ނިމިދިޔަ އެމްޑީޕީގެ އެތެރޭގެ އިންތިޚާބުގައި ބަރުލަމާނީ ނިޒާމަށް ތާއީދުނުކޮށް، ގިނަ އެމްޑީޕީ މެމްބަރުން ރައީސް އިބްރާހިމް މުހައްމަދު ޞާލިހުގެ ފިކުރަށް ވޯޓު ދިންކަމީ ލިބުނު ވަރަށް ބޮޑު އުފަލެއް ކަމުގައި އެމްޑީޕީގެ ކުރީގެ ޗެއާ ޕާސަން މޫސާ މަނިކު ވިދާޅުވެއްޖެއެވެ.
އެމްޑީޕީގެ އެތެރޭގެ އިންތިޚާބު ކާމިޔާބުކުރީ ރައީސް ޞާލިޙަށް ތާޢިދުކުރައްވާ އެމަނިކުފާނުގެ ފެކްޝަންކަމަށް އިންތިޚާބުގެ ކަންކަން އޮބްޒާވްކުރި ފަރާތްތަކުން ދަނީ ބުނަމުންނެވެ. އެމްޑީޕީގެ އެތެރޭގެ އިންތިޚާބުގައި ވާދަކުރި ގިނަ ވަޒީރުންނާއި އަދި ކުންފުނިތަކުގެ އެމްޑީންވެސް ވަނީ ރައީސް ސާލިހުގެ ތާޢިދާއެކީ ގައުމީ މަޖިލިސް އިންތިޚާބު ކާމިޔާބު ކޮށްފައެވެ. މީގެ ތެރޭގައި، ރައީސް ސާލިހަށް ތާޢީދުކުރާ، މި ސަރުކާރުގެ 3 ވަޒީރަކުވެސް ވަނީ އިންތިޚާބު ކާމިޔާބު ކުރައްވާފައެވެ. މީގެތެރޭގައި މިހާރު ސަސްޕެންޝަންގައި ހުންނެވި ޔޫތު މިނިސްޓަރު އަހުމަދު މަހުލޫފު ހިމެނިވަޑައިގަންނަވައެވެ. އޭނާއަކީ، ކޮރަޕްޝަންގެ ތުހުމަތުގައި، އިންތިޚާބުގައި ވާދަކުރުމުގެ ފުރުސަތު އެމްޑީޕީން އެންމެ ފުރަތަމަ ގެއްލުވާލި ކެނޑިޑޭޓެކެވެ. އަދި ނަޝީދަށް ތާއީދުކުރާ ޕާޓީގެ އިސް ފަރާތްތަކުން، އޭނާގެ ކެނޑިޑެސީ ގެއްލުވާލުމަށް ގިނަ މަސައްކަތްތަކެއް ކޮށްފައިވާ ކެނޑިޑޭޓެއްވެސް މެއެވެ.
މޫސަ ވަނީ މިއިންތޚާބުގައި ރައީސް ނަޝީދަށް ތާއީދުކުރާ ގިނަ ކެނޑިޑޭޓުން ނުހޮވުނީތީ އުފާކުރާކަމަށް ވިދާޅުވެފައެވެ. އަދި ޚާއްސަކޮށް ބަރުލަމާނީ ނިޒާމު ގެނައުމަށް މަސައްކަތް ކުރާ ބޭފުޅުންނަށް ތާއީދުކުރާ މީހުންނަށް މިއިންތިޚާބުގައި ނޫނެކޭ ބުނިކަމީ އެމްޑީޕީ ސަލާމަތުގެ އައްސޭރިއަކަށް ގެންދިއުމަށް ކުރެވުނު މުހިންމު ކަމެއްގެ ގޮތުގައި މޫސަ ވަނީ ސިފަ ކުރައްވާފައެވެ.
އެތަށްބައެއްގެ ބުރަމަސައްކަތާ ޤުރުބާނީ، އެތަށް އަނިޔާއެއް ތަޙައްމަލުކޮށް އަނިޔާއިން މިންޖު ވެވޭތޯއަޑު އުފުލި ޚިދްމަތްތެރިން ބަދުނާމުކޮށް މަދުބަޔަކަށް ޕާޓީގެ ބޭތަލްމާލު ދީގެން ވެރިކަންކުރި ޒަމާން އިރާދަކުރެއްވިއްޔާ އެމްޑީޕީ އަށްމާޒީވީ؟ ޝުކުރިއްޔާ އެމްޑީޕީ ސަލާމަތް ކޮށްދޭން ވޯޓު ދެއްވިމެމްބަރުން.
– މޫސަ ވިދާޅުވިއެވެ.
އެމްޑީޕީގެ އެންމެ ބާރުގަދަ ގުނަވަން ކަމުގައިވާ ގައުމީ މަޖިލީހަށް ކުރިޔަށް އޮތް 5 އަހަރުގެ މުއްދަތަށް މެމްބަރުން އިންތިޚާބުކުރުމަށް ކުރިޔަށްގެންދިޔަ އިންތިޚާބުގައި 93,612 މެމްބަރުންނަށް ވޯޓުލެވެއެވެ. ވޯޓުލާން 47،100 މީހުން ނިކުމެފައިވާއިރު މިއީ ވޯޓުލާން ޖެހޭ މީހުންގެ ތެރެއިން 50.31 އިންސައްތަ މީހުންނެވެ.
އެމްޑީޕީން ހާމަކޮށްފައިވާ ވޯޓަރސް ލިސްޓަށް ބަލާއިރު މާލެ ސިޓީން ވޯޓުލެވޭކަމަށް އެޕާޓީން ހާމަކޮށްފައިވަނީ 13،084 މީހުންނަށެވެ. އެހެންނަމަވެސް އާންމުކޮށްފައިވާ ވަގުތީ ނަތީޖާއަށް ބަލާއިރު ވޯޓުލާފައިވަނީ 4097 މީހުންނެވެ. މާލެ ސިޓީގެ ރައީސްގެ ގޮނޑިއަކީ މިފަހަރުގެ އިންތިޚާބުގައި އެންމެ ވާދަވެރިކަން ބޮޑުވެގެން ދިޔަ އެއް ގޮނޑިއެވެ. އެޕާޓީގެ މެމްބަރުން އެންމެ ގިނަކަމަށް ބެލެވޭ ބޮޑެތި ތަންތަނަށް ބަލާއިރު އައްޑޫ ސިޓީގައި ވޯޓުލާން ނިކުމެފައިވަނީ 5353 މީހުންނެވެ. ކުޅުދުއްފުށި ސިޓީން ވޯޓުލާން ނިކުމެފައިވަނީ 549 މީހުންނެވެ. މީގެއިތުރުން ފުވައްމުލަކު ސިޓީން ވޯޓުލާން ނިކުމެފައިވަނީ 1472 މީހުންނެވެ.
