ފިލިޕީންސްގެ ރައީސް ރޮޑްރިގޯ ޑުޓާޓޭ ސިޔާސީ ކަންކަމުން ދުރަށް ވަޑައިގެންނެވުމަށް ނިންމަވާފައިވާކަން އިއުލާން ކުރައްވައިފިއެވެ.

ޑުޓާޓޭ ސިޔާސީ ކަންކަންމުން ދުރަށް ވަޑައިގަންނަވާނޭކަން ހާމަ ކުރެއްވުމަކީ ބައެއް ފަރާތްތަކަށް ހައިރާންކަން ގެނުވި ޚަބަރަކަށް ވެގެންދިޔަ ނަމަވެސް، ގިނަ ބަޔަކު ގަބޫލުކުރަނީ، ޑުޓާޓޭގެ މިނިންމެވުމަކީ ފިލިޕީންސްގެ ކުރިޔަށް އޮތް ރިޔާސީ އިންތިޚާބުގައި އޭނާގެ އަންހެން ދަރިފުޅަށް ކުރިމަތިލުމުގެ ފުރުސަތު ފަހިކުރުމުގެ ގޮތުން ނިންމެވި ނިންމެވުމެއް ކަމުގައެވެ.

"ސިޔާސީ ކަންކަންމުން ދުރަށް ދާން ނިންމާފައިވާކަން އަހަރެން އިއުލާން ކުރަން،" މީގެކުރިން، އަމިއްލަފުޅު ޕާޓީގެ، ސިޔާސީ ކަންކަމުގައި ޑުޓާޓޭގެ އެންމެ ގާތް މިތުރު ކަމުގައިވާ އެގައުމުގެ ސެނެޓަރ ކްރިސްޓޮފަރ ބޮންގ ކުރިޔަށް އޮތް ރިޔާސީ އިންތިޚާބަށް ކުރިމަތިލައްވަން ކުރިން ނިންމެވިއިރު، އޭނާގެ ނާއިބު ރައީސަކަށް ވެވަޑައިގެންނެވުމަށްވެސް ނިންމެވި ޑުޓާޓޭ މިއަދު އިއުލާން ކުރައްވާފައި ވެއެވެ.

ކުރިޔަށް އޮތް ރިޔާސީ އިންތިޚާބުގައި ސެނެޓަރ ކްރިސްޓޮފަރ ބޮންގގެ ނައިބު ރައީސެއްގެ ހައިސިއްޔަތުން އޭނާ އާއިއެކު ވާދަ ކުރުމަށް ނިންމަވާ އަދި ނަންވެސް ޑުޓާޓޭ ރަޖިސްޓްރީ ކޮށްފައިވުމާއެކު، ގިނަބަޔަކު ހީކުރަމުންއައި އިންތިޚާބުގައި ޑުޓާޓޭ ނައިބު ރައީސެއްގެ ހައިސިއްތުން ވާދަ ކުރައްވާނޭ ކަމުގައެވެ.

ފިލިޕީންސްގެ ގާނޫނު އަސާސީ އޮތްގޮތުން، 6 އަހަރުގެ އެއްޓާމް ފުރިހަމަ ކުރުމާއެކު، ދެން އިތުރަަށް ފިޕިޕީންސްގެ ކުރިޔަށް އޮތް ދައުރަށް ވާދަކުރުމުގެ ފުރުސަތު ޑުޓާޓޭއަކަށް ލިބިގެނެއް ނުދާނެއެވެ.

މަސްރަހު ދިރާސާ ކުރާ ފަރާތްތަކުން މީގެ ކުރިންވެސް ވަނީ، ޑުޓާޓޭގެ އަންހެން ދަރިފުޅު ސާރާ ޑުޓާޓޭ ކާޕިއޯ އަށް ރިޔާސީ އިންތިޚާބުގައި ވާދަކުރުމުގެ ފުރުސަތު އެންމެ ފަހުވަގުތު ޑުޓާޓޭ ދެއްވާނޭ ކަމުގައި އަންދާޒާ ކޮށްފައެވެ.

ފިލިޕީންސްގެ ޑަވައޯގެ މޭޔަރުކަން އޭނާގެ ބައްޕަ ޑުޓާޓޭއަށްފަހު މިހާރު އަދާ ކުރައްވަމުން ގެންދަވާ ޑުޓާޓޭ ކާޕިއޯ މީގެކުރިން ވިދާޅުވެފައިވަނީ، އޭނާގެ ބައްޕައާއި އޭނާއާއި ދެބޭފުޅުން އެއް ޓިކެޓެއްގައި ވާދަ ނުކުރެއްވުމަށް ނިންމަވާފައިވާތީ، އަންނަ އަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ވާދަ ނުކުރެއްވުމަށް އޭނާ ނިންމަވާފައިވާ ކަމުގައެވެ.

ފިލިޕީންސްގެ ރިޔާސީ އިންތިޚާބު ބޭއްވުމަށް ހަމަޖެހިފައިވަނީ، އަންނަ އަހަރުގެ މޭމަހުއެވެ.

ޑުޓާޓޭގެ ވެރިކަމުގައި، ފިލިޕީންސްއިން ޑްރަގްގެ ވަބާ ނައްތާލުމަށް އޭނާ ގެންގުޅުއްވި ހަރުކަށި ސިޔާސަތުގެ ސަބަބުން ޑުޓާޓޭއަށް ވަނީ އެތައްބައެއްގެ ފާޑު ކިއުން އަމާޒުވެފައެވެ.

މިގޮތުން އޭނާ ކުރިޔަށް ގެންދެވި މި ކެމްޕޭނުގައި، އެއްވެސް ޝައީއަތަކާއި އަދި ތަހުގީގެއްވެސް ކުރުމެއްނެތި، އޭނާގެ އަމުރަށް ބަޑިޖަހާ ފިލިޕީންސްގެ އެތައްބަޔަކު މަރާލާފައިވާތީ، އިންސާނިއްޔަތާ ޚިލާފު ބޮޑެތި ޖަރީމާތަކެއް ހިންގުމުގެ ތުހުމަތު ބައިނަލް އަގުވާމީ ފަރާތްތަކުންވެސް ދަނީ އޭނާގެ މައްޗަށް ކުރަމުންނެވެ.