މޯލްޑިވްސް ނޭޝަނަލް ޕާޓީ (އެމްއެންޕީ) އުފެއްދުމަށް ބާއްވާ ޖަލްސާ އަންނަ އޮކްޓުބަރު 8 ގައި ބާއްވަން އެޕާޓީން ނިންމައިފިއެވެ.
ސިޔާސީ ތިންވަނަ ފިކުރެއް އުފަން ކުރުވުމަށް މަސައްކަތްކުރަމުންދާ މޯލްޑިވްސް ނޭޝަނަލް ޕާޓީ (އެމްއެންޕީ) އުފެއްދުމުގެ އާއްމު ޖަލްސާ ބާއްވަން އީސީން ހުއްދަ ދިނީ މިއަދުއެވެ.
އެކަމާއި ގުޅިގެން އެމްއެންޕީ އޮފީހުގައި ބޭއްވި ނޫސްވެރިންގެ ބައްދަލުވުމުގައި އެޕާޓީގެ އެއް މުއައްސިސް ޢަބްދުﷲ ރިޔާޒް ވިދާޅުވީ ޕާޓީގެ އުފެއްދުމުގެ ޖަލްސާ ކުރިޔަށް އޮތް އޮކްޓޯބަރ މަހުގެ 8 ވާ ހުކުރު ދުވަހު ޣިޔާސުއްދީން އިންޓަނޭޝަނަލް ސްކޫލްގެ ހޯލުގައި ބޭއްވުމުގެ އިންތިިޒާމްތައް ހަމަޖައްސަމުން އަންނަކަމަށެވެ. އެގޮތުން ބައްދަލުވުމުގެ ފުރަތަމަ ދަންފަޅި އެދުވަހުގެ މެންދުރު 2 އިން 6 ށް، އަދި ރޭގަނޑު 9 ން ފެށިގެން ރޭގަނޑު ދެވަނަ ދަންފަޅި ކުރިޔަށް ދާނެކަމަށް ޢަބްދުﷲ ރިޔާޒް ވިދާޅުވިއެވެ. އެބައްދަލުވުމުގައި ޕާޓީގެ ނަމާއި، ލޯގޯއާއި، ދިދަ އަދި ކުލަ ފާސްކުރުން އޮންނާނެއެވެ. އޭގެ އިތުރުން ޕާޓީގެ އަސާސީ ޤަވާޢިދާއި ޕާޓީގެ އިންޓެރިމް އެގްޒެކެޓިވް ކައުންސިލްގެ މަޤާމުތަކަށް މެންބަރުން އިންތިޚާބުކުރުންވެސް އޮންނާނެކަމަށްވެސް އޭނާ ވިދާޅުވިއެވެ.
އެމްއެންޕީ އުފެއްދުމަށް ބާއްވާ ޖަލްސާގައި އިންތިޚާބުކުރަންޖެހޭ އެޕާޓިގެ އިންޓެރިމް އެގްޒެކެޓިވް ކައުންސިލަށް ކުރިމަތިލުމުގެ ފުރުޞަތުވެސް މިއަދު ވަނީ ހުޅުވާލާފާއެވެ. އީީމެއިލް އަދި ވައިބަރގެ އިތުރުން އެމްއެންފީ އޮފީހަށް (ޖަޒީރާ ބިލްޑިންގ 8 ވަނަ ފަންގިފިލާ) ވަޑައިގެންވެސް ފޯމު ހުށަހެޅުމުގެ ފުރުޞަތު އޮންނާނެކަމަށް އެޕާޓިން ބުންޏެވެ. ފޯމު ހުށަހެޅުމުގެ ސުންގަޑިއަކީ އޮކްޓޯބަރ މަހުގެ ތިންވަނަ ދުވަހުގެ މެންދުރުފަހު 2:00 ކަމަށްވެސް އެމްއެންޕީން ބުންޏެވެ.
އެމްއެންޕީގެ ވަގުތީ އިންޓެރިމް އެގްޒެކެޓިވް ކައުންސިލަށް އިންތިޚާބުކުރުމަށް ހަމަޖެހިފައިވާ މަޤާމުތަކަކީ:
- ރައީސް
- 6 ނާއިބު ރައީސުން (އޭގެ 1 މަޤާމަކީ އަންހެން މެންބަރަކަށް ޚާއްޞަ މަޤާމު)
- އަންހެނުންގެ ވިންގގެ ލީޑަރު
- ޒުވާނުންގެ ވިންގގެ ލީޑަރު
- އިތުރު 21 ކައުންސިލް މެންބަރުން (އޭގެ ތެރެއިން 7 މަޤާމަކީ އަންހެނުންނަށް ޚާއްޞަ މަޤާމު)
އެމްއެންޕީ އުފެއްދުމުގައި އިސްކޮށް ތިއްބެވީ ރައްޔިތުންގެ މަޖިލީހުގެ ތިން މެންބަރުން ކަމަށްވާ ދަނގެތި ދާއިރާގެ މެންބަރު މުހައްމަދު ނާޒިމާއި، ތިމަރަފުށީ ދާއިރާގެ މެންބަރު އަބްދުﷲ ރިޔާޒްގެ އިތުރުން ވިލިމާލެ ދާއިރާގެ މެންބަރު އަހުމަދު އުޝާމްއެވެ. އެމްއެންޕީން ވަނީ މިއަހަރުގެ ނިޔަލަށް ޕާޓީ އަށް 10،000 މެންބަރުން ހަމަކުރަން އަމާޒެއްް ކަނޑައަޅާފަ އެވެ. އަދި ކުރިއަށް އޮތް ރިޔާސީ އިންތިހާބުގައި ވާދަކުރުމަށްޓަކައި އެމްއެންޕީން ރިޔާސީ ކެންޑިޑޭޓެއް ނެރޭނެ ކަމަށްވެސް އެ ޕާޓީން ވަނީ ބުނެފައެވެ.
ކޮމެންޓު ފޮނުވާ