ސާފް ޗެންޕިއަންޝިޕް ފުޓުބޯޅަ މުބާރާތުގައި ރައްޔިތުންގެ މަޖިލީހުގެ މެމްބަރުންގެ ތެރެއިން ވެރިކަން ކުރާ މައި ޕާޓީ އެމްޑީޕީގެ ބައެއް މެމްބަރުންގެ އެންމެ ބޮޑު ކަންބޮޑުވުމަކީ އިއްޒަތްތެރި މެމްބަރުންނަށް ދަނޑުގައި މެޗު ބެލުމަށް ރަނގަޅު އިންތިޒާމު ތަކެއް ނެތުމެވެ.

މިފަހަރުގެ ސާފް ޗެންޕިއަންޝިޕް މުބާރާތަކީ އިންތިޒާމުދަށް، އާންމުން ބޮޑު ތަކުލީފެއް އުފުލަން ޖެހުނު މުބާރާތެކެވެ. މުބާރާތުގެ އެއްވެސް ކަމެއްގައި އާންމު ރައްޔިތުން ބޮޑު ތަކުލީފެއް ނޫއުފުލައި ކުރެވުނު އެއްވެސް ކަމެއް ނެތެވެ. މެޗެއްގެ ޓިކެޓް ހޯދުމަށްވެސް އެތައް ގަޑިއިރެއް ކުރިން ގަދަ އަވީގައި ކިއުގައި ޖެހިގެން ޓިކެޓް ގަނެ ޤައުމަށްޓަކައި ދަނޑަށް ވަދެ ވަނީ ވަރަށް ފުރިހަމަ ސަޕޯޓެއް ކޮށްފައެވެ. ހަމަ މިގޮތަށް ޖާޒީ ގަންނަންވެސް ޖެހުނީ ބޮޑެތި ކިއު ހަދައިގެންނެވެ.

ކިތަންމެ ބޮޑު ކިއުއެއްގައި ޖެހިގެންވެސް ޤައުމަށްޓަކައި، ޤައުމީ ޓީމަށް ސަޕޯޓް ކުރުމަށް ދިވެހިންގެ ޝަކުވާއެއް ނެތެވެ. ނަމަވެސް މިކަމުގައިވެސް އެންމެ ބޮޑު ޝަކުވާއެއް ކުރި އެއްބަޔަކީ ރައްޔިތުންގެ ކައިރިއަށް ވަޑައިގެން އާދޭސް ދަންނަވައިގެން އިންތިޚާބުވި މަޖިލިސް ބައެއް މެމްބަރުންނެވެ. މަޖިލީހުގެ އެމްޑީޕީއަށް ނިސްބަތްވާ ބައެއް މެމްބަރުންވަނީ އެމެމްބަރުންނަށް ދަނޑުގެ ވީއައިޕީގައި މެޗު ބެލޭނެ އިންތިޒާމު ހަމަޖެހެން ޖެހޭނެކަމަށް ބުނެފައެވެ. އަދި މަޖިލިސް މެމްބަރުންނަކީ ޚާއްސަ އިމްތިޔާޒު ތަކަކާއި، އިނާޔަތްތަކެއް ލިބިފައިވާ ބަޔަކަށްވާއިރު މެމްބަރުންނާއިމެދު މިމުބާރާތުގައި ކަންތައް ކޮށްފައިވަނީ ވަރަށް ދެރަކޮށް ކަމުގައި ވަނީ ބުނެފައެވެ.

އިއްޒަތްތެރި މެމްބަރު ކިޔާއިރު، އިއްޒަތްތެރިކަން ނުލިބޭތީ އިކުރާމްގެ ކަންބޮޑުވުން!

މެމްބަރުންގެ ތެރެއިން "އިއްޒަތް" ނުލިބިގެން ބައެއް މެމްބަރުން ކަންބޮޑުވުން ފާޅުކޮށްފައިވާއިރު، މަޖިލީހުގައި ހިމެނޭ އިދިކޮޅޫ ބައެއް މެމްބަރުންނާއި، އަމިއްލަ މެމްބަރުން މެޗު ބަލާފައިވަނީ އާންމުންނާއިއެކު ސިޑި ބަރީގައެވެ. މީގެ ތެރެއިންވެސް ގިނަ ބައެއްގެ ސަމާލުކަން ހުއްޓުނީ ރައްޔިތުންގެ މަޖިލީހުގެ ގުރައިދޫ ދާއިރާގެ މެމްބަރު އަދި ރައީސް މައުމޫންގެ ދަރިކަލުން ޣައްސާން ސިޑި ބަރީގައި ސަޕޯޓަރުންނާއިއެކު ޤައުމީ ޓީމަށް ހިތްވަރު ދިނުމަށްޓަކައި ހުރި ވީޑިއޯއެވެ.

ޣައްސާންއަކީ މިފަދަ ޤައުމީ ގަންކަމުގައި ވަރަށް ޖޯޝުގައި އަބަދުވެސް ފެންނަ ބޭފުޅެކެވެ. ބެރުޖެހުމަށް އަބަދުވެސް ޝައުގުވެރިކަން ހުންނަ ޣައްސާން ރާއްޖެއާއި، އިންޑިއާއި ވާދަކުރި މެޗުގައި ސަޕޯޓަރުންނާއިއެކު ހުރީ ބެރު ޖެހުމުގައެވެ. މެޗު ނިމެންދެންވެސް ޣައްސާން ހުންނެވީ، އިއްޒަތްތެރި ރައްޔިތުންނާއި އެކުގައެވެ.

ފައިނަލަށް ނުގޮސް އިންޑިއާ އަތުން ރާއްޖެ ބަލިވިނަމަވެސް ފަހު ވުގުތާއި ހަމައަށް ޓީމަށް ސަޕޯޓު ދިނުމާއި، އައްސާން ހުންނެވީ ސަޕޯޓަރުންނާއިއެކު ބެރުޖެހުމުގައެވެ.