އުކުޅަހު ބަޣާވާތުގެ މޭސްތިރިންފިޔަވައި މި ސަރުކާރު ގެންނަން މަސައްކަތްކުރި އެންމެންތިބީ މާޔޫސްވެފައި ކަމުގައި މިސަރުކާރުގެ ފުރަތަމަ ޓުވަރިޒަމް މިނިސްޓަރ އަލީ ވަހީދު ވިދާޅުވެއްޖެއެވެ.
މީގެ ތިން އަހަރު ކުރިން ބޭއްވި ރިޔާސީ އިންތިޚާބުގެ ނަތީޖާއިން ވެރިކަން ކާމިޔާބުރި ސަރުކާރަށް ވަރަށް ބޮޑަށް ފާޑުވިދާޅުވެ އަލީ ވަހީދު ކުރެއްވި ޓްވީޓެއްގައި ވިދާޅުވީ ރައްޔިތުންގެ ވޯޓުދިނީ ހެޔޮ ބަދަލަކަށް ކަމުގައެވެ. ނަމަވެސް މިއަދު އުކުޅަހު ބަޣާވާތުގައި ނުހިމެނޭ އެންމެން، ޚާއްސަކޮށް މިސަރުކާރު ވެރިކަމަށް ގެނައުމަށް މަސައްކަތްކުރި އެންމެތިބީ ވަރަށް ބޮޑަށް މާޔޫސް ވެފައިކަމަށެވެ.
މީގެ 3 އަހަރުކުރިން މިދުވަހު ރައްޔިތުން ވޯޓުލީ ނުހަނު އުންމީދުގަ ހެޔޮ ބަދަލަކަށް! އުކުޅަހު ބަޣާވާތުގެ މޭސްތިރިންފިޔަވައި މި ސަރުކާރު ގެންނަން މަސައްކަތްކުރި އެންމެންތިބީ މާޔޫސްވެފަ. ތަރައްޤީ ދިޔައީ ފަހަތަށް. އިންސާފު ދިޔައީ އެންމެ ލޯފާމަކަށް. އިރާދަފުޅުން މިކަން ބަދަލު ކުރާނަން.
– އަލީ ވަހީދު ވިދާޅުވިއެވެ.
ރައީސް އިބްރާޙީމް މުޙައްމަދު ޞޯލިޙު އިންތިޚާބު ކާމިޔާބުކުރައްވާފައިވަނީ ޕީޕީއެމްގެ ރިޔާސީ ކެންޑިޑޭޓް، އަދި އޭރުގެ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމާ ވާދަކުރައްވައެވެ. އިލެކްޝަންސް ކޮމިޝަނުން އާންމުކޮށްފައިވާ ވަގުތީ ނަތީޖާގައިވާގޮތުން، ރައީސް އިބްރާޙީމް މުޙައްމަދު ޞޯލިޙަށް ލިބިވަޑައިގެންފައި ވަނީ 134616 (އެއްލައްކަ ތިރީސް ހަތަރުހާސް ހަސަތޭކަ ސޯޅަ) ވޯޓެވެ. ޕީޕީއެމްގެ ރިޔާސީ ކެންޑިޑޭޓް، ރައީސް ޢަބްދުﷲ ޔާމީނަށް ލިބިވަޑައިގެންފައި ވަނީ 96132 (ނުވަދިހަ ހަހާސް އެއްސަތޭކަ ތިރީސް ދޭއް) ވޯޓެވެ.
އަލީ ވަހީދު ގެންދަވަނީ މިސަރުކާރަށް ވަރަށް ބޮޑަށް ފާޑުވިދާޅުވެ، ގިނަ ތުހުމަތުތަކެއްވެސް ކުރަމުންނެވެ. އަލީ ވަހީދަކީ ނިމިދިޔަ ރައީސް ޔާމީންގެ ވެރިކަން ބަދަލު ކުރުމަށް އެންމެ ބޮޑަށް މަސައްކަތް ކުރެއްވި އެއްބޭފުޅާއެވެ. މިވަގުތު އިނގިރޭސި ވިލާތުގައި ހުންނެވި އަލީ ވަހީދު ވިދާޅުވެފައިވަނީ އޭނާގެ މައްޗަށް ކުރާ ތުހުމަތުތަކަކީ ބަޔަކު އުފައްދާފައިވާ އަސްލެއްނެތް ތުހުމަތު ތަކެއްކަމަށެވެ.
