2008ގެ އާ ގާނޫނު އަސާސީން ގެނެސްފައި އޮތް ވެރިކަމުގެ ނިޒާމު ބަދަލުކޮށް، ވެރިކަމުގެ ނިޒާމު ބަރުލަމާނީ ނިޒާމަކަށް އަބުރާލުމަށް އެމްޑީޕީގެ ލީޑަރޝިޕުން ކުރަމުންދާ މަސައްކަތްތަކަކީ، އެމްޑީޕީގެ ރައީސް މުހައްމަދު ނަޝީދުގެ މިހާރުގެ އެންމެ އިސް ސިޔާސީ މަސައްކަތް ޕުޅުކަން ޚުދު އެމަނިކްފާނުވެސް ވަނީ އެތައް ފަހަރެއްހެ މަތިން ވިދާޅުވެފައެވެ.

މިގޮތުން، ފާއިތިވެދިޔަ ހައެއްކަ މަސްދުވަހުގެ ތެރޭގައި އެމްޑީޕީގެ އިސް ބައެއް ފަރާތްކުން، މަޖިލިސް ބައެއް މެމްބަރުންވެސް ހިމެނޭގޮތުން މިމަސައްކަތް ވަނީ އެތައް ގުނައެއް ފުޅާ ކޮށްފައެވެ. މީގެ ތެރޭގައި، އެމްޑީޕީގެ ބައެއް މަޖިލިސް މެމްބަރުން މިމަސައްކަތުގައި ފާޅުކޮށް އުޅުއްވަމުން ގެންދަވާއިރު، ގިނަ މަޖިލިސް މެމްބަރުން އަދިވެސް ހަނު ތިއްބެވިއެއް ކަމަކު، އެޕާޓީގެ ލީޑަރޝިޕުން މިހާރުވެސް ގެންދަނީ، ބަރުލަމާނީ ނިޒާމެއް ރާއްޖެއަށް ގަނައުމަށް ތާއީދުކުރާ މީހުން ސޮއިކުރަމުންދާ ޕެޓިޝަނެއް ތައްޔާރު ކުރަމުންނެވެ. އަދި މި ޕެޓިޝަންގައި ސޮއިކުރުމުގެ މަސައްކަތް ރާޖޭގެ އެކި ކަންކޮޅުތަކުގައި މިހާރުވެސް، މި މަސައްކަތުގައި އުޅުއްވާ ފަރާތްތަކުން ކުރިޔަށް ގެންދަމުންދާކަން ފާހަގަ ކޮށްލެވެއެވެ.

މިގޮތުން ބަލާއިރު، އެމްޑީޕީގެ ރައީސް އިސްވެ ހުންނަވަައިގެން، ބަރުލަމާނީ ނިޒާމަކަށް ވެރިކަމުގެ ނިޒާމު ބަދަލު ކުރުމަށް ކުރެވޭ މަސައްކަތްތައް މިއުސޫލުން ކުރިޔަށް ދިޔަނަމަވެސް، ފާއިތިވެދިޔަ ތަނުގައި، މި މަސައްކަތުގެ ތެރޭގައި ސަރުކާރުގެ އެއްވެސް ހިއްސާއެއް، ނުވަތަ އެމްޑީޕީގެ އެތެރޭގައި އުފެދިފައި އޮތް ރައީސް ސާލިހުގެ ފެކްޝަންގެ އެއްވެސް ދައުރެއް އޮތްތަނެއް މިހާތަނަށް ފެނިގެން ގޮސްފައެއް ނުވެއެވެ.

އަދި ޚުދު ރައީސް ސާލިހުވެސް ފާއިތުވެދިޔަ ތަނުގައި ވިދާޅުވެފައިވަނީ، ބަރުލަމާނީ ނިޒާމެއް ރާއްޖެއަށް ގެނައުމާއި ގުޅޭގޮތުން ވިސްނަވާކަށް އެމަނިކްފާނަށް ވުގުތު ނެތް ކަމުގައެވެ. އަދި ވިދާޅުވެފައިވަނީ، އޭގެ ބަދަލުގައި ބޭނުންފުޅުވަނީ، 2023 އައުމުގެ ކުރިން، ރިޔާސީ އިންތިޚާބަށް ވެވަޑައިގެންނެވި ވައުދުފުޅުތައް ފުއްދެވުމަށް ކަމަށެވެ.

އެހެންނަމަވެސް، ބަރުލަމާނީ ނިޒާމެއް ރާއްޖެއަށް ގެނައުމަށް އެމްޑީޕީގެ ރައީސް ކުރައްވަމުން ގެންދަވާ މަސައްކަތް ޕުޅަށް، ސަރުކާރުގެ ފަރާތުން ފާއިތިވެދިޔަ ތަނުގައި ފިނި ޖަވާބުތަކެއް ދެމުން ގެންދިޔަ ނަމަވެސް، ފަހަކަށް އައިސް ފުރަތަމަ ފަހަރަށް ރައީސް ނަޝީދާއި ރައީސް ސާލިހާ ދެބޭފުޅުންގެ މެދުގައި ބޭއްވުނު ބައްދަލު ކުރެއްވުމުގައި، ނިޒާމު ބަދަލު ކުރުމާ ގުޅޭ މަޝްވަރާތައް ދެބޭފުޅުން ކުރައްވާފައިވާކަން، ރައީސް އޮފީހުން މިވަނީ ރަސްމީކޮށް ހާމަ ކޮށްފައެވެ.

ނިޒާމު ބަދަލު ކުރުމާ ގުޅޭ މަޝްވަރާތައް ރަސްމީ ސިފައެއްގައި ކުރިޔަށް!

6 މޭގަ ނަޝީދަށް އަމާޒުކޮށް ދެވުނު ޓެރަރިސްޓު ހަމަލާއަށްފަހު އެބުރި މާލެ ވަޑައިގަތުމަށްފަހު، އިއްޔެ ނަޝީދު މިވަނީ ފުރަތަމަ ފަހަރަށް ރަސްމީކޮށް ރައީސް ސާލިހުއާއި ބައްދަލު ކުރައްވާފައެވެ.

މިބައްދަލު ކުރެއްވުމަކީ، ފަހުގެ ތާރީޚެއްގައި، އާންމުކޮށް، ރަސްމީ ސިފައެއްގައި ދެބޭފުޅުން ބޭއްވެވި ފުރަތަމަ ބައްދަލު ކުރެއްވުމެވެ. އަދި ދިގު މުއްދަތަކަށް ނަޝީދު ރާއްޖެއިން ބޭރުގައި ހުންނެވުމަށްފަހު، އަދި އެމުއްދަތުގައި ރައީސް ސާލިހަށް އަމާޒުކޮށް ވިދާޅުވި ފާޑު ވިދާޅުވުންތަކާއި، ބަންޑުން ކުރެއްވި އުދާސްތަކަށްފަހު، މީޑިއާތަކަށް ބައްދަލުވުމުގެ މައުލޫމާތު ފޯރުކޮށްދީގެން ބޭއްވެވި ފުރަތަމަ ބައްދަލުވުންކަންވެސް ފާހަގަ ކޮށްލެވެއެވެ.

އަދި ދެބޭފުޅުން، ރައީސް އޮފީހުގައި ބޭއްވެވި މި ބައްދަލުވުމަކީ، ދާދި ފަހުން މަޖިލިސް އިދާރާގައި ނަޝީދު ބޭއްވެވި ނޫސްވެރިންގެ ބައްދަލުވުމުގައި، ވެރިކަމުގެ ނިޒާމު ބަދަލު ކުރުމަށް ކުރެވެމުންދާ މަސައްކަތްތަކާއި ގުޅޭގޮތުން ނޫސްވެރިޔަކު ކުރި ސުވާލުގެ ޖަވާބުގައި، އެމަސައްކަތުގެ ތަފްސީލަކަށް ވަޑައިގަންނަވާނީ، ރައީސް ސާލިހުއާއި މަޝްވަރާ ކުރެއްވުމަށް ފަހުގައި ކަމަށް ވިދާޅުވި ފަހުން، ރައީސް ސާލިހުއާއެކީ ބޭއްވެވި ރަސްމީ ބައްދަލު ކުރެއްވުމެއްކަންވެސް ފާހަގަ ކޮށްލެވެއެވެ.

މިމަހުގެ 6 ވަނަ ދުވަހު މަޖިލިހުގެ އިދާރާގައި ބޭއްވުނު ނޫސްވެރިންގެ ބައްދަލުވުމުގައި ނަޝީދު ވިދާޅުވެފައިވަނީ، ބަރުލަމާނީ ނިޒާމުގެ މަސައްކަތް ކުރައްވަމުން ގެންދަވަނީ، ރައީސް ސާލިހުގެ އިރުޝާދުގެމަތިން، އަދި އެމަނިކްފާނުގެ ތާއީދާވެސް އެކީގަ ކަމުގައެވެ. ހަމައެއާއެކު، ނަޝީދުގެ މި ނޫސްވެރިންގެ ބައްދަލުވުމުގައި، އެމަނިކްފާނު ކުރިޔަށް ގެންދަވާ ނިޒާމު ބަދަލު ކުރުމުގެ މަސައްކަތާ ގުޅޭ ކަންކަމުގައި، ރައީސް ސާލިހުގެ ތާއީދު އޮތްކަމަށް ވިދާޅުވެފައި ވަނިކޮށް، އިއްޔެ ރައީސް އޮފީހުގައި ބޭއްވިގެންދިޔަ ދެބޭފުޅުންގެ ރަސްމީ ބައްދަލުވުމަށްފަހު، ރައީސް އޮފީހުން މިވަނީ، ދެބޭފުޅުންގެ މެދުގަ ނިޒާމު ބަދަލުކުރުމުގެ މަޝްވަރާތައް ރަސްމީ ސިފައެއްގައި ކުރިޔަށް ގެންގޮސްފައި ވާކަން ރަސްމީކޮށް ހާމަ ކޮށްފައެވެ.

އެހެންކަމުން ފާއިތުވެިޔަ ތަނުގައި، ވެރިކަމުގެ ނިޒާމު ބަދަލު ކުރުމަށް ކުރެވެމުންދާ މަސައްކަތްތަކާ ގުޅޭގޮތުން ވިސްނެވުމަށް ވަގުތު ހުސްކުރައްވަން ބޭނުންފުޅު ވެވަޑައި ނުގަނަންނަވާ ކަމަށް ރައީސް ސާލިހު ވިދާޅުވި ނަމަވެސް، އަދި ވަކީން ޚާއްސަކޮށް، މި މަސައްކަތަކިީ، ކޯލިޝަން މެނިފެސްޓޯގައި އޮތް ވައުދެއް ކަމުގައި ނުވާތީ މިއީ ސަރުކާރުން އިސްކަންދޭ ކަމެއް ނޫންކަމަށް މީގެ ކުރިން ސަރުކާރުން ބުނެފައި ވިނަމަވެސް، އިއްޔެ ބޭއްވިގެންދިޔަ ދެބޭފުޅުންގެ ބައްދަލުވުމުގައި، ނިޒާމު ބަދަލުކުރުމުގެ މައްސަލައާއި ގުޅޭގޮތުން ރަސްމީކޮށް މަޝްވަރާ ކުރެވިފައި ވާކަން ރަސްމީކޮށް ހާމަކުރުމުން، މިމައްސަލައާއި ގުޅޭގޮތުން، ސަރުކާރުން ގެންގުޅޭ ނުވަތަ ފާޅުކުރަމުން އަންނަ ސިޔާސަތުތަކާ ގުޅޭގޮތުން ބައެއް ފަރާތްތަކަށް އޮޅުން ބޮޅުންތަކެއް އަރާފައިވާކަން މިއީ ގިނަބަޔަކު މިއަދު ފާހަގަކުރަމުން އަންނަ ކަމެކެވެ.

ނަޝީދުއާއި ރައީސް ސާލިހުއާ ދެބޭފުޅުން ރައީސް އޮފީހުގައި ބޭއްވި ބައްދަލު ވުމުގެ ތެރެއިންއަދި ހަމަ އެފަދައިން ބައެއް ފަރާތްތަކަށް ސަރުކާރުން، މި މައްސަލައާ ގުޅޭގޮތުން ގެންގުޅެމުން އަންނަ "ސާފު ނޫން" މި ސިޔާސަތުން އުދާސްތަކެއް ލިބިގެން ގޮސްފައިވި ނަމަވެސް، ބަރުލަމާނީ ނިޒާމަކަށް ވެރިކަމުގެ ނިޒާމު ބަދަލުކުރުމަށް މަސައްކަތް ކުރަމުންދާ ފަރާތްތަކަށް، ނުވަތަ އެމްޑީޕީގެ ތެރޭގަ އުފެދިފައި އޮތް، ރައީސް ނަޝީދުގެ ފެކްޝަނަށް މިއީ ލިބިގެންދިޔަ ހިންހަމަ ޖެހުމަކަށް ވެގެންދާނެކަންވެސް މިފުރުސަތުގައި ފާހަގަ ކޮށްލަން ޖެހެއެވެ.

ގިނަބަޔަކު ވާނުވާގަ!

ކޮންމެއަކަސް، ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލު ކުރުމަށް އެމްޑީޕީގެ ރައީސް މުހައްމަދު ނަޝީދު ކުރައްވަމުން ގެންދަވާ މަސައްކަތްތަކާ ގުޅޭގޮތުން ފާއިތުވެދުޔަ ތަނުގައި ސަރުކާރުން ފިނި ޖަވާބުތަކެއް ދީފައި ވިނަމަވެސް، މިހާތަނަށް މިމަސައްކަތާ ގުޅޭގޮތުން ސރުކާރުގެ ވިސްނުން ސާފުނުވާ ކަމަށް ގިނަ ބަޔަކު ގަބޫލުކުރަމުން އައިސްފައިވަނީ، މި މައްސަލައާ ގުޅޭގޮތުން ސީދާ ރައީސް ސާލިހުގެ ވިސްނުންފުޅު ސާފުނުވާތީއެވެ.

މިގޮތުން، ފާއިތުވެދިޔަ ތަނުގައި ނޫސްވެރިން މި މައްސަލައާ ގުޅޭގޮތުން ރައީސް ސާލިހަށް އަމާޒުކޮށްފައިވާ ސުވާލުތަކުގެ ޖަވާބުގައި ދެއްވާފައިވަނީ، އާންމު އުސޫލުން، މުޅިން ސާފު ނޫން ޖަވާބުތަކެއްކަން ފާހަގަ ކޮށްލެވެއެވެ. އެހެންނަަމަވެސް ކޯލިޝަން މެނިފެސްޓޯގައި ބަރުލަމާނީ ނިޒާމުގެ ވާހަކަ ނެތްކަމަށް ރައީސް އޮފީގެ ފަރާތުން ތަރުޖަމާން މަބުރޫކު ވިދާޅުވެފައިވި ނަމަވެސް، އަދި މިއީ ސަރުކާރުގެ ސިޔާސަތު ކަމުގައި ރައީސް އޮފީހުގެ ފަރާތުން ހާމަ ކޮށްފައި ވަނިކޮށް، ރައީސް އޮފީހުގައި ރައީސް ސާލިހު، ރަސްމީކޮށް ނިޒާމް ބަދަލުކުރުމުގެ މަޝްވަރާތައް ރައީސް ނަޝީދާއެކީ ކުރިޔަށް ގެންދެވުމުން، ބަރުލަމާނީ ނިޒާމަކަށް ވެރިކަމުގެ ނިޒާމު ބަދަލުކުރުމަށް އެމްޑީޕީގެ ލީޑަރޝިޕުން ކުރަމުންދާ މަސައްކަތްތަކާ ގުޅޭގޮތުން ސަރުކާރުން ގެންގުޅެމުން އަންނަ ސިޔާސަތު އަނެއްކާވެސް ސާފުނުވެ، ގިނަބަޔަކު މިވަނީ ވާނުވާގައިކަން ފާހަގަ ކޮށްލަން ޖެހެއެވެ.

އަދި އަމުދުން މިމަސައްކަތް ކުރިޔަށް ދަނީ، ރައީސް ސާލިހުގެ މަޝްވަރާގެ މަތިންކަމަށް، ނަޝީދު ވިދާޅުވާ ވިދާޅުވުމާއި ގުޅޭގޮތުންވެސް ސަރުކާރުގެ ބަހެއްނެތި، މިކަމުގެ މަޝްވަރާތައް އަމަލީގޮތުން ރައީސް ނަޝީދާއެކީ ރައީސް ސާލިހު ކުރިޔަށް ގެންދަވަން ފެއްޓެވުމުން، މިއީ، ބަސް މަދުކޮށް، އަމަލުން ގިނަ ކަންކަން ސާފު ކޮށްދިނުމަށް ސަރުކާރުން ގެންގުޅޭ ސިޔާސަތެއްގެ ގޮތުގައިވެސް މިކަން ގިނަބަޔަކު ވަނީ ސިފަކުރަން ފަށާފައެވެ.