ޔޫއެން ޖެނެރަލް އެސެމްބްލީއަކީ އަބަދުވެސް އދ.ގެ އެންމެ މުހިންމު އެއް ގުވަނެވެ. ސަބަބަކީ އދ.ގެ އެކި ގުނަވަންތަކުގެ ތެރެއިން، އެ މަޖިއްޔާގެ ހުރިހާ ގައުމަކުން ތަމްސީލުކުރާ، އަދި ޖަމިއްޔާގެ ހުރިހާ ކަމެއްގެވެސް ސިޔާސަތު ކަނޑައަޅާ ގުނަވަނަކީވެސް މިއީ ކަމުގައި ވާތީއެވެ.

މިގޮތުން ހުރިހާ ކަމަކަށް މެމްބަރުން ގައުމުތަކުން ބަސްނުވެ، ދުނިޔޭގެ ބާރުގަދަ ގައުމެއް، ނިކަމެތި ގައުމެއް، ބޮޑު ގައުމެއް ކުޑަ ގައުމެެއް ތަފާތު ކުރުމެއް ނެތި، ދުނިޔޭގެ ކަންކަމުގައި ބަސްބުނުމުގެ ފުރުސަތު، ހުރިހާ ގައުމަކަށްވެސް މި މަޖިލިހުގައި ފުރުސަތު ލިބިގެން ދެއެވެ. އަދި ގިނަބަޔަކު ގަބޫލު ކުރާގޮތުގައި، ޔޫއެންގެ އޮނިގަޑު އެތުރިފައި އޮތް ގޮތުންވެސް، ގައުމުތަކުގެ މައްޗަށް، ވީޓޯގެ ބާރު ހިންގުމުގެ އިޚްުތިޔާރާއި ބާރު ލިބިދީފައި އޮންނަ 5 ގައުމެއް ޔޫއެންގެ ސެކިއުރީޓީ ކައުންސިލްގައި އޮވެމެ، އަދި އެކައުންސިލަށް ގިނަ ކަންކަމުގައި ފަހުބަސް އިއްވުމުގެ ބާރު ލިބިދީފައި އޮންނަ އޮތުމުގެ ހިންހަމަ ނުޖެހުން ދުނިޔޭގެ ގިނަ ގައުމުތަކުގެ މެދުގައި އޮތް ނަމަވެސް، ޔޫއެން އޭގެ ޒާތުގައި މުޅި ދުނިޔެއަށް މުހިންމު ޖަމްއިއްޔާއެގެ ގޮތުގައި މިއަދުވެސް ދެމި އޮންނަމުންދާ ދިއުމުގެ ހަގީގީ ސިއްރަކީވެސް އެ ޖަމްއިއްޔާގެ ޖެނެރަލް އެސެމްބްލީއެވެ.

އެހެންކަމުން، ދުނިޔޭގެ ގައުމުތަކަށް ފުޅާދާއިރާއެގައި ބަސް ބުނުމުގެ ފުރުސަތު ލިބިފައިވާ، ޔޫއެންގެ މިފަދަ މުހިންމު ގުނަވަނެއް މިއަދު ވެގެން މިދިޔައީ ދިވެހިރާއްޖެއަަށް ނުހަނު މުހިންމު މަޖިލީހަކަށެވެ. އަދި ހަމައެއާއެކު ދިވެހިރާއްޖެ މިއަދު ވެގެން މިދިޔައީ، ޔޫއެންގައި ހަމަހަމަ ކަމާއެކު، ބަސްބުނު ބުނުމާއި އަދި ގައުމުތައް ތަމްސީލުކުރުމުގެ ފުސަތު އެބީދައިން ލިބިގެން ދާދިއުމުގެ ފުރިހަމަ ރަމްޒަކަށެވެ.

ސަބަބަކީ، ޔޫއެންގެ ޖެނެރަލް އެސެމްބްލީގެ މިދައުރުގެ ރިޔާސަތުގައި ދިވެހިރާއްޖެ އިނުމެވެ. އަދި އެ ރިޔާސަތުގައި ފަޚުރުވެރި ދިވަހިބަހުން ވާހަކަދައްކާ، ދިވެހިރާއްޖެ ބައިނަލްއަގުވާމީ މައިދާނުގައި މުޅިން އާއުސްމިނަކަށް ދަތުރު ކުރުމުގެ ފުރުސަތު މިއަދު ލިބިގެން ގޮސްފައިވާ ވާވުމެވެ.

ރައީސްގެ ތަގުރީރު ދިވެހި ބަހުން!

ދިވެހިރާއްޖޭގެ ފޮރިންގމިނިސްޓަރ އަބުދުﷲ ޝާހިދު ރިޔާސަތު ބަލަހައްޓަވާ މިދައުރުގެ އާންމު މަޖުލިހުގެ މަތީ-ފަންތީގެ އެއްވުމުގައި ގަމުތަކުގެ ވެރީން މިހާރު ތަގުރީރު ކުރައްވަމުން ގެންދަވާއިރު، މި އެއްވުން ދިވެހިރާއްޖެއަށް ޚާއްސަވެގެންދިޔަ، އަދި ގިނަ ދިވެހިންނެއްގެ ސަމާލުކަން މި އެއްވުމަށް ހުއްޓިގެންދިޔަ މުހިންމު ދެ ސަބަބެއް އެބަ އޮތެވެ.

އެއީ ރިޔާސަތުގައި ދިވެހިރާއްޖޭގެ ފޮރިންގ މިނިސްޓަރ އިންނަވާ، ރިޔާސަތުން ދިވެހިބަހުން މުޚާތަބު ކުރެއްވުމާއި، ރައީސް އިބުރާހިމް މުހައްމަދު ސާލިހު މި އެއްވުމުގައި ދިވެހިބަހުން ތަގުރީރު ކުރެއްވުމެވެ.

އެހެންނަމަވެސް ފާހަގަ ކޮށްލަންޖެހޭ ކަމަކީ، މިއީ މިމަޖިލިހުގައި ދިވެހިރާއްޖޭގެ ވެރިއަކު މަށް-ދިވެހިބަހުން ތަގުރީރު ކުރެއްވި ފުރަތަމަ ފަހަރު ނޫންކަމެވެ.

ޔޫއެންގެ އާންމު މަޖިލިހުގައި އެންމެ ފުރަތަމަ ދިވެހިބަހުން ތަގުރީރު ކުރައްވާފައިވަނީ، ރައީސް މައުމޫން އެވެ. އޭގެފަހުންވެސް މި މަޖިލިހުގައި ދިވެހި ސަރުކާރު ތަމްސީލުކުރައްވަމުން ދިވެހި ބަހުން ބޭފުޅަކު ތަގުރީރު ކުރައްވާފައިވާއިރު، މިއީ އާންމު މަޖިލިހުގައި ދިވެހި ގައުމު ތަމްސީލުކުރެއްވި ބޭފުޅަކު ދިވެހި ބަހުން ވާހަކަ ދެއްކެވި 3 ވަނަ ފަހަރެވެ.

އެހެންނަމަވެސް، އެހެންފަހަރުތަކާއި، މިފަހަރު ދިވެހިބަހުން ރައީސް ސާލިހު ތަގުރީރު ކުރެއްވި ކުރެއްވުން ތަފާތުވެގެން ދިޔަ ސަބަބަކި، އާންމު މަޖިލިހުގެ ރިޔާސަތުގައި ރާއްޖޭގެ ފޮރިންގ މިނިސްޓަރ ޝާހިދު އިންނަވާފައި، ރައީސް ސާލިހަށް ޕޯޑިއަމަށް ވަޑައިގަތުމަށްވެސް ދިވެހި ބަހުން ދައުއވަތު ދެއްވުމާއި، އަދި ރިޔާސަތުން ރަސްމީކޮށް، ރައީސް ސާލިހުގެ ތަގުރީރާ ގުޅިގެން ކުރެއްވި ހުރިހާ މުޢާމަލާތެއްވެސް ދިވެހި ބަހުން ކުރެއްވި ކުރެއްވުމެވެ.

ގައުމީ ގިނަ ކަންކަމުގައި، އެއްބައިވަންތަ ކަން ދައްކަވާ ގިނަ ދެވެހިންނަށް މިކަން ފާހަގަވެގެންދިޔައީ ބައިނަލް އަގުވާމީ މައިދާނުގައި ދިވެހިރާއްޖެއަށް ލިބިގެންދިތަ ވަރަށްބޮޑު ފަޚުރެއްގެ ގޮތުގައެވެ.

ރައީސްގެ ތަގުރީރުގައި މައިގަޑު 4 އަމާޒެއް!

