ފިލިޕީންސްގެ މިހާރުގެ ރައީސް، ރޮޑްރިގޯ ޑުޓާޓޭ، ފާއިތުވެގެންދާ އޭނާގެ ވެރިކަމުގެ ދައުރުގައި ކުރިޔަށް ގެންދިޔަ، "ޑްރަގާ ދެކޮޅު ހަގުރާމާ"ގައި ހިންގާފައިވާ ކަމަށް ތުހުމަތު ކުރެވޭ އިންސާނިއްޔަތާ ޚިލާފް ޖަރީމާތައް ބެލުމަށް، ބައިނަލް އަގުވާމީ ޖިނާއީ ކޯޓުގެ (ICC) ފަނޑިޔާރުން ތާއީދު ކޮށްފިއެވެ.
ބައިނަލްއަގުވާމީ ޖިނާއީ ކޯޓުން ނެރުނު ބަޔާނެއްގައި ބުނެފައިވަނީ، އެ ކޯޓުގެ ފަނޑިޔާރުން ވަނީ، ޕްރޮސެކިއުޓަރުން އެދިފައިވާ މި ތަހުގީގު ކުރިޔަށް ގެންދިއުމުގައި އެއްވެސް ހުރަހެއް ނެތްކަމަށް ނިންމާފައެވެ.
މިގޮތުން، ޕްރޮސެކިއުޓަރުން ހުށަހަޅާފައިވާ ކިތާބީ ހެކިތައް ދިރާސާ ކުރުމަށްފަހު ކޯޓުގެ ފަނޑިޔާރުން ބުނެފައިވަނީ، "ޑްރަގާ ދެކޮޅު ހަނގުރާމައިގެ ނަމުގައި ބުނެ ކުރިޔަށް ގެންދާ އޮޕަރޭޝަންއަކީ، ގާނޫނީ އެއްވެސް ހުއްޖަތެއް އޮތް، ސަލާމަތީ ފަރާތްތަކުގެ އޮޕަރޭޝަނެއް"ގެ ގޮތުގައި ބެލެވެން ނެތް ކަމަށާއި، އޭގެ ބަދަލުގައި މިއޮޕަރޭޝަން ބެލެވެނީ، ސިސްޓަމެޓިކްކޮށް އާންމު ރައްޔިތުންނަށް ހަލަމާތައް ދިނުމަށް ކުރިޔަށް ގެންދާ އޮޕަރޭޝަނެއްގެ ގޮތުގައެވެ.
ފިލިޕީންސްގެ ރައީސް ޑުޓާޓޭވަނީ، 2016ވަނަ އަހަރު އޭނާ ވެރިކަމަށް އައުމާއެކު، ޑްރަގާ ދެކޮޅަށް ހަގުރާމަ އިއުލާން ކުރައްވާފައެވެ. އަދި އޭނާ ހަގުރާމަ ކުރިޔަށް ގެންދިޔަ ގޮތުން، އޭގެފަހު މިހަގުރާމައަށް އެތައް ބައެއްގެ ފާޑިކުޔުން އަމާޒުވެގެން ދިޔައިރު، މި އޮޕަރޭޝަންގައި ފުލުހުން ވަނީ 6،600 މީހުން ބަޑިޖަހާ މަރާލާފަައެވެ. އެހެންނަމަވެސް، މިނިވަން މޮނިޓަރުން ފާހަގަ ކުރާ ގޮތުގައި މީގެ އަސްލު އަދަދު މިއަށްވުރެއް އެތައް ގުނައެއް މަތިވާނެއެވެ.
މީގެ ތެރޭގައި ކުޑަކުންދިންނާއި، މަސްތުވާތަކެތީގެ ބޭނުން ކުރާ ފަރާތްތަކާއި، އަދި އެއްވެސް ޝަރީއަތަކާ ނުލާ މަރާލެވިފައިވާ ބޮޑެތި ކުށްތަކުގައި ތުހުމަތު ކުރެވޭ ފިލިޕީންސްގެ ރައްޔިތުންވެސް ހިމެނެއެވެ.
ފިލިޕީންސްގައި، އެއްވެސް ޝަރީއަތެއް ކުރުމަކާ ނުލާ މީހުން މެރުމާއި، އަދި އޯޑަރަށް މީހުން މަރަމުންދާ ކަމަށް ކުރެވޭ ތުހުމަތަށް ފުލުހުން އިންކާރު ކުރާއިރު، ޑުޓާޓޭ ވިދާޅުވެފައި ވަނީ، ފުލުހުންނަށް މީހަކު މެރުން ހުއްދަ ކުރެވިފައިވަނީ އަމިއްލަ ދިފާހުގައި ދޭންޖެހޭ ހަމަލާއެގައި އެކަނި ކަމުގައެވެ.
މިއަހަރު ޖުލައިމަހު، ޑްރަގާ ދެކޮޅަށް އޭނާ ކުރިޔަށް ގެންދަވާ ހަގުރާމައަށް ހުއްޓުމެއް ނުގެނެސް ކުރިޔަށް ގެންދަވާނެކަމަށް ވިދާޅުވަމުން، ޑުޓާޓޭ ވަނީ ބައިނަލް އަގުވާމީ ޖިނާޢީ ކޯޓަށް ވަރަށް ބޮޑަށް ފާޑު ވިދާޅުވެފައެވެ. "އަހަރެން ދުވަހަކުވެސް އެވާހަކަ ދޮގުކޮށްފައެއް ނޯންނާނެ، އަދި ICC ރަގަޅުވާނީ އެކަމުގެ ރެކޯޑް އެމީހުންގެ އަތުގައި ބެހެއްޓިއްޔާ– އަހަރެންގެ ގައުމު ހަލާކު ކުރާ ފަރާތްތައް، އަހަރެން މަރާނަން،" ޑުޓާޓޭ ވިދާޅުވެފައި ވެއެވެ.
ފިލިޕީންސްއިން ފަހުން ICCގެ މެމްބަރުކަމުން ވަކިވެފައިވި ނަމަވެސް، 2016ވަނަ އަހަރުގެ ޖުލައި މަހުން ފެށިގެން 2019ވަނަ އަހަރުގެ މާރޗް މަހުގެ ނިޔަލަށް އެގައުމަކީ މި ކޯޓުގެ މެމްބަރެއް ކަމަށް ވުމާއެެކު، މި މުއްދަތުގައި ފިލިޕީންސްގައި ހިނގާފައިވާ އިންސާނިއްޔަތާ ޚިލާފު ޖަރީމާތައް ބެލުމުގެ އިހިތިސާސް މި ކޯޓަށް ލިބިގެން ވެއެވެ.
