އަންނަ ހުކުރު ދުވަހު މާލޭގައި ސުލްހަވެރި ހިނގާލުމެއް ބޭއްވުމަށް އިދިކޮޅު ޕްރޮގްރެސިވް ކޯލިޝަނުން ނިންމައިފިއެވެ.
އެކޯލިޝަނުން މިހަފްތާގެ ހުކުރު ދުވަހުވެސް ހިނގާލުމެއް ބޭއްވުމަށް ވަނީ ނިންމާފައެވެ. ނަމަވެސް މޫސުން ތަން ނުދޭތީ ހިނގާލުން ވަނީ ފަސްކޮށްފައެވެ. މިއަދު ޕީޕީއެމް އޮފީހުގައި ބޭއްވި ޕްރެސް ކޮންފަރެންސްގައި ހިނގާލުން އިންތިޒާމު ކުރާ ކޮމެޓީގެ އިސް މެމްބަރު ކުރީގެ ހޯރަފުށީ ދާއިރާގެ މެމްބަރު މުހައްމަދު އިސްމާއިލް ވިދާޅުވީ މި ހިނގާލުމަކީ ރާއްޖޭގައި ތިބި އިންޑިއާ ސިފައިން ބޭލުމަށާއި، ސަރުކާރުން އިންޑިއާއާއިކު ހަދާފައިވާ ގޮތް ނޭގޭ އެއްބަސްވުންތައް ހާމަ ކުރުމަށް ގޮވާލާ ބާއްވާ ސުލްހަވެރި ހިނގާލުމެއްކަމަށެވެ.
އޭނާ ވިދާޅުވީ ރާއްޖޭގެ މިހަރަކާތަކީ ޤައުމީ ހަރަކާތެއްކަމަށެވެ. "މިވަންކަމުގެ ދިފާއުގައި ދިވެހިން" ހަރަކާތަކީ ރާއްޖޭގެ މިނިވަންކަމާއި ސިޔާދަތާއި އިސްތިގުލާލުގެ ދިފާއުގައި ހިންގާ ހަރަކާތެއްކަމަށެވެ. އޭނާ ވިދާޅުވީ މިހަރަކާތުގައި ބައިވެރިވުމަށް ސިޔާސީ ޕާޓީތަކަށްވެސް ދައުވަތު ދިންކަމަށެވެ. ނަމަވެސް އެބޭފުޅުންގެ ފަރާތުން ފެނިގެން ގޮސްފައިވަނީ އަމިއްލަ އެދުންކަމަށެވެ.
މިއަދުވެސް ފެނިގެންދަނީ ވެރިކަމުގެ ޖާހަތާއި ލައްޒަތާއި، މަޤާމުގެ ދިފާއުގައި ތިބިތަންކަމަށާއި، އަދި އަމިއްލަ ޕާޓީ ބޮޑުކޮށް އަމިއްލަ އެދުން އިސްކުރުން ނޫންކަމށް ޕާޓީޓަކުގެ ލީޑަރުންގެ ކިބައިން ނުފެންނަ ކަމަށް މުހައްމަދު އިސްމާއިލް ވިދާޅުވިއެވެ.
މިހިނގާލުމަކީ ފުލުހުންގެ ހުއްދައާއިއެކު، މާލޭގައި ބޭއްވޭ ހިނގާލުމެއްކަމަށާއި، ހިނގާލުން ފެށުމަށް ހަމަޖެހިފައިވަނީ ހުކުރު ދުވަހު ހަވީރު ޕީޕީއެމް އޮފީސް ދޮރުމަތިންކަމަށް އޭނާ ވިދާޅުވިއެވެ.
