ ފިނޑި ހަމަލާތަކުގެ ސަބަބުން ޤައުމީ ޚިދުމަތުގައި ސިފައިން ކުރަމުންދާ މަސައްކަތަށް އެއްވެސް ލޮޅުމެއް އަރުވައި ނުލެވޭނެކަމަށްވެސް ބަޔާނުގައިވެއެވެ.

ފައިސާ ހޯދަން ސިފައިންގެ މީހަކު ރަހީނުކޮށް އަނިޔާކޮށްފި

ޙަސަން ފަހީމަށް ޙަމަލާ ދިނުމާ ގުޅިގެން ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ އިބްރާހީމް މުޙައްމަދު ޞާލިޙް ވަނީ މިނިސްޓަރ އޮފް ޑިފެންސް އަލްއުސްތާޛާ މާރިއާ އަޙްމަދު ދީދީއަށް ގުޅުއްވައި ސްޓާފް ސާޖަންޓް ޙަސަން ފަހީމްގެ ހާލު ބައްލަވާފައިވެއެވެ.

ފަހީމަށް ދީފައިވާ އަނިޔާތަކުގެ ތެރޭގައި ސިނގިރެޓުން ގައިގައި ޖެއްސުމާއި، ތޫނު އެއްޗަކުން އަނިޔާ ދީފައިވާކަމަށްވެސް އާއިލާއިން ބައެއް މީޑިއާތަކަށް މަޢުލޫމާތު ދީފައިވެއެވެ. ޑިފެންސް މިނިސްޓަރވަނީ ސްޓާފް ސާޖަންޓް ޙަސަން ފަހީމްގެ އަނބިކަނބަލުންނަށް ފޯނުންގުޅުއްވައި، މިކަމުގައި ވެދެއްވެންހުރި ހުރިހާ އެހީތެރިން ސަރުކާރުން ވެދެއްވާނެކަމުގެ ޔަޤީންކަން ޢާއިލާއަށްދެއްވާފައެވެ.