ރައީސް ސާލިހު ޔޫއެން ޖެނެރަލް އެސެމްބްލީގައި ދިވެހި ބަހުން ފުރަތަމަ ކުރެއްވި ތަގުރީރުގައިވަނީ ބައިނަލް އަގުވާމީ މަސްރަހުގައި ދިވެހިރާއްޖެއަށް މުހިންމު މައިގަޑު 4 އަމާޒަކަށް އަލި އަޅުވާލައްވާފައެވެ.

މީގެރޭގައި ހިމެނިގެން ދިޔައީ، ކޯވިޑްގެ އާލަމީ ވަބާއާއި، ތިމާވެށީގެ މައްސަލަތަކުގައި ދިވެހިރާއްޖޭގެ ފަރާތުން ކުރި ކަންބޮޑުވުންތަކާއި، ޓެރަރިޒަމްގެ ނުރައްކާތެރިކަން ދިވެހިރާއްޖެއަށް ވެރިވެފައި އޮތް އޮތުމުގެ ނުރައްކާތެރިކަމާއި، އަދި މީގެ އިތުރުން ފަލަސްތީނުގެ މިނިވަންކަމަށް ރައީސް ސާލިހު ގޮވާލެއްވި ގޮވާލެއްވުމެވެ.

މީގެތެރެއިންވެސް ގިނަ ބައެއްގެ އަމާޒު ހުއްޓިގެން ދިޔައީ ވަރަށް ފާޅުކަން ބޮޑުގޮތެއްގައި އިސްރާއީލުން ފަލަސްތީނުގެ ބިންތައް ހިފާއިގެން ތިބެ، ފަލަސްތީނު ރައްޔިތުންގެ މިނިވަންކަން ނަގާލާ، ދެމުންދާ ލާއިންސާނީ އަނިތާތައް ކުށްވެރިކޮށް، ފަލަސްތީނުގެ މިނިވަންކަން ބަލައިގަތުމަށް ދުނިޔެއަށް ރައީސް ސާލިހު ގޮވާލެއްވި ގޮވާލެއްވުމެވެ.

މިގޮތުން އާންމު މަޖިލިހުގައި، ފަލަސްތީނުގެ މައްސަލައަށް އަލި އަޅުއްވާލައްވަމުން ރައީސް ވިދާޅުވީ، އަދުގެ ހޭލުންތެރި ޒުވާން ޖީލުގެ އެތައްބަޔަކު އެތައް ޤައުމަކުން ފަލަސްތީނުގެ ހައްޤުގާ އެނުކުންނަނީ ބޭއިންސާފާ ލާއިންސާނިއްޔަތަށް ނޫނެކޭ ބުނަމުންކަމަށާއި، އދ.ގެ ޢާންމު މަޖިލީހާ ސެކިއުރިޓީ ކައުންސިލުން ފަލަސްތީނުގެ ހައްޤުގާ ނެރުނު ޤަރާރުތަކާ ނިންމުނު ނިންމުންތައް ގިނަ ކަމުގައެވެ.

މަދު އެއްޗަކީ، ޢަމުދުން ނުވެސް ނެތް އެއްޗަކީ ފަލަސްތީނުގެ ހައްގު.

– ރައީސް ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، ކުޑަ ދައުލަތެއް ތަމްސީލު ކުރާ މީހެއްގެ ހައިސިއްޔަތުން މިއަދު އާންމު މަޖިލިހުގެ ޕޯޑިއަމުގައި ހުރެ މިވާހަކަ އެމަނިކުފާނު ދައްކަވަންޖެހޭ ސަބަބެއް އެބައޮތްކަމަށާއި، އެއީ ދުނިޔެއިން ދިވެހިރާއްޖެ ބަލައިގެންފާވާތީ ކަމުގައެވެ.

އެހެންކަމުން ދުނިޔެއިން ރާއްޖެ ފަދަ ކުޑަ ގައުމެއް ބަލައިގެންފައިވާއިރު، މިލިއަނުން އަދަދު މަތި ފަލަސްތީނުގެ ރައްޔިތުން ބަލައިގަތުމުން ދުނިޔެއަށް އުނިވާ އެއްޗަކީ ކޮބައިތޯ ރައީސްވަނި، އާންމު މަޖިލިހުގެ މެމްބަރު ގައުމުތަކާ ސުވާލު ކުރައްވާފައެވެ.

އަދި ފާޅުކަން ބޮޑު ގޮތެއްގައި، ފަލަސްތީނުގެ ހައްގުގައި ބަސް ވިދާޅުވެ، އދ.ގެ އެތައް އަހަރެއްގެ މަސައްކަތުންވެސް ފަލަސްތީނުގެ ރައްޔިތުންގެ ހައްޤުތައްވަނީ ކަށަވަރުކޮށް ދެވިފައި ނުވާއިރު، އިސްރާއީލުން ފަލަސްތީނުގެ އަންހެން، ފިރިހެން، ކުދިބޮޑު އެތައް ބައެއްގެ ހައްޤު ތަކުރާރުކޮށް ނިގުޅައިގަންނަމުން ދާކަމުގައިވެސް މި އެއްވުމުގައި ތަގުރީރު ކުރައްވަމުން ރައީސް ސާލިހު ވިދާޅުވެފައި ވެއެވެ.

ކޯވިޑް، ތިމާވެށި، ޓެރަރިޒަމް!

ފަލަސްތީނުގެ މިނިވަންކަމަށް ދިވެހިރާއްޖެއިން މިއެއްވުމުގައި ގޮވާލި ގޮވާލުމުގެ އިތުރުން ރައީސް ސާލިހު އަލި އަޅުއްވާލެއްވި އިތުރި މުހިންމު ބައިނަލް އަގުވާމީ މައްސަލަތަކުގެ ތެރޭގައި ހިމެނިގެން ދިޔައީ، ދިވެހިރާއްޖެއަށްވެސް އެންމެ މުހިންމު ބައެއ ބޮޑެތި މައްސަލަތަކެވެ.

މިގެތެރޭގައި ހިމެނިގެން ދިޔައީ، ކޯވިޑް އާލަމީ ވަބާއިން އަރައިގަނެވެމުން ދާއިރު، ދިވެހިރާއްޖޭގެ ބޯޑަރުތައް ހުޅުވާލާ، އިގުތިސާދު އަލުން ނަގާ ކޮޅަށް ޖެހުމަށްޓަކާ، ރާއްޖެއަށް ނުހަނު ބޭނުންވެފައިވާ، ފަތުރުވެރިކަމުގެ ސިނާއަތަށް ކުރިއެރުން ގެނުވުމަށް ދުނިޔެއަށް ދެއްވި މެސެޖްގެ އިތުރުން، ރާއްޖެއަށް ކުރިމަތި ވެގެން ގޮސްފައިވާ ތިމާވެށީގެ މައްލަތައް ދުނިޔޭގެ ސަމާލުކަމަށް ގެނައުމުގެ އިތުރުން، މިހާރު ރާއްޖެއަށް ކުރިމަތިވެގެން ގޮސްފައިވާ ޓެރަރިޒަމްގެ ނުރައްކާތެރިކަމާއި ގޮންޖެހުންތަކުގެ ވާހަކަތަކެވެ.

މިގޮތުން، ކޯވިޑްގެ އާލަމީ ވަބާގައި ދިވެހިރާއްޖެ ކުރި ތަޖުރިބާތަކުގެ ވާހަކަތަކުގެ ތަފްސީލުތަކަށް ވަޑައިގެންނެވުމަށްފަހު، ރައީސް ސާލިހުވަނީ، ފަތުރުވެރިން ރާއްޖެއަށް ޒިޔާރަތް ކުރުމުގައި އެއްވެސް ހުރަހެއް، އަދި ނުރައްކަލެއްވެސް ނެތްކަން ދުނިޔެއަށް ހާމަކޮށް ދެއްވުމުގެ ގޮތުން، "ސަނީ ސައިޑަށް" ވަޑައިގަތުމަށް ދުނިޔޭގެ ގައުމުތަކުގެ ރައްޔިތުނަށް ހުޅުވާލެވިފައިވާ ދައުވަތެއްވެސް ދެއްވާފައެވެ.

ރާއްޖެއޮތީ ދުނިޔެއަށް މަރުހަބާ ކިއުމަށް ޒީނަތްވެ ތައްޔާރަށް. ސަނީސައިޑަށް އިރު އަރައިފި. ވަޑައިގަންނަވާ.

– ރައީސް ސާލިހު ވިދާޅުވެފައި ވެއެވެ.

