ބޮލީވުޑްގެ އަރަމުން އަންނަ ތަރި އަރުޖުން ކަޕޫރު "ލޭޑީކިލަރ" ކިޔާ ތުރިލާ ފިލްމަކަށް ސޮއިކޮށްފި އެވެ.
"ދަ ލޭޑީކިލަރ" އަކީ ޓީ ސީރީޒްގެ ބޫޝަން ކުމާރާއި ޕްރޮޑިއުސަރު ޝާއިލޭޝް ސިންގް ޕްރޮޑިއުސްކުރާ ފިލްމެކެވެ.
މި ފިލްމުގެ ޕޯސްޓަރު މިހާރު އާންމުކޮށް ދައްކައިލައިފައި ވާއިރު ފިލްމުގެ ޑައިރެކްޓަރަކީ 2012ގެ ”ބީއޭ ޕާސް“ އާއި 2019ގެ ”ސެކްޝަން 375“ ފަދަ މޮޅެތި ފިލްމް ތަކެއް ޑައިރެކްޓް ކުރި އަޖޭ ބާލް އެވެ.
މި ފިލްމްގެ ޕޯސްޓަރު ހިއްސާ ކުރަމުން އަރުޖުން ބުނެފައިވަނީ މިއީ އޭނާގެ އެންމެ އުންމީދީ ފިލްމަށް ވާނެ ކަމަށެއެވެ. އަދި މި ފިލްމުން ލޮތްބާއި ސަސްޕެންސް އާއި އެނޫންވެސް އިހުސާސްތައް ބެލުންތެރިންނަށް ފެނިގެން ދާނެކަމަށް އޭނާ ވަނީ ބުނެފައެވެ.
އަރުޖުން އެންމެ ފަހުން ފެނިގެން ދިއައީ ސައިފް އަލީ ޚާނާއި ޔަމީ ގޯތަމް އަދި ޖެކޮލިން ފެރްނާންޑޭޒް އާއެކު ފިލްމް "ބޫތު ޕޮލިސް" އިންނެވެ.
ކޮމެންޓު ފޮނުވާ