ކުރީގެ ރައީސް ޔާމިންގެ ސަރުކާރުން ހަދާފައިވާ ހިޔާ ފްލެޓްތަކުގެ ފިނިޝިންގެ މަސައްކަތްތައްވެސް ގިނަ ފްލެޓްތަކުގައި މިހާރު ނިމި، ގިނަ އާއިލާތަކެއް ފްލެޓްތަަކަށް ހިޖުރަ ކުރަން ފަށާފައިވާއިރު، ފްލެޓްތަކުގައި ދިރިއުޅޭ ގިނަ ބަޔަކު ދަނީ، ތަނުގައި ދިރިއުޅުމަށް ބޮޑެތި ދަތިތައް ދިމާވަމުން ދާކަމުގެ އަތައް ޝަކުވާތަކެއް ކުރަމުންނެވެ.

މިގޮތުން މި ފްލެޓްތަކުގައި ދިރިއުޅެމުންދާ ފަރާތްތަކުން އެންމެ ފަހުން ކޮށްފައވާ އެއްމެ ބޮޑު އެއް ޝަކުވާއަކީ، ވާރޭ ވެހޭ ދުވަސްދުވަހު އެ ޓަވަރުގެ ބައެއް ފްލެޓްތަކުގެ އެތެރެއަށް ފެން ފައިބާ މައްސަލައާއި، އަދި ޓަވަރުތައް ޑިޒައިން ކޮށްފައި ހުރިގޮތުން، ގަދަޔަށް ވިއްސާރަ ކުރާ ދުވަސްދުވަހު، ބައެއް ޓަވަރުތަކުގެ ވޯކްވޭ ތަކަށް ފެން ވިއްސާ، އަދި ވޯކްވޭ ތަކުގައި ފެން ބޮޑުވާ މައްސަލައެވެ.

މިގޮތުން، މީގެ އެއްދުވަސްކުރިން މާލެއާއި ހުޅުމާލެއަށް ވަރަށް ގަދަޔަށް ވިއްސާރަ ކޮށްފައިވާއިރު، މި ފްލެޓްތަކުގައި ދިރިއުޅޭ ފަރާތްތަކުންވަނީ، ހުޅުމާލެއަށް ވަރަށް ބޯކޮށް ވާރޭވެ ވެހެމުން ދިޔައިރު، ބައެއް ޓަވަރުތަކުގެ ވޯކްވޭގައި ފެންބޮޑުވެފައިވާ މަންޒަރުތައް ސޯޝަލް މީޑިއާގައި ޝާޢިއު ކޮށްފައެވެ. އަދި ހަމަ އެއާއެކު، ބައެއް ގެތަކުގެ ބޮޑު ދޮރު ތަކުންނާއި އަދި ކުޑަ ދޮރުތަކުގެ ދޭރެއިންވެސް ގޭތެރެއަށާއި އަދި ކޮޓަރިތަކަށްވެސް ފެން ފައިބަމުން ދިޔަ މަންޒަރުތައްވެސް ވަނީ އެތަންތަނުގައި ދިރިއުޅޭމުންދާ އެތައް ފަރާތްތަކުން ސޯޝަލް މީޑިއާގައި އާންމު ކޮށްފައެވެ.

މީގެ އިތުރުންވެސް، ފަހަކަށް އައިސް ހިޔާ ފެލްޓްތަކުން ވައްކަ ކުރުމުގެ ހާދިސާތައްވެސް ކުރިމަތިވާން ފަށާފައިވާކަން، ފްލެތްތަކުގައި ދިރިއުޅޭމުންދާ ފަރާތްތަކުންނާއި އަދި ފްލެތްތަކުގައި ދިރިއުޅެމުންދާ ފަރަތްތައް ތަމްސީލިކުރަމުންދާ ޖަމިއްޔާއެއް ކަމުގައިވާ އާންމު އެކުވެރި ގުޅުމުގެ ޖަމިއިއްޔާއިންވެސް ވަނީ ފާޅުކޮށްފައެވެ.

މިގޮތުން މި ޖަމިއްޔައިން ކުރި ޓުވީޓެއްގަ ބުނެފައިވަނީ، މި ފްލެޓްތަކަށް މީހުން ބަދަލު ވެފައިވާއިރު، މިތަނަށް ބަދަލުވަމުންދާ ނިކަމެތިންގެ މުދާ ވަގުންގެ ޝިކާރައަކަށް ވެފައިވާ ކަމުގައެވެ. އަދި ބުނެފައިވަނީ، 3 އަހަރު ވީއިރުވެސް ހިޔާ ފްލެޓްތަކުގައި ސަލާމަތީ ކެމެރާ ހަރު ކުރެވިފައި ނުވާ ކަމަށާއި، އަދި ތަންތަނަށް އާއިލާތަކުން ބަދަލުވެ، މުދާތައް ވައްދާފައިވާއިރުވެސް، އަދިވެސް މި ފްލެޓްތައް ބެލެހެއްޓުމަށްޓަކާ ސެކިއުރިޓީން ލެވިފައި ނުވާކަމުގައެވެ. އަދި ހިސާބުގަޑުގެ މަގުތައް އަލިކުރުމަށްޓަކާ މަގުތައްމަތީ ހޮޅިބުރިތައް ވެސް އަދިވެސް ހަރު ކުރެވިފައި ނުވާކަމުގެ ޝަކުވާވެސް މި ޖަމިއްޔާއިން ކޮށްފައި ވެއެވެ.