ތިމާވެށި

މީގެ އިތުރުންވެސް، ދިވެހިރާއްޖެއަށާއި އަދި މުޅި ދުނިޔެއަށްވެސް ކުރިމަތިވެފައިވާ ތިމާވެށީގެ ބޮޑެތި އަދި މުހިންމު މައްސަލަތަކަށް ރައީސް ސާލިހުވަނީ އަލި އަޅުއްވާލައްވާފައެވެ.

މިގޮތުން ދުނިޔެ ހޫނުވުން 1.5 ޑިގްރީ ސެލްސިއަސްގައި ހިފެހެއްޓުމަށްޓަކާ މިހާރު ޖައްވަށް ބޭރުކުރާ ގަނދަބުޅީގެ މިންވަރު 2030 އާ ހަމައަށް 45 އިންސައްތަ ދަށްކުރަންޖެހޭ ކަމަށް ވިދާޅުވަމުން، މިއަމާޒަށް ވާޞިލުވެވޭނީ 2050 ގެ ނިޔަލަށް މުޅި ދުނިޔެ ނެޓްޒީރޯ ހާޞިލުކޮށްގެން ކަމުގައި ރައީސް ސާލިހު ވިދާޅުވެފައިވެއެވެ.

އަދި 1.5 ޑިގްރީ ސެލްސިއަސް އާއި 2 ޑިގްރީ ސެލްސިއަސްގެ ތަފާތަކީ މަރުގެ ހުކުމެއް އައުމާ ނައުމާ ދެމެދުހުރި ފަރަގު ކަމުގައި ވިދާޅުވަމުން، ކުދި ޖަޒީރާތައް ނެތި ދަނީ މިއަދު އައި ތިމާވެށީގެ ސަބަބަކުން ކަމުގަވާނަމަ، ބޮޑެތި ބައްރުތަކުގެ ފަހަތުން ހަމަ އެ ސަބަބު މާދަމާ އަންނާނެ ކަމަށް ވިދާޅުވެ، ތިމާވެށީގެ މައްސަލަތަކާ ގުޅިގެން ރައީސް ސާލިހުވަނީ ދުނިޔޭގެ ގައުމުތަކަށް އިންޒާރުވެސް ދެއްވާފައެވެ.

ދިވެއްސަކަށް ދިރިނޫޅެވި – ދިވެހިރާއްޖެއަށް ދެމިނޯވެވުނު ދުނިޔެއަކު އެހެން ޤައުމަކަށް ވަކި އޮވެވޭނެ ކަމުގެ ޔަޤީންކަމެއް ނޯންނާނެ.

ރައީސް ސާލިހު ވިދާޅުވެފައި އެވެ.

އަދި މި މޭރުމުން ވާހަކަ ދައްކަވަމުން، މިހަގީގަތްތައް ކިޔައިދީފައިވާ މާސާފު ސާދާ މަޢުސޫމް ކަރުދާސް ތަކެއް އެމަނިކްފާނުގެ އަތްޕުޅުގައި އެބަހުރިކަމަށް ވިދާޅުވެ، ރައީސް ސާލިހުވަނީ، ޕޯޑިއަމްގައި ހުންނަވާ، އެމަނިކްފާނުގެ އަތްޕުޅުގައި ހުރި، ދިވެހި ތުއްތު ކުދިން އެމަނިކްފާނަށް ލިޔުއްވާފައިވާ ސިޓީތައް ނަންގަވާ ދައްކަވާ ލައްވާފައެވެ.

ޓެރަރިޒަމް

ދިވެހިބަހުން، އާންމު މަޖިލިހުގައި ރައީސް ސާލިހު ދެއްވި މިތަގުރީރުގައި، ރާއްޖެއަށް ކުރިމަތިވެފައިވާ މައްސަލަތަކުގެ ތެރެއިން ރާއްޖެއަށް ކުރިމަތިވެފައިވާ އެންމެ ބޮޑު އެއް ގޮންޖެހުމުގެ ގޮތުގައި ރައީސް ސާލިހު ފާހަގަ ކުރައްވާފައިވަނީ، ރާއްޖޭގެ ހަފޮޅުންވެސް އެތެރެވެފައިވާ ޓެރަރިޒަމް ނުރައްކާތެރި ވަބާއެވެ.

މިގޮތުން ރައީސް ސާލިހު ވިދާޅުވެފައިވަނީ، ދުނިޔެއަށް ދިމާވެފައިވާ އެންމެ ބޮޑެތި ނުރައްކާތަކާ ގޮންޖެހުމުގެ ވާހަކަތަކުން ފަށާނަމަ ލިސްޓްގެ އެންމެ ކުރި ހޯދަނީ ޓެރަރިޒަމް ކަމުގައެވެ. އަދި ވިދާޅުވީ ހުރިހާ މާނައެއްގާ އަދި ހުރިހާ ސިފައެއްގައިވެސް ދިވެހިރާއްޖެއިން ޓެރަރިޒަމް ކުށްވެރިކުރާ ކަމުގައެވެ.

މީގެ އިތުރުންވެސް، ވިދާޅުވީ ދިވެހިރާއްޖެއަކީ، ފެށުނީއްސުރެ މެދުމިނުގެ ދީނީ އަޤީދާ ޤަބޫލްކުރާ ޤައުމެއް ކަމަށާއި، އެހެންނަމަވެސް، ހަރުކަށި ފިކުރުން މި ކުޑަކުޑަ ރާއްޖެވެސް ސަލާމަތެއް ނުވެވުނު ކަމުގައެވެ.

މިއަހަރުގެ މޭ މަހުގެ 6 ވަނަ ދުވަހު ރައްޔިތުންގެ މަޖިލީހުގެ ރައީސް މުހައްމަދު ނަޝީދު ދުކޮށްލަން ދިން ހަމަލާއަކީ ދިވެހި ބިމުގާ ދެވުނު ބޮޑު، ނުރައްކާތެރި ޓެރަރިސްޓް ހަމަލާއެއް. މިފަދަ ހަމަލާ ދޭތަން ބަލަން، އަދި ޅަކުދިންގެ ސިކުނޑިތަކުގާ ހަރުކަށި ފިކުރު އަށަގަންނުވާތަން ދެކެން އަޅުގަނޑުމެނެއް ނުތިބޭނަން.

– ރާއްޖެއަށް ޓެރަރިޒަމް ނުރައްކާތެރިކަން ވެރިވެފައި އޮތް މިންވަރު ބަޔާން ކޮށްދެއްވަމުން މި އެއްވުމުގައި ގައުމުތަކުގެ ވެރިންނާ މުޚާތަބްކޮށް ވާހަކަ ދައްކަވަމުން ރައީސް ސާލިހު ވިދާޅުވެފައި ވެއެވެ.

އަދި މިތަގުރީރުގައި ރައީސް ވަނީ، ބައިނަލްއަޤްވާމީ މުޖުތަމަޢުއާއެކު ފުރިހަމައަށް އެއްބާރުލުންދީގެން ޓެރަރިޒަމްގެ ނުރައްކަލުން ސަލާމަތްވުމަށް ކުރެވެމުންދާ މަސައްކަތުގައި ރާއްޖެ ދެމި އޮންނާނޭކަމުގެ ޔަޤީންކަން ދުނިޔޭގެ ގައުމުތަކަށް ދެއްވާފައެވެ.

 

ރިޔާތުގައި އަބުދުﷲ ޝާހިދު، ރާއްޖެއިން ކުރިމަގަށް ކުރާ އުއްމީދު!

ޔޫއެންގެ ޖެނެރަލް އެސެމްބްލީގެ ކުރިޔަށް އޮތް 76 ވަނަ ދައުރުގެ ރިޔާސަތަށް ފޮރިންގ މިނިސްޓަރު އަބުދުﷲ ޝާހިދު އިންތިޚާބުކުރުމަށް ކުރަންޖެހޭ ކެމްޕޭނަށް ޚަރަދު ކުރުމަށް މިއަހަރުގެ ބަޖެޓުގައި ސަރުކާރުން ވަނީ 4.35 މިލިއަން ރުފިޔާ ހިމަނުއްވާފައެވެ.

އަދި، ރިޔާސަތު ކާމިޔާބު ކުރުމަށް، ރާއްޖޭއިން ބޭރުގައި ހުރި، ރާއްޖޭގެ މިޝަންތަކުން ޚާއްސަ ސަމާލުކަމެއް ދީގެން އަހަރެއްހާ ދުވަހުގެ ބޮޑު ކެމްޕޭނެ ކުރިޔަށް ގެންގޮސްފައިވެއެވެ. އަދި ހަމައެއާއެކު، މިމަގާމަށް ކެމްޕޭން ކުރުމަށްޓަކާ، ކެމްޕޭނުގެ އެންމެފަހު ދުވަސްކޮޅު، ދެމަހެއްހާ ދުވަސްވަންދެން، ޚުދު ޝާހިދު އަމިއްލަފުޅަށް ނިއުުޔޯކަށް ވަޑައިގެން، ނިއުޔޯކުގައި ހުންނަވާފައިވެއެވެ.

