މުސާރަ ޖަމާވުން ލަސްވި ސިއްޙީ މުވައްޒަފުންގެ މުސާރަ މިރޭ ޖަމާކޮށް ނިމޭނެ ކަމަށް ފިނޭންސް މިނިސްޓްރީން ބުނެފިއެވެ.

ފިނޭންސް މިނިސްޓްރީން ބުނެފައިވަނީ އަތޮޅުތަކުގެ ސިއްޙީ ޚިދުމަތްދޭ ތަންތަނުގައި މަސައްކަތްކުރާ ބައެއް މުވައްޒަފުންނަށް ސެޕްޓެމްބަރު މަހުގެ މުސާރަ ޖަމާވުން ލަސްވީ އެ މުވައްޒަފުންގެ ބައެއް މައުލޫމާތުތައް އައު ސިސްޓަމަކަށް އަޅައި އަޕްޑޭޓް ކުރުމުގެ މަސައްކަތް ކުރަމުންދާތީ ކަމަށެވެ. އެކަން ކުރަންޖެހުނީ މިދިޔަ މަހު ބައެއް މުވައްޒަފުންނަށް އިތުރަށް މުސާރަ ދެވުމާއި ގުޅިގެން އެކަން ރަނގަޅުކޮށް އެފަދަކަމެއް އިތުރަށް ތަކުރާރު ނުވާނެގޮތަށް ކަންތައްތައް ބައްޓަން ކުރަމުންދަނިކޮށް ކަމަށް އެމިނިސްޓްރީން ވަނީ ބުނެފައެވެ. އަދި ރަށްރަށުގެ މުވައްޒަފުން ބަނޑޭރި ޕޯޓަލްގައި ރަޖިސްޓްރީ ކުރަން މިހާރު ފަށައިފައިވާކަން ފިނޭންސް މިނިސްޓްރީން ބުނެފައިވެއެވެ.

ހެލްތު މިނިސްޓްރީގެ މުވައްޒަފުންތަކެއްގެ މުސާރައިގެ މައްސަލަތަކެއް މިދިޔަ މަހުވެސް ޖެހިފައިވާއިރު، އެފަހަރު ގިނައިން ޖަމާވި މުސާރައިގެ ތެރެއިން ބޮޑު ބަޔެއް އަދިވެސް ލިބިފައިނުވާ ކަމަށް ފިނޭންސް މިނިސްޓްރީން މައުލޫމާތުދެއްވިއެވެ. އަދި އިތުރަށް ޖަމާވި ފައިސާ ރައްދު ނުކުރާ މުވައްޒަފުންގެ އަތުން އެ ފައިސާ ލިބެން ދެން، އެ މީހުންގެ މުސާރައިން އެ ބައި އުނިކުރަން ފިނޭންސް މިނިސްޓްރީން ވަނީ ނިންމަވާފައެވެ.

މިކަމުގެ ކަންބޮޑުވުން ގިނަ މުވައްޒިފުންތަކެއް ފާޅު ކުރަމުންދާއިރު، ޞިއްޚީ ދާއިރާގެ ބައެއް ޖަމްއިއްޔާތަކުންވެސް މިކަމުގެ ކަންބޮޑުވުން ފާޅު ކުރަމުންނެވެ. އެގޮތުން މޯލްޑިވްސް ހެލްތު ޕްރޮފެޝަނަލް ޔޫނިއަނުން ކޮށްފައިވާ ޓުވީޓެއްގައި ބުނެފައިވަނީ 8 އަތޮޅެއްގައި މަސައްކަތް ކުރާ މުވައްޒިފުންނަށް މުސާރަ ނުލިބުމުގެ ޝަކުވާ ލިބިފައިވާކަމަށެވެ.

ނ، ރ، ކ، ޏ، ހއ ،ބ، ފ، ދ ގެ ސިއްހީ މަރުކަޒުތަކުގެ މުވައްޒަފުންގެ މުސާރަ މިއަދާ ހަމައަށް ޖަމާނުވާކަން ފާހަގަ ކޮށްލަން. މުވައްޒަފުންގެ މުސާރަތައް ލަސްނުކޮށް އެފަރާތްތަކަށް ދިނުމަށް ގޮވާލަން. މިވަގުތަށް މައުލޫމާތު ސައްހަ ކުރެވިފައިވާ އަތޮޅުތައް.

– ޔޫނިއަނުން ބުނެފައިވެއެވެ. 

އާއްމު ގޮތެއްގައި ސަރުކާރު މުވައްޒަފުންގެ މުސާރަ އެންމެ ލަސްވެގެން މަހުގެ އެންމެ ފަހު ރަސްމީ ދުވަހު ޖަމާވެއެވެ. ނަމަވެސް ފަހަކަށް އައިސް ބައެއް އޮފީސްތަކުގެ މުވައްޒަފުންގެ މުސާރަ ޖަމާވުން ލަސްވަމުންދާ ކަމުގެ ޝަކުވާ މުވައްޒަފުން އަންނަނީ ކުރަމުންނެވެ.