ކީރިތި ޤުރުއާނާއި ބެހޭ މަރުކަޒު ހިންގުމަށް މިހާރު ބޭނުން ކުރަމުންދާ އިމާރާތަކީ ބާވެފައިވާ އިމާރާތެއްކަމަށާއި، މަރުކަޒު ރަނގަޅު ކުރުމަށް މުޅިން އާ އިމާރާތެއް އަޅަންޖެހޭ ކަމުގައި ދީނީ އިލްމުވެރިޔާ ޝައިޚު އަލީ ޒައިދު ވިދާޅުވެއްޖެއެވެ.
ޝައިޚު ޒައިދު މިހެން ވިދާޅުވީ ޤުރުއާނާއި ބެހޭ މަރުކަޒު ބާހެ، އެތަން ބޭނުންކުރުމުގައި ބޮޑެތި ދަތިތަކެެއް ކުރިމަތިވެފައިވާތީ ގިނަބަޔަކު އެކަން ފާޅު ކުރަމުންދާ ދަނޑިވަޅެއްގައެވެ. ޝައިޚު ޒައިދު ވިދާޅުވީ ދުނިޔެވީ ކަންކަމަށް ބޮޑެތި އެފީސްތައް ހިންގުމަށް އިމާރާތް އެޅޭއިރު، މާތް ﷲގެ ފޮތަށް ޚާއްސަ ކުރެވިފައިވާ މަރުކަޒު ބާހެ ވީރާނާވަމުންދާއިރު އެކަމަށް ޚާއްސަ އިމާރާތެއް ނޭޅެންވީ ސަބަބެއް ނެތްކަމަށެވެ. މިއަދު އިމާރާތުގެ ހާލަތު ހުރި ގޮތޮން މުޅިން އާ އިމާރާތެއް އެޅުމަކީ ކޮންމެހެންވެސް ކުރަންޖެހޭ ކަމެއްކަމަށް ޝައިޚު ޒައިދު ވިދާޅުވިއެވެ.
ޤުރްއާނާ ބެހޭ މަރުކަޒު ރަނގަޅު ކުރުމަށް ފުރަތަމަވެސް ވީރާނާވެފައިވާ އެޢިމާރާތް ތަޅާލައި އާ ޢިމާރާތެއް އަޅަންޖެހޭ! އަޅުގަނޑުމެން ދުނިޔެވީ އޮފީސް އޮފީސް ހިންގަންވީމާ ބޮޑެތި އަރާމު ތަންތަން އެޅޭއިރު ﷲ ގެ ފޮތަށް ޚާއްޞަ މަރުކަޒަށް ޚާއްޞަ އިސްކަމެއް ދޭންޖެހޭ! މިކަން އަވަސްކުރަންޖެހޭ.
– ޒައިދު ވިދާޅުވިއެވެ.
ގުރުއާންގެ އިލްމު ފެތުރުމަށް ކުރީގެ ރައީސް މައުމޫން އަބްދުލް ގައްޔޫމުގެ ވެރިކަމުގައި ހުޅުވި ސެންޓަރުން އަންނަނީ ސެޓްފިކެޓް ލެވެލް އިން ފެށިގެން ޑިގްރީގެ ކޯސްތައް ވެސް ހިންގަމުންނެވެ. ނަމަވެސް 2019 ވަނަ އަހަރުން ފެށިގެން އެ މަރުކަޒުގެ ހިންގުން ވަރަށް ބޮޑަށް ދަށަށް ދާން ފަށާފައިވާކަމަށް ގިނަ އާންމުންދަނީ ބުނަމުންނެވެ.
ގުރުއާނާ ބެހޭ މަރުކަޒުގެ ހިންގުމުގެ ހަރަދުގެ 90 ޕަސެންޓު ހަރަދުކުރަނީ ޒަކާތު ފަންޑުންނެވެ. ދައުލަތުގެ ބަޖެޓުން ދެނީ ކުޑަ އެއްޗެކެވެ. ސަރުކާރުން މިފަދަ ކަންކަމަށް ސަމާލުކަން ނުދީ ސިޔާސީ މަޤާމުތައް އުފައްދައި، ބޭކާރު ޚަރަދުތައް ކުރަމުންދާތީ ގިނަ ބައެއްގެ ފާޑުކިޔުން ވަނީ ސަރުކާރަށް އަމާޒުވެފައެވެ. އަދި މިފަދަ ކަންކަމަކީ އާންމު ރައްޔިތުންނާއި، މުޅި ސަރުކާރުގެ މަސްލަހަތު ހިމެނެން ޖެހޭ ކަންކަމަށްވާއިރު މިކަންކަމަށް ސަރުކާރުގެ މާބޮޑު އަޅާލުމެއް ނެތްކަން ގިނަ ބަޔަކު ދަނީ ފާހަގަ ކުރަމުންނެވެ.
