މި އަހަރުގެ ނޫސްވެރިކަމުގެ އިނާމު ދިނުމުގެ އުސޫލާ މެދު ގިނަ ނޫސްވެރިންތަކެއް ހިތްހަމަނުޖެހިފައި ތިބި ދަނޑިވަޅެއްގައި ރައީސް އިބްރާހިމް މުހައްމަދު ސޯލިހު، އެ ހަފުލާގައި ބައިވެރިވަޑައިގަތުމަކީ ނޫސްވެރިން ކަންބޮޑުވާ ކަމެއް ކަމަށް ބުނެ އެ މަނިކުފާނަށް މިއަދު ސިޓީއެއް ފޮނުވައިފިއެވެ.
ރާއްޖޭގެ 70 އަށް ވުރެ ގިނަ ނޫސްވެރިން ސޮއިކޮށް ރައީސް ސޯލިހަށް ފޮނުވި ސިޓީއެއްގައި ބުނެފައި ވަނީ ނޫސްވެރިކަމުގެ އިނާމް 2020 މިފަހަރު ދެނީ މިދިޔަ ފެބްރުއަރީ 22 ގައި ކައުންސިލުން އާންމުކޮށްފައިވާ ނޫސްވެރިކަމުގެ އިނާމް ދިނުމުގެ އުސޫލާ ހިލާފަށް ކަމަށެވެ. އެގޮތުން އޮންލައިން މީޑިއާތަކުގެ ނޫސްވެރިންނަށް ވަކި ޕެނަލްއަކުން މާކްސް ދީފައި ބްރޯޑްކާސްޓިން މީޑިއާތަކުގެ ނޫސްވެރިންނަށް ވަކި ޕެނަލްއަކުން މާކްސް ދިނުމަށް ފަހު ދެ ބާވަތުގެ މީޑިއާ އެއްކޮށްލައިގެން އިނާމް ދިނުމަށް ނިންމާފައިވާ ކަމަށް ސިޓީގައިވެއެވެ.
މި އިނާމަށް މި އަހަރު ކުރިމަތިލި 10 މީޑިއާގެ ތެރެއިން ހަތް މީޑިއާއަކުން ކަންބޮޑުވުން ފާޅުކޮށް، އެގޮތަށް އިނާމު ދިނުން ކުރިއަށް ނުގެންދިއުމަށް މޯލްޑިވްސް މީޑިއާ ކައުންސިލް (އެމްއެމްސީ) އަށް ވަނީ ޕެޓިޝަނެއް ވެސް ހުށަހަޅައިފައެވެ. އެ ޕެޓިޝަންގައި ސޮއިކޮށްފައި ވަނީ "މިހާރު"، "އަވަސް"، ވަން އޮންލައިން"، "ވޮއިސް"، "މޯލްޑިވްސް ބިޒްނަސް ސްޓޭންޑާޑް"، "ފަހު މިނެޓް" އަދި "ވަގުތު" އެވެ.
ނަމަވެސް މީޑިއާތަކުގެ އިސްވެރިންނާ މަޝްވަރާ ކުރުމެއް ނެތި ކުރިން ނިންމި ގޮތަށް އިނާމް ދިނުމުގެ ކަންކަން ކުރިއަށް ގެންދަން މީޑިއާ ކައުންސިލުން ނިންމުމުން ގިނަ އަދަދެއްގެ ނޫސްވެރިންގެ ސޮޔާއެކު އެ މައްސަލަ ރައްޔިތުންގެ މަޖިލިހަށާއި އިނާމްދޭ ކޮމިޓީގެ މުގައްރިރަށް ސިޓީއެއް ފޮނުވިއެވެ. ސިޓީގައި ފާހަގަކޮށްފައިވާ ގޮތުގައި އެ މައްސަލަ މިއަދުގެ ވަގުތެއްގައި ކޯޓަށް ވެއްދުމަށް ވެސް ދަނީ މަސައްކަތް ކުރަމުންނެވެ.
ގިނަ އަދަދެއްގެ ނޫސްވެރިންގެ ކަންބޮޑުވުންތަކެއް ހުރެ، އެ މައްސަލައަށް ހައްލެއް ހޯދުމަށް އެއްވެސް މަސައްކަތެއް ނުކޮށް ބާއްވާ އިނާމް ދިނުމުގެ ހަފްލާއެއްގައި ރައީސް ސޯލިހް ބައިވެރިވެވަޑައިގަތުމަކީ ނޫސްވެރިން ކަންބޮޑުވާ ކަމެއް ކަމަށް ވެސް ސިޓީގައިވެއެވެ.
