އެސްޓަން ވިލާގެ ކޯޗަކަށް ލިވަޕޫލްގެ ލެޖެންޑް ސްޓީވަން ޖެރާޑް ހަމަޖައްސައިފިއެވެ.
އެސްޓަން ވިލާއިން ޖެރާޑް އެ ޓީމުގެ ކޯޗަކަށް ހަމަޖައްސާފައިވަނީ، ކުރިން އެޓީމުގެ ކޯޗަކަށް ހުރި ޑީން ސްމިތް ވަކިކުރުމަށްފަހުއެވެ. އޭނާ މަގާމުން ވަކިކުރީ އިނގިރޭސި ޕްރިމިއާ ލީގުގައި އެސްޓަން ވިލާގެ ނަތީޖާތައް ދައްވުމާއި ގުޅިގެންނެވެ. އެގޮތުން އެންމެ ފަހުން ލީގުގައި ކުޅުނު 5 މެޗުން ވެސް އެޓީމު ވަނީ ބަލިވެފައެވެ.
ކުރިން ސްކޮޓްލޭންޑުގެ ރޭންޖާސްގެ ކޯޗުކަމުގައި ހުރި އިނގިރޭސި ކުރީގެ ތަރި ސްޓީވަން ޖެރާޑް އެސްޓަން ވިލާގެ ކޯޗު ކަމާއި ހަވާލުވީ 3 އަހަރާއި ބައިގެ އެއްބަސްވުމެއްގެ ދަށުުންނެވެ.
ޖެރާޑް ފުޓުބޯޅަ ކުޅުމުން ރިޓަޔާވެފައިވަނީ 2016 ވަނަ އަަހަރުގައެވެ. އޭނާ ވަނީ ފުޓުބޯޅައިގައި ކާމިޔާބު 19 އަހަރު ހޭދަކޮށްފައެވެ.
އެންމެ ފަހުން ޖެރާޑް ކޯޗުކޮށްދިން ރޭންޖާސްގައި އޭނާ ވަނީ މިދިޔަ ސީޒަނުގައި ސްކޮޓްލޭންޑް ލީގު ޗެމްޕިއަންކަން ވެސް ހޯދާފައެވެ. ރޭންޖާސް އިން ލީގު އުފުލާލީ އެއްވެސް މެޗަކުން ބަލިނުވެއެވެ.
އެސްޓަން ވިލާގެ ކޯޗު ކަމާއި ޖެރާޑް ހަވާލުވިއިރު، އެ ޓީމު މިހާރު އޮތީ 11 މެޗުން ލިބުނު 10 ޕޮއިންޓާއެކު ލީގު ތާވަލްގެ 16 ވަނައިގައެވެ. އެންމެ އަވަހަށް ދެން ލީގުގައި އެސްޓަން ވިލާގެ އަމިއްލަ ދަނޑުގައި މިމަހުގެ 20 ވަނަ ދުވަހު އެޓީމު ނުކުންނާނީ ބްރައިޓަން އާއި ދެކޮޅަށެވެ.