ހިޔާ ފްލެޓްތަކުގެ ސެކިއުރިޓު އާއި ގުޅޭގޮތުން ހުރި ކަންބޮޑުވުންތަކާ ގުޅޭގޮތުން މި ޖަމިއްޔާއިންވަނީ، ސަލާމަތީ ކަންކަމާއި މުދަލުގެ ރައްކާތެރިކަމަށް ސަރުކާރަށް ބަރޯސާ ނުވުމަށް ގޮވާލާ، އެކަންކަން އަމިއްލައަށް ހަމަޖެއްސުމަށް އިލްތިމާސް ކޮށްފައެވެ. އަދި އެދިފައިވަނީ، ވައްކަން ކުރަން އުޅޭމީހުން ފޮޓޯ ނަގާ މީސްމީޑިއާގައި އާންމު ކުރުމަށް އެއްބަޔަކު އަނެއް ބަޔަކަށް އެހީވެ، ސަލާމަތީ ކަންކަމުގެ ޒިންމާ އަމިއްލައަށް ނަގައިގެން މިކަންކަމުގެ ހައްލު ހޯދުމަށެވެ.

ރައީސް ޔާމިންގެ ސަރުކަރުން އެޅި ހިޔާ ފްލެޓްތަކަށް މިހާރު ގިނަ އާއިލާތަކުން ވަނި ހިޖުރަ ކުރަން ފަށާފައެވެ. މިގޮތުން، ގިނަ ފްލެޓްތަކުގެ ފިނިޝިންގެ މަސައްކަތް މިހާރު ކުރިޔަށް ދާއިރު، ބައެއް ފްލެޓްތަކުގައި މިހާރުވެސް މީހުންވަނީ ދިރިއުޅެން ފަށާފައެވެ.

އާންމު ރައްޔިތުންނަށް ކުރިމަތިވެފައިވާ ބޯހިޔާވަހި ކަމުގެ މައްސަލައަށް ހައްލެއް ހޯދާދިނުމުގެ ގޮތުން، ރައީސް ޔާމިންގެ ސަރުކާރުގައި އާޅާފައިވާ ހިޔާ ފްލެޓްތައް ސައިޒުން ކުޑަވެފައި، އަަދި އެތަންތަނުގެ ޖާގައިގެ ދަތިކަމުގެ ސަބަބުން، ވަނަމެއްގެ ގޮތުގައި ގިނަ ބަޔަކު އެތަންތަނަށް ދީފައިވާ ނަމަކީ "ކޮތަރު ކޮށި" ތަކެވެ. އަދި ހަމަ އެފަދައިން، ހުޅުމާލޭގައި ޗައިނާ ސަރުކާރުގެ އެހީގައި އަޅާދީފައިވާ އެހެން ބައެއް ފްލެޓްތައްވެސް އިމާރާތް ކޮފައިވާ ފެންވަރުގެ ދަށްކަމުގެ ސަބަބުން، ހިޔާ ފްލެތްތަކުގެ ފެންވަރާ ދޭތެރޭވެސް ގިނަބައެއްގެ މާބޮޑު އުއްމީދެއް ނެތްކަން ފާހަގަ ކޮށްލެވެއެވެ.

ހަމަ އެއާއެކު، ބައެއް ފަރާތްތަކުން ހިޔާ ފްލެޓްތަކަށް މިހާރު ބަދަލުވެފައިވާއިރު، ފްލެޓްތައް ކުއްޔަށް ދޫކުރުމަށްވެސް ފޭސްބުކްގައާއި އަދި އައިބޭގައާއި އަދި ވައިބަރ ގުރޫޕްތަކުގައިވެސް ފްލެޓްތައް ލިބުނު ގިނަފަރާތްތަކުން ހިމާރުވަނީ އިސްތިހާރު ކޮށްފައެވެ. އަދި ބައެއް ޔުނިޓްތައް ކުއްޔަށް ދިނުމަށް އިސްތިހާރު ކޮށްފައިވަނީ ފިނިޝިން އާއި އަދި އެހެނިހެން ބައެއް ކަންކަން ފުރިހަމަ ނުކޮށް ކަންވެސް ފާހަގަ ކޮށްލެވެއެވެ.

ފްލެޓްތައް ކުއްޔަށް ދޫކުރަން، އައިބޭގައާއި، ފޭސްބުކް ޕޭޖުތަކާއި އަދި ވައިބާ ގުރޫޕްތަކުގައި އިސްތިހާރު ކުރަމުން އަންނަ ބައެއް ފްލެޓްތަކުގެ އަގުތައް އުޅެނީ މަހަކު 8،500 އާއި 10،000 އާއި ދެމެދުކަން ފާހަގަ ކޮށްލެވެއެވެ.

ހިޔާ ފްލެޓްތަކުގެ އަސްލު ކުލީގެ އަގަކީ 7500ރ. އެވެ. މީގެއިތުރުން، ފުލެޓުގެ މެނޭޖްމެންޓު ފީގެ ގޮތުގައި ކޮންމެ މަހަކު ނަގާ 1,000ރ. ހިމަނައިގެން ފްލެޓެއްގެ އަގު ޖެހެނީ 8،500 ރުފިޔާއަށެވެ.

ފްލެޓްތައް ކުއްޔަށް ދޫކުރަން ފްލެޓް ލިބުނު ފަރާތްތަކުން ފަށާފައިވާއިރު، އެޗްޑީސީންވަނީ ފްލެޓް ކުއްޔަށް ދޫކުރުން މަނާކޮށްފައެވެ. އަދި ހައުސިންގ މިނިސްޓަރ އަސްލަމްވެސް ކުރިންވަނީ، ފްލެޓް ލިބުނު ފަރާތްތަކުން ތަނުގައި ދިރި ނޫޅެ ފްލެޓް ކުއްޔަށް ދޫކުރާނަމަ ފްލެޓްތައް އަތުލާނެ ކަމަށް ބުނެފައެވެ. އަދި މިހާރު ފްލެޓްތައް ކުއްޔަށް ދޫކުރަމުންދާ ދިއުމާ ގުޅޭގޮތުން، ދާދިފަހުންވެސް ހައުސިން މިނިސްޓްރީން ބުނެފައިވަނީ، މި ފްލެޓްތައް ލިބުނު ފަރާތްތަކުން އެތަންތަން ކުއްޔަށް ދޫކުރަމުންދާ ކަން ސާބިތު ވެއްޖެނަމަ، އެ ފްލެޓްތައް އަތުލާނެ ކަމުގައެވެ.

ހިޔާ ފްލެޓްތަކަށް އެޗްޑިސީންނާއި ސްޓެލްކޯއިން ވަނި މީގެ ދެހަފްތާ ކުރިން ކަރަންޓު ދޫކޮށް ނިންމާފައެވެ. އަދި އެޗްޑިސީން ފާއިތުވެދިޔަ ހަފްތާގައި ބުނެފައިވަނީ، ހިޔާ ފްލެޓްތަކުން އެޕާޓްމަންޓްތައް ލިބުނު ފަރާތްތަކުގެ ތެރެއިން ފްލެޓް އެއްބަސްވުންތަކުގައި މިހާތަނަށް އައިއިރު ސޮއި ނުކޮށް ތިބީ %15 މީހުން ކަމުގައެވެ. މީގެ އިތުރުން އެޗްޑިސީން ބުނެފައިވަނީ، ހިޔާ ފްލެޓް ލިބުނު ފަރާތްތަކުގެ ތެރެއިން 250 މީހަކު ވިނަރެސް ފްލެޓަށް ބަދަލުވުމަށް ނަންނޯޓު ކޮށްފައިވާ ކަމުގައެވެ.

އެޗްޑީސީން، ހިޔާ ފްލެޓްތަކުގެ ފިނިޝިަންގެ މަސައްކަތަށް ދީފައިވަނީ 4 މަސްދުވަހުގެ މުއްދަތެކެވެ. އެއީ މިމަހުގެ 1 ވަނަ ދުވަހުން ފެށިގެންނެވެ. އަދި މިމުއްދަތުގައި ފްލެޓްތަކަށް ކުލި ދައްކަން ނުޖެހޭ ގޮތަށްވެސް ސަރުކާރުން ވަނީ ހަމަޖައްސާފައެވެ.

ހުޅުމާލޭގެ ދެވަނަ ފިޔަވަހީގެ ގޮތުގައި 240 ހެކްޓަރުގެ ބިން ވަނީ ހިއްކައިފައެވެ. އެ ސަރަހައްދުގައި ގިނަ އަދަދެއްގެ ހައުސިން ޔުނިޓްތަކެއް އެޅުމުގެ މަސައްކަތް އެކިއެކި ކުންފުނިތަކުