ހިމާޔަތްކުރެވިފައިވާ ދޫނި ހިފާ، ހައްޔަރުކޮށް އަދި ގޯނާކުރާ ފަރާތްތަކާއިމެދު ފިޔަވަޅު އަޅުމަށް ކަމާއިބެހޭ ފަރާތްތަކުން ނިކުންނެވި ފަދައިން ރާއްޖޭގައި ދީނަށް ފުރައްސާރަ ކުރާ ލާދީނީ މީހުންގެ އަމަލުތައްވެސް ހުއްޓުވަން ޖެހޭ ކަމުގައި ދީނީ އިލްމުވެރިޔާ ޝައިޚު އަލީ ޒައިދު ވިދާޅުވެއްޖެއެވެ.
ޝައިޚު ޒައިދު މިފަދަ ގޮތަކަށް ވިދާޅުވީ މި ދުވަސްވަރަކީ ދުނިޔޭގެ އެކިކަންކޮޅުތަކުން ވަރަށް ގިނަ ބާވަތްތަކުގެ ދޫނި ރާއްޖެއަށް ހިޖުރަކުރަމުން އަންނަ ދުވަސްވަރަކަށްވާއިރު އެދޫނިތައް ހިފައި އަނިޔާކުރަމުންދާތީ ކަމާއިބެހޭ ފަރާތްތަކުން މިކަމުގައި އަމަލު ކުރަމުންދާ ފުރިހަމަ ކަމަށްޓަކައި އެކަން ފާހަގަ ކުރައްވައެވެ. ޒައިދު ވިދާޅުވީ މާތް ﷲ ދޫނި ސޫފާއި ސޫފި ލެއްވެވީ އިންސާނުންޓަކައި ކަމުގައެވެ.
ރާއްޖެއަށް މިދުވަސްވަރު އަންނަ ދޫނިތަކުގެ ހިމާޔަތުގައި ކަމާއިބެހޭ އެންމެހައި ފަރާތްތައް ހަރަކާތްތެރިވާ ގޮތަށް ރާއްޖޭގައި ފާޅުކަން ބޮޑު ގޮތެއްގައި އިސްލާމް ދީނަށް ފުރައްސާރަކޮށް، ދީނާއި ދެކޮޅަށް ހިންގޭ ހަރަކާތްތައް ހުއްޓުވެން ޖެހޭކަމަށް ޒައިދު ވިދާޅުވިއެވެ. އަދި މިފަދަ ދީނާއި ޚިލާފް ކަންކަން ހިންގާ ލާދީނީ މީހުންގެ އަމަލުތައް ބެލުމުގައިވެސް ކަމާިއބެހޭ ފަރާތްތަކުން ފަންކްޝަން ރަނގަޅުވެ ހަލުވި ފިޔަވަޅު ތަކެއް އެޅުން މުހިންމު ކަމަށް ޝައިޚު ޒައިދު ވިދާޅުވިއެވެ.
ﷲ ތަޢާލާ ދޫނި ސޫފާސޫފި ލެއްވެވީ އިންސާނުންނަށްޓަކައި. މިހާރު އައިސްއުޅޭ ދޫނިތަކުގެ ޙިމާޔަތުގައި ކަމާބެހޭފަރާތްތަކުން ފަންކްޝަން ކުރަމުންދާ ރަނގަޅު ގޮތަށް، ލާދީނީ މީހުންނާއި، ސޯޝަލްމީޑިއާގައި ދީނަށް ފުރައްސާރަކުރާ މީހުންނާއި އެމީހުންގެ ނުބައި ޢަމަލުތައްވެސް ހުއްޓުވެންޖެހޭ!
– ޒައިދު ވިދާޅުވިއެވެ.
ރާއްޖެއަށް ޒިޔާރަތް ކުރާ ދޫނިތައް ހިފާ ހައްޔަރުކޮށް ގެއްލުންދޭ މީހުންނާއިމެދު ފިޔަވަޅު އަޅާނެކަމަށް ކަމާއި ގުޅުންހުރި އިދާރާތަކުން ވަނީ ބުނެފައެވެ. އަދި މިކަމުގައި އީޕީއޭއާއި، ރައްޔިތުންގެ މަޖިލީހުގެ ކަމާއި ގުޅުންހުރި ކޮމެޓީތަކާއި، ކައުންސިލްތަކާއި، މިނޫންވެސް އެކި ވުޒާރާތަކުން ގުޅިގެން ގެންދަނީ ޚާއްސަ މަސައްކަތްތަކެއް ކުރަމުންނެވެ.
ކޮންމެ އަހަރަކު މިދުވަސްވަރުގައި ވަރަށް ގިނަ ފަރާތްތަކުން މިފަދަ ދޫނި ހިފާ، ހައްޔަރުކޮށް ދޫންޏަށް ގޯނާކުރަމުންދާތީ، މިކަމަކީ ނުހަނު ކަންބޮޑުވާ އަދި ހިތާމަކުރާ ކަމެއްކަމަށް އެފަރާތްތަކުން ވަނީ ވިދާޅުވެފައެވެ. އެގޮތުން، ފުޓްބޯޅަ ދަނޑުތަކުގަޔާއި، ހާމައަށް ހުންނަ ބިންތަކުގައާއި ހިއްކާފައިވާ ބިންތަކުގައި މަޅިފައްޗާއި ދަންތުރައާއި އެކި އާލާތްތައް ބޭނުންކޮށްގެން މިފަދަ ދޫނިތައް ހިފާކަމުގެ ޝަކުވާ ލިބެމުންދާތީ، ހިމާޔަތްކޮށްފައިވާ ދޫނިތައް ހިފާ، އެތަކެއްޗަށް ގޯނާކޮށް ކޮށީގައި ބަންދުކޮށްގެން ނުގެންގުޅުމަށް ހުރިހާ ފަރާތްތަކަށްވެސް ކަމާއިބެހޭ ފަރާތްތަކުން ވަނީ އިލްތިމާސް ކުރައްވާފައެވެ.
ހިމާޔަތްކުރެވިފައިވާ ދޫނި ހިފާ ހައްޔަރުކޮށް އަދި ގޯނާކުރާ ފަރާތްތަކާމެދު ތިމާވެއްޓަށް ގެއްލުން ދިނުމާއި، ޖޫރިމަނާ ކަނޑައެޅުމާއި ބަދަލު ހޯދުމުގެ ގަވާއިދާއި އެނޫންވެސް ގަވާއިދުތަކުގެ ދަށުން ޖޫރިމަނާ ކުރެވޭނެކަމަށް އީޕީއޭއިން ވަނީ ބުނެފައެވެ.