މި ގޮތުން، ޔޫއެން ޖެނެރަލް އެސެމްބްލީގެ ރިޔާސަތު ރާއްޖެއިން ކާމިޔާބު ކުރުމަށް ސަރުކާރުން ކުރި ހޭދަތަކަށާއި އަދި ޝާހިދު ކުރެއްވި ކެމްޕޭނަށް އިދިކޮޅު ފަރާތްތަކުގެ ވަރަށް ބޮޑު ފާޑުކިއުމެއް އަމާޒުވެގެން ދިޔަކަން ފާހަގަ ކޮށްލެވެއެވެ. އިދިކޮޅު ފަރާތްތަކުގެ ފާޑުކިއުން ބޮޑަށް އަމާޒުވެގެން ގޮސްފައިވަނީ، ކޯވިޑް ކާރިސާގެ ތެރޭގައި ގައުމު އޮށްވާ، މިފަދަ ކެމްޕޭނަކަށް ކުރަންޖެހުނު ހޭދައާއި އަދި ފޮރިންގ މިނިސްޓަރ ރާއްޖެއިން ބޭރަށް ކުރެއްވި ގިނަ ދަތުރުތަކުން ރާއްޖެއަށް، މި ހޭދަތަކާ އެއްވަރުގެ ބަދަލެއް ނުވަތަ އިގްތިސާދީ ފައިދާއެއް ނުލިބޭނެކަމަށް ބުނެއެވެ.

އެހެންނަމަވެސް، އިދިކޮޅު ފަރާތްތަކުގެ ޝަކުވާތައް މިބީދައިން ހުރި ކަމުގައިވިނަމަވެސް، ގަބޫލުކުރަންޖެހޭ ހަގީގަތަކީ، ރާއްޖެފަދަ ކުޑަ ގައުމަކުން، ބައިނަލްއަގުވާމީ ދުނިޔޭގައި މިފަދަ މުހިންމު މަގާމެއް އަދާކުރުމަކީ ރާއްޖެއަަށް ލިބިގެންދާނެ ފަޚުރަކާއި ޝަރަފެއްކަމެވެ. އެކަން 76ވަނަ މަޖިލިހުގެ ރިޔާސަތުގައި ޝާހިދު އިންނަވާ، ރައްޖޭގެ ރައީސުލްޖުމްހޫރިއްޔާ ދެއްވި ތަގުރީރުންވެސް ވަރަށް ރަގަޅަށް ތަމްސީލުވެގެން ދިޔައެވެ.

މީގެ އިތުރުންވެސް، ފޮރިންގ މިނިސްޓަރ ޝާހިދު، އާންމު މަޖިލީހުގެ ރިޔާސަތުގައި ހޭދަކުރައްވާ މުއްދަތުގައި، ރާއްޖެއަށް، ތިމާވެށީގެ ފޯރަމްތަކުގައި، މިހާރަށްވުރެސް ބޮޑަށް ތަމްސީލުކުރުމުގެ ފުރުސަތު ލިބިގެން ދިއުމާއި، ރާއްޖެއަށް އިގްތިސާދީގޮތުން އިތުރު ފުރުސަތުތައް ފަހިވެގެން ދިއުންފަދަ، އެތައް އުއްމީދެއް މިއަދުވަނީ ޝާހިދުގެ ރިޔާސަތާއި ގުޅިލާމެހިގެން ގޮސްފައެވެ.

އެހެންކަމުން، އދގެ ޖެނެރަލް އެސެމްބްލީގެ ރިޔާސަތުގައި ޝާހިދު ހޭދަކުރައްވާ 1 އަހަރުދުވަހުގެ މުއްދަތުގައި، ދައުލަތުން މިމަގާމު ކާމިޔާބު ކުރުމަށް ކުރި ހޭދައާއި މަސައްކަތަކީ، ރަގަޅު އިންވެސްޓަކަށް ވެގެންދާނެ ކަމުގެ އުއްމީދުގައި ދިވެހި ސަރުކާރުންވެސް އަދި، އެނޫން ގިނަބަޔަކުވެސް މިތިބީ ޝައުގުވެރިކަމާއެކު ބަލާށެވެ.