ދައުލަތުގެ މާލިއްޔާއިން ވަކި ބޭފުޅަކަށް އެކަނި ބޮޑެތި ޚަރަދު ކުރުމަކީ ވެވޭ ވަރަށް ބޮޑު ބޭއިންސާފެއް ކަމުގައި ދީނީ އިލްމުވެރިޔާ ޝައިޚު އަލީ ޒައިދު ވިދާޅުވެއްޖެއެވެ.

ޝައިޚު ޒައިދު މިފަދައިން ވިދާޅުވީ ރައީސް ނަޝީދަށް ފާއިތުވީ 6 މަސް ދުވަހުގެ ތެރޭގައި 2.3 މިލިޔަން ރުފިޔާ ޚަރަދު ކޮށްފައިވާތީ އެކަމަށް ފާޑު ވިދާޅުވަމުންނެވެ. ފިނޭންސް މިނިސްޓްރީން އާންމުކުރި ހިސާބުތަކަށް ބަލާއިރު ހަމަލާގައި ލިބުނު ޒަހަމްތަކަށް ރާއްޖެ އިން ބޭރުން ފަރުވާ ހޯއްދެވުމަށް 1.6 މިލިއަން ރުފިޔާ ހޭދަވެފައިވެއެވެ. މި ޚަރަދުތަކުގެ ތެރެއިން އިނގިރޭސިވިލާތުގެ ފަރުވާ އަށް 1.5 މިލިއަން ރުފިޔާ ޚަރަދު ވެފައިވާއިރު، ޖަރުމަން ވިލާތުން ފަރުވާ އަށް 164،601 ރުފިޔާ ވަނީޚަރަދު ވެފައެވެ. މީގެ އިތުރުން ރައީސް ނަޝީދު ޖެންގައި 21 ދުވަހު (ތިން ހަފުތާ) ގައި ނަޝީދު ހުންނެވުމަށް މިހާތަނަށް 698،168ރ. ވަނީ ހޭދަވެފައިވެއެވެ.

ޝައިޚު ޒައިދު ވިދާޅުވީ މިއީ ދައުލަތުގެ ފައިސާ އިސްރާފް ކުރާކަމުގެ ބޮޑު ހެއްކެއް ކަމަށެވެ. ދައުލަތައި ނުބައްދަލު ޚަރަދު ވަކި ބޭފުޅަކަށް ރައްޔިތުންގެ ޓެކްސް ފައިސާއިން ޚަރަދު ކުރުމަކީ ވަރަށް ބޮޑު ބޭއިންސާފެއްކަމަށް ޝައިޚު ވިދާޅުވިއެވެ.

މި ހުންނަނީ ދައުލަތުގެ ލާރި ބޭކާރު ގޮތުގައި އިސްރާފު ކުރެވޭ ކަމުގެ 1 ހެކި! ވަކި ބޭފުޅަކަށްޓަކައި، މުޅި ދައުލަތަށް ނުބައްދަލު ޚަރަދު ރައްޔިތުންގެ ޓެކްސް ފައިސާއިން އުފުލާ ގޮތަށް ހަމަޖެއްސުމަކީ ވަރަށް ބޮޑު ނުބައެއް ކަމުގައި ދެކެން! ހަމަހަމަ ކަމާއި އިންސާފް މެދު މިންގަނޑާއިވެސް ޚިލާފް އަމަލެއް.

– އަލީ ޒައިދު ވިދާޅުވިއެވެ.

