ސުޕްރީމް ކޯޓުގައި މިހާރު ކުރިއަށްދާ ކުރީގެ ރައީސް އަބްދުﷲ ޔާމީންގެ އިސްތިއުނާފީ މައްސަލައިގައި އެމަނިކުފާނުގެ ފަރާތްޕުޅުން ހުށަހަޅާފައިވާ ހުށަހެޅުންތަކާ ގުޅޭ ގޮތުން މާދަމާ ގޮތް ނިންމަވާނެ ކަމަށް ޝަރީއަތުން ބުނެފިއެވެ.
މިއަދު ކުރިއަށް ދިޔަ އަޑުއެހުމުގައި ފަނޑިޔާރުންގެ ބެންޗުގެ ރިޔާސަތުގައި އިންނެވި ފަނޑިޔާރު މަހާޒް އަލީ ޒާހިރު ވިދާޅުވީ ޔާމީންގެ ފަރާތުން ހުށަހެޅުއްވި ކަންކަމަށް މާދަމާއަށް ގޮތެއް ނިންމަން ނިންމެވީ ޔާމީންގެ ފަރާތުން ގިނަ ލިޔެކިއުންތަކެއް ހުށަހަޅާފައި އޮތުމުން އެ ކަން ދިރާސާކޮށް ގޮތެއް ނިންމެވުމަށެވެ.
މި މައްސަލަ ސުޕްރީމް ކޯޓުގައި ބައްލަވަނީ ތިން ފަނޑިޔާރުންގެ ބެންޗަކުންނެވެ. އެއީ ފަނޑިޔާރުގެ މަހާޒްގެ އިތުރުން ފަނޑިޔާރު ޑރ.މުހައްމަދު އިބްރާހީމްއާއި ފަނޑިޔާރު ޑރ.އަޒްމިރަލްދާ ޒާހިރެވެ. ޔާމީންގެ އިސް ގާނޫނީ ވަކީލް ޑރ.މުހައްމަދު ޖަމީލް ވަނީ ރާއްޖެއާއި އަވައްޓެރި އިންޑިއާގެ އިތުރުން އެމެރިކާގައި ވެސް ކަފާލާތުގެ ދަށުން ނިންމާފައިވާ ނިންމުންތަކުގެ ގަޒިއްޔާތަކުގެ ލިޔެކިއުންތަކެއް މިއަދު ޝަރީއަތަށް ދެއްވައިފައެވެ.
މީގެ ތެރޭގައި ޔާމީންގެ ވެރިކަމުގައި ޖަލު ހުކުމެއް ނުވަތަ ޖަލު ބަންދެއް ކުރިމަތިވި މީހުން ވެސް ހިމެނެއެވެ. ކުރީގެ ރައީސް މުހައްމަދު ނަޝީދާއި ކުރީގެ ރައީސް މައުމޫން އަބްދުލްގައްޔޫމްއާއި މައުމޫންގެ ދަރިކަލުން އަހްމަދު ފާރިސް މައުމޫންއާއި، ޖޭޕީގެ ލީޑަރު ގާސިމް އިބްރާހީމްގެ ކަފާލާތުގެ ދަށުން ދޫކޮށްލަން ނެރުނު އަމުރުތައް މިއަދު ޖަމީލް ވަނީ ސުޕްރީމް ކޯޓުގެ ސަމާލުކަމަށް ގެނެސްފައެވެ.
ހުކުމް ތަންފީޒު ކުރުން ފަސް ކޮށްދިނުމަށް އެދި ހުށަހަޅާފައިވާ ހުށަހެޅުމުގައި ދިފާއީ ވަކީލް އަބްދުﷲ ޝިޔާޒް ވިދާޅުވެފައި ވަނީ މި މައްސަލައިގައި ކްރިމިނަލް ކޯޓުން އަދި ހައިކޯޓަށް ދައުލަތުން ހުށަހަޅާފައިވާ ކަންތައްތަކަކީ ތެދުކަމަށް ބަލައި ބޮޑެތި ގޯސްތަކެއް ހަދާފައިވާ ކަމަށެވެ. ފަނޑިޔާރުން މި މައްސަލަ ނިންމަވާފައި ވަނީ ގާނޫނު އެއްފަރާތްކުރުމަށް ފަހުގައި ކަމަށާއި އެކަށީގެންވާ ޝައްކެއް ނެތް މިންވަރަށް ކުށެއް ސާބިތު ކުރުމެއް ނެތި ޔާމީންގެ މައްޗަށް ކުށް ސާބިތުވާ ކަމަށް ކަނޑައަޅައި ހުކުމްކޮށްފައި ވާތީ މިއީ ހުކުމް ކުރުން ފަސް ކުރެވޭނެ ސަބަބުތަކެއް ކަމަށް ވަކީލް ވަނީ ވިދާޅުވެފައެވެ.
މާދަމާ ރައީސް ޔާމީންގެ ފަރާތްޕުޅުން ހުށަހަޅާފައިވާ ކަންކަމަށް ގޮތެއް ކަނޑައަޅައި އަދި ދެ ފަރާތުން ހުލާސާ ބަޔާން އިއްވުން އޮންނާނެ އެވެ. އެއަށްފަހު އަޑުއެހުންތައް ނިންމައިލައި ދެން އޮންނާނީ ހުކުމް އިއްވުމެވެ. މި މައްސަލަ ބައްލަވަނީ ފަނޑިޔާރު މަހާޒް އަލީ ޒާހިރު، ފަނޑިޔާރު ޑރ. އަޒްމިރަލްދާ ޒާހިދު އަދި ޑރ. މުހައްމަދު އިބްރާހީމްއެވެ.
