ރާއްޖޭގެ ޤައުމީ ޓީމު ސާފް ޗެންޕިއަން ޝިޕްގައި ދެއްކި ހިތްވަރު ގަދަ ކުޅުމާއިމެދު ފަޚުރުވެރިވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ސާފް ޗެންޕިއަންޝިޕް އަމިއްލަ ޤައުމުގައި މިފަހަރު ބާއްވާއިރު، މުބާރާތުގެ ތަށި ދިފާއު ކުރުމަކީ ރާއްޖޭގެ އެންމެ ބޮޑު އަމާޒެވެ. ނަމަވެސް މުބާރާތުގެ ފުރަތަމަ މެޗުން ބަލިވެ އަދި ފައިނަލަށް ދިއުމަށްޓަކައި ކުޅުނު ފަހު މެޗުން އިންޑިއާ އަތުން ބަލިވެ ރާއްޖެ ވަނީ މުބާރާތުގެ ފައިނަލަށް ނުގޮސް ކަޓައިފައެވެ. މުބާރާތުގައި ރާއްޖެ ކުޅުނު ހުރިހާ މެޗެއް ބެެއްލުވުމަށް ރައީސުލްޖުމްހޫރިއްޔާ ދަނޑަށް ވަޑައިގެންނެވިއެވެ.
Very proud of the performance of #TeamMaldives at the SAFF Championships. Even though we did not get to the finals, the team deserves high praise for the courage they displayed both on and off field. I’m confident that the team will continue to excel in the future. @MaldivesFA
— Ibrahim Mohamed Solih (@ibusolih) October 14, 2021
ޓީމަށް ހިތްވަރު ދެއްވައި، ރައީސް ކުރެއްވި ޓްވީޓެއްގައި ވިދާޅުވީ މި އަހަރުގެ ސާފް ޗެމްޕިއަންޝިޕްގައި ރާއްޖެ ޓީމުން ދެއްކި މޮޅު ކުޅުމާއި މެދު ފަހުރުވެރިވާ ކަމަށެވެ. އަދި މިފަހަރުގެ މުބާރާތުގެ ފައިނަލަށް ދަތުރު ނުކުރެވުނު ނަމަވެސް ޓީމުން ދަނޑު މަތީގަ އާއި ދަނޑުން ބޭރުގައި ކުރި ހިތްވަރަށް ޝުކުރާއި ތައުރީފު ހައްގުވާ ކަމަށެވެ. ކުރިއަށް އޮތް ތަނުގައި ދިވެހި ޓީމުން އިތުރު ކުރިއެރުން ތަކެއް ހޯދާނެ ކަމުގެ ޔަގީންކަން އެމަނިކުފާނަށް އެބައޮތް ކަމަށް ވެސް ވިދާޅުވިއެވެ.
ރާއްޖެއިން މުބާރާތާއި އަލްވަދާއު ކިޔަން ޖެހުނީ ރޭގެ މެޗުގައި އިންޑިއާ އާއި ބައްދަލުކުރި މެޗުގައި 3-1 ގެ ނަތީޖާ އަކުން ބަލި ވުމުންނެވެ. ރޭގެ މެޗުގައި އިންޑިއާ އަތުން މޮޅު ނުވަތަ އެއްވަރު ވެގެން ވެސް ރާއްޖެއަށް ފައިނަލަށް ދިއުމުގެ ފުރުސަތު އޮތެވެ.3
މުބާރާތުގެ ފައިނަލުގައި ވާދަ ކުރާނީ ނޭޕާލާއި އިންޑިއާއެވެ. މި މެޗު އޮންނާނީ މިއަންނަ ހޮނިހިރު ދުވަހުގެރޭ ނުވައެއް ޖަހާއިރު ގަލޮޅު ދަނޑުގައެވެ.
