ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ކުރައްވާ ދަތުރުފުޅުގައި ރައްޔިތުންގެ ޝުއޫރު ފާޅު ކުރުމަށް ބެނާހަރުކޮށް، ކަންކަން ކުރުމަކީ ދަތުރުފުޅަށް ހުރަސް އެޅޭނެ ކަމެއް ނޫންކަމުގައި ކުރީގެ ޕީޖީ މުހުތާޒު މުހުސިން ވިދާޅުވެއްޖެއެވެ.

ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އިއްޔެ ހދ. ކުޅުދުއްފުއްޓަށް ވަޑައިގަތުމުން އެމަނިކުފާނާ ދެކޮޅަށް ޝުއޫރު ފާޅު ކުރި މީހަކު ހައްޔަރުކޮށް ރައީސް ވަޑައިގެންނެވި ސަރަހައްދުގައި ހުރި ބެނާތަކާއި ޕޯސްޓަރުތައް ފުލުހުން ވަނީ އަތުލައިފަައެވެ. މިކަމާއި ގުޅިގެން ކުރީގެ ޕީޖީ މުހުތާޒު ވިދާޅުވީ އެއްވެސް ޤާނޫނަކުންވެސް އަދި ޤާނޫނު އަސާސީންވެސް ރައްޔިތުންނަށް ޝުއޫރު ފާޅު ކުރުމަށް ހުރަސް އެޅޭގޮތަކަށް ނެތްކަމަށެވެ. ރައީސުލްޖުމްހޫރިއްޔާ ރަށްރަށަށް ކުރައްވާ ދަތުރުފުޅު ތަކުގައި ރައްޔިތުންގެ ޝުއޫރު ފާޅު ކުރުމަކީ ދަތުރަށް ހުރަސް އެޅޭނެ ކަމެއްނޫންކަމަށް މުހުތާޒު ވިދާޅުވިއެވެ.

އޭނާ ވިދާޅުވީ ޝުއޫރު ފާޅު ކުރުމުގެ ގޮތުން ރައީސުލްޖުމްހޫރިއްޔާ އަށް ފެންނަ ފަށުގައި ބެނާ ދަމައި، ބޭނުން ޝުއޫރެއް ފާޅު ކުރުމުގެ ހައްގު ދިވެހި ކޮންމެ ރައްޔިތަކަށް ލިބިގެންވާކަމަށެވެ. ފުލުހުން އިއްޔެ އަމަލުކޮށްފައިވަނީ ގޯސްކޮށް ކަމަށް މުހުތާޒު ވިދާޅުވިއެވެ. އަދި އޭނާ ވަނީ ގިނަ ސުވާލުތަކެއް ފުލުހުންނާއި ކުރިމަތި ކުރުވާފައެވެ.

ރައީސްގެ ދަތުރުފުޅަށް ހުރަސް އެޅެންވީ ކީއްވެގެންތޯ އަޅުގަނޑުމެން ޝުއޫރުފާޅުކޮށްގެން. ކޮން ގާނޫނަކުންތޯ އެކަން މަނާ ވަނީ؟ ކީއްވެގެންތޯ ރައީސްއަށް ފެންނަ ފަށުގައި ބެނާ ނުދެމެންވީ؟". މިސުވާލުތަކަށް ފުލުހުން ޖަވާބުދެއްވަންޖެހޭނެ. މިހާދިސާގައި ފުލުހުން އަމަލުކުރިގޮތް ގޯސް.

– މުހުތާޒު ވިދާޅުވިއެވެ.

ފުލުހުންގެ އަމުރަށް ނުކިޔަމަންތެރިވިކަމުގެ ތުހުމަތުގައި އިއްޔެ ހައްޔަރު ކުރި އިދިކޮޅު ޕީޕީއެމްއަށް ނިސްބަތްވާ މުޖްތަބާ އަހުމަދު ބުނީ އޭނާ ހައްޔަރު ކުރީ "ރައީސުލްޖުމްހޫރިއްޔާއަށް ފެންނަ ފަށުގައި ފޮތި ދެމުމަކީ އެމަނިކުފާނުގެ ދަތުރުފުޅަށް ހުރަސްއެޅުން" ކަމުގައި ބުނުފަށް ފަހު ކަމަށެވެ.

ޕީޕީއެމްއިން ބުނެފައިވަނީ މުޖްތަބާ ހައްޔަރުކޮށްފައިވަނީ ރައީސް ސާލިހު ކުޅުދުއްފުށީ ދަނޑު ހުޅުވުމުގެ ރަސްމިއްޔާތަށް ވަޑައިގެންނެވި ވަގުތު  އޭނާގެ ގޭގައި،  ރައީސް ޔާމީން މިނިވަން ކުރުމަށާއި، އިބްރާހީމް މުހައްމަދު އިސްތިއުފާ ދިނުމަށާއި އަދި އިންޑިއާ މިލިޓަރީ ބޭރުކުރުމަށް ގޮވާލާފައިވާ ބެނަރއެއް ހުރެގެން ކަމުގައެވެ. ފުލުހުން އެގެއަށް ވަދެ އޭނާ ހައްޔަރު ކޮށްފައިވަނީ ވަރަށް އަނިޔާވެރިކަމާއެކުގައިކަމަށް ފުލުހުން ބުނެއެވެ. އަދި އޭނާ ހައްޔަރު ކުރީ ކޯޓު އަމުރަކާވެސް ނުލައިކަމަށް ޕީޕީއެމްއިން ބުނެއެވެ.

ރައީސް ޢަބްދުﷲ ޔާމީން ޢަބްދުލްޤައްޔޫމަށް ނުޙައްޤުން މިސަރުކާރުން ދެމުންދާ އަނިޔާތަކާ ދެކޮޅަށް ދިވެހި ރައްޔިތުން މިއަދު އަޑު އުފުލަމުންދާއިރު ނުފޫޒާ ގަދަބާރު ދައްކައިގެން މިސަރުކާރުން ހިންގަމުންދާ މިފަދަ ޚުދުމުޚުތާރު ޢަމަލުތަކަކީ ފެއިލްވެފައިވާ ނާގާބިލް ސަރުކާރެއްގެ ސިފަތަކެއް ކަމުގައި އިދިކޮޅު ކޯލިޝަނުން ވަނީ ބުނެފައެވެ.