މިނިވަން ކަމުގެ ފިކުރުން އެއްވެސް ބަޔަކާއިއެކު ހަދާނެ ޑީލެއް ނޯންނާނެކަމަށް އިދިކޮޅު ޕީއެންސީގެ ނައިބް ރައީސް އިބްރާހިމް ޝުޖާ ވިދާޅުވެއްޖެއެވެ.
މޫސުމް ތަން ނުދިނުމުގެ ސަބަބުން ފަސް ކުރެވުނު "މިނިވަންކަމުގެ ހިނގާލުން" ފަސްކޮށްފައިވަނީ ސަރުކާރާއި ޑިލެއް ހަދައިގެންކަމަށްވުނެ އެމްޑީޕީގެ ބައެއް އެކްޓިވިސްޓުން ސޯޝަލް މީޑިއާގައި ދައްކަމުންދިޔަ ވާހަތަކާއި ގުޅިގެން މިއަދު ބޭއްވި ޕްރެސްގައި ޝުޖާ ވިދާޅުވީ މިނިވަންކަމުގެ ފިކުރުން، ޑީލެއް ހަދަންޖެހޭ ކަމެއް ނޯންނާނެކަމަށެވެ. މިދިޔަ ހުކުރުގައިވެސް ހިނގާލުން ނުބޭއްވުނީ މޫސުން ތަން ނުދިނުމުން ކަމަށާއި، ނަމަވެސް މިހަފްތާގައި އަނެއްކާވެސް ހިނގާލުން އޮންނާނެކަމަށެވެ.
ރާއްޖޭގެ މިނިވަންކަމާއި ސިޔާދަތާއި އިސްތިޤުލާލަށްޓަކައި ޕީޕީއެމް، ޕީއެންސީން ފަސްޖެހޭނެ ކަމެއް ނޯންނާނެކަމަށާއި، މިނިވަންކަން ދޫކޮށްލައި ބަޔަކާއިއެކު ހަދާނެ ޑީލެއް ނޯންނާނެކަމަށް އޭނާ ވިދާޅުވިއެވެ.
އަޅުގަނޑު ވަރަށް ސާފުކޮށް ދަންނަވަން، އަޅުގަނޑުމެން މިނިވަންކަމުގެ ފިކުރުން، ޑީލު ހަދާނެ ބަޔަކު ނުތިބޭނެ. މިނިވަންކަމުގެ ދިފާއުގައި މިކުރާ މަސައްކަތް ނުވެސް ހުއްޓުވޭނެ. އަދި ޑީލެއް ހަދައިގެން މިކަން ހުއްޓުވުން މަސައްކަތް ކުރިޔަސް އެކަން ނުވެސް ކުރެވޭނެ. އެކަމަށް އަޅުގަނޑުމެން ޖާގައެއްވެސް ނުދޭނަން.
– ޝުޖާ ވިދާޅުވިއެވެ.
އޭނާ ވިދާޅުވީ މިސަރުކާރުން ރައްޔިތުންނާއި ޤައުމަށް ނުރައްކާވާގޮތަށް ކުރަމުންދާ ކަންކަމަކީ އިދިކޮޅުން އެކަންކަމުގައި ނިކުމެ ޖަވާބުދާރީ ކުރުވާނެ ކަންތައްތަކެއް ކަމަށެވެ. ނަމަވެސް މުދަލަށާއި، ތަކެއްޗަށް ގެއްލުންދީގެން އެކަން ނުކުރާނެކަމަށާއި، ޕީޕީއެމް، ޕީއެންސީން އެކަންކުރާނީ ސުލްހަވެރިކަމާއިއެކު ޖަވާބުދާރީ ކުރެވޭނެ ގޮތަކަށް ކަމުގައެވެ. ހުކުރު ދުވަހުގެ ހިނގާލުމަށްފަހު އަތޮޅުތެރޭގައި ހަރަކާތްތައް ކުރިއަށް ގެންދިއުމަށް ފޯއްމުލަކަށް ޕީޕީއެމްގެ ޓީމު ދިއުމަށް ހަމަޖެހިފައިވާކަމަށް ޝުޖާ ވަނީ ވިދާޅުވެފައެވެ.