ޒައިދު ވިދާޅުވީ ދައުލަތުގެ މާލިއްޔާއިން ވަކި ބޭފުޅަކަށް ބޮޑެތި ޚަރަދު ކުރުމަކީ އިންސާފެއް ނޫންކަމަށެވެ. މިއީ ޖާހިލިއްޔަ ޒަމާނުގައި ކަންކަން ހިނގާ އުސޫލުން ކުރާ ކަމެއްކަމަށާއި، ވަކި މީހަކަށް ވީތީ މޮޅުގޮތް، އަދި ވަކި މީހަކަށްވީތީ ދެރަގޮތް ހަދައިގެން ނުވާނެކަމަށެވެ. ކުރީގެ ރައީސުންނަށް ދޭންޖެހޭ ރައްކާތެރިކަން ދިން ނަމަވެސް އެބޭފުޅުންނަށް ދޭ އެލަވަންސްތަކާއި، އިނާޔަތްތަކަކީ އެހެން ރައްޔިތުންނަށް އެކަމުން ގެއްލުން ނުވާނޭ ގޮތަކަށް ދެވޭ އެއްޗަކަށް ވާންޖެހޭ ކަމަށާއި، ތަކުރާރުވާ ގޮތަށް ދެވޭ އެލަވަންސްތައް ކަނޑާލަން ޖެހޭކަމަށްވެސް ޝައިޚު ޒައިދު ވިދާޅުވިއެވެ.

އަދިވެސް ޖާހިލިއްޔަ ޒަމާނުގެ ބައެއް ނުބައި ޢާދަތައް ނުފިލައި އެބަހުރި! ދިވެހި މުޖުތަމަޢުން މީގެ ބައެއްކަންކަން ފެންނަކަމީ ހިތާމައެއް! ނުޙައްޤުން މޮޅުމީހާއަށް މޮޅުގޮތް ދެރަމީހާއަށް ދެރަގޮތް ހެދުމީ ޖާހިލިއްޔަ ނުބައި ޢާދައެއް! އަފްރާދުންގެ ހަމަހަމަކަމަށްޓަކައި މިޢާދަ ފިލުވާލަންޖެހޭ! ކުރީގެ ރައީސަކު މަގާމެއްގައި ހުންނެވުމުގެ ސަބަބުން މުސާރަ އާއި ޢިނާޔަތް ލިބިވަޑައިގަންނަވާނަމަ، ކޮންމެވެސް އެކައްޗެއް އިޚްތިޔާރު ކުރައްވަންޖެހޭ ގޮތަށް އިޞްލާޙު ގެންނަންޖެހޭ. އަދި އަމިއްލަ ގެދޮރު ހުންނަ ބޭފުޅުންނަށް ލިވިންގް އެލަވަންސް އުނިކުރަން ޖެހޭ.

– ޒައިދު ވިދާޅުވިއެވެ.

މިދިޔަ މަހުގެ 11 ވަނަ ދުވަހު ނަޝީދު ރާއްޖެ އެނބުރި ވަޑައިގެންނެވިއިރު، އޭގެ ފަހުން އެމަނިކުފާނު ޖެންގައި ހުންނަވަނީ އެމަނިކުފާނު ހުންނެވުމަށް ދައުލަތުން ކަނޑައެޅި ވަގުތީ ގެކޮޅުގެ މަސައްކަތް ނުނިމޭތީއެވެ.

ނަޝީދުގެ ވަގުތީ ގެކޮޅުގެ ގޮތުގައި ހަމަޖެހިފައިވާ މުރައިދޫގޭގެ މަރާމާތުގެ މަސައްކަތްތައް ގެންދަނީ ސިފައިންގެ ކުންފުނި، ސިކްފޯއާ ހަވާލުކޮށްގެންނެވެ. ރައީސް ނަޝީދުގެ އިތުރުން އުއްތަމަ ފަނޑިޔާރަށްވެސް ރަސްމީ ގެކޮޅު ބިނާ ކުރަން ދެ ބިމެއް ސަރުކާރުން ހަމަޖެއްސިއެވެ. އެކަމަކު އެ ދެ ބިމުގެ މަސައްކަތް ލަސްވާނެތީވެ، ސަރުކާރުން ވަނީ މަޖިލީހުގެ ރައީސަށް މުރައިދޫގެ އަދި އުއްތަމަ ފަނޑިޔާރަށް ރެހެންދި ފްލެޓެއް ހަމަޖައްސައިފައެވެ.