ނ.ފޮއްދޫއަށް އެމްބިއުލާންސަކަށް އެދިގެން އުޅޭތާ މިހާރު އަރަކަށް ވުރެ ގިނަ ދުވަސް ވެފައިވާ ކަމަށާއި، މިފަހަރު ރަށްރަށަށް ފޮނުވާ އެމްބިއުލާންސްތަކުގެ ތެރޭގައި ފޮއްދޫ ހިނެނޭތޯ މެމްބަރު މުހައްމަދު އަބްދުﷲ ޝަފީޤް ސުވާލު ކުރައްވައިފިއެވެ.

ރާއްޖޭގެ ގިނަ ރަށްތަކުގައި އެމްބިއުލާންސްގެ މައްސަލަ ދިމާވެފައިވާ މިހާލަތުގައި، 20 އެމްބިއުލާންސެއް ކުިރއަށް ތިން ދުވަހުގެ ތެެރޭގައި ރަށްރަށަށް ފޮނުވުމަށް ހަމަޖެހިފައިވާކަމަށް ހެލްތު މިނިސްޓްރީން ވަނީ ބުނެފައެވެ. ނަމަވެސް އެމްބިއުލާންސް ފޮނުވަން ނިންމާފައިވާ ރަށްތައް އަދި ހާމަ ނުކުރެވެއެވެ. އެންމެ ބޮޑު ސަބަބަކީ މަޖިލީހުގައި ހިމެނޭ އެމްޑީޕީގެ މެމްބަރުންގެ ޕްރެޝަރު މިކަމުގައި ކުިރމަތި ވެދާނެތީކަމަށް ބެލެވެއެވެ.

ގިނަ މެމްބަރުން އެމެމްބަރަކު ނިސްބަތްވާ ދާއިރާގެ ރަށްތަކަށް އެމްބިއުލާންސް ހޯދުމަށް މަސައްކަތް ކުރާއިރު، މިހާތަނަށް އެކަމަށް ކަމާއި ބެހޭ ފަރާތްތަކުން އެދެވޭ ޖަވާބެއް ނުދޭކަމަށް ވަނީ ބުނެފައެވެ. މެމްބަރު މޯޑުވެސް ވިދާޅުވީ ފޮއްދޫއަށް އެމްބިއުލާންސެއް ހޯދަށް ސުވާލުކުރާތާ އަހަރަކަށްވުރެ ދުވަސް ވެފައިވާކަމަށެވެ. އަދި މިފަހަރު ފޮނުވާ އެމްބިއުލާންސްތަކުން އެރަށަށް އެމްބިއުލާންސެއް ލިބޭނެތޯ އޭނާ ވަނީ ސުވާލު ކުރައްވާފައެވެ.

ނ.ފޮއްދޫ އެމްބިއުލާންސް ލިބޭނީ ކޮންއިރަކުންތޯ އަހާތާ އަހަރު ދުވަސްވެއްޖެ! މިފަހަރު ލިބޭވަރު ވާނެބާ.

– މުހައްމަދު އަބްދުﷲ ޝަފީޤު ވިދާޅުވިއެވެ.

ހެލްތު މިނިސްޓްރީން ވިދާޅުވީ އަތޮޅުތަކުގައި ބޭނުންކުރުމަށް އެސްޓީއޯ މެދުވެރިކޮށް ގެނެސްފައިވާ 20 އެމްބިއުލަންސްގެ ފުރަތަމަ ޝިޕްމަންޓް އިދާރީ ގޮތުން ފުރިހަމަކުރަންޖެހޭ ކަންކަން ފުރިހަމަ ކުރުމުގެ މަސައްކަތް ކުރަމުން އަންނަކަމަށެވެ. އަދި އެ މަސައްކަތްތައް ނިމުނުހާ އަވަހަކަށް ކުރިއަށް އޮތް 3 ދުވަސް ތެރޭގައި ރަށްރަށަށް އެމްބިއުލާންސް ފޮނުވަން ފަށާނެކަމަށް ހެލްތު މިނިސްޓްރީން ވިދާޅުވެއެވެ.

ރަށްރަށަށް ބޭނުންވާ އެމްބިއުލާންސްތަކުގެ ތެރެއިން 20 އެމްބިއުލާންސް ރާއްޖެ ގެނެސްފައިވަނީ މިމަހުގެ 7ވަނަ ދުވަހުއެވެ. ސަރުކާރުން ވިދާޅުވެފައިވަނީ ކުރިއަށް އޮތް މަހެއްހާ ދުވަހުގެ ތެރޭގައި އިތުރު 20 އެމްބިއުލާންސް ގެންނާނެކަމަށާ އޭގެ ފަހުންވެސް 20 އެމްބިއުލާންސް ރާއްޖެއަށް ގެނައުމަށް ހަމަޖެހިފައިވާކަމަށެވެ. އެހެންކަމުން މިއަހަރުގެ ނިޔަލަށް އިތުރު 60 އެމްބިއުލާންސް ޚިދުމަތަށް ނެރެވޭނެކަމަށް އަންދާޒާކުރައްވާކަމަށް ރައީސް އޮފީހުގެ ތަރުޖަމާން މުޙައްމަދު މަބްރޫކް އަޒީޒް ވަނީ ވިދާޅުވެފައެވެ.

ހެލްތު މިނިސްޓަރު އަޙްމަދު ނަޞީމް ވިދާޅުވީ އަލަށް ގެންނަ އެމްބިއުލާންސްތަކުގެ ސަބަބުން ޚިދުމަތް އިތުރަށް ފުޅާވެ، އަތޮޅުތަކުގައި މިހާރު ކުރިމަތިވަމުންދާ ގިނަ ގޮންޖެހުންތަކަށް ޙައްލު ލިބިގެންދާނެކަމަށެވެ. އަދި އެމްބިއުލާންސްގެ ޚިދުމަތަކީ ކޮންމެ ރަށަކަށްވެސް މުހިންމު ޚިދުމަތެއްކަން ފާހަގަކުރައްވައި، ބައެއް ރަށްތަކުގައި އެމްބިއުލާންސް ހަލާކުވެ ޚިދުމަތް މެނދުކެނޑިފައި އޮތުމުގެ ސަބަބުން ގިނަ ދަތިތައް ކުރިމަތިވަމުންދާކަމަށް މިނިސްޓަރު ވިދާޅުވިއެވެ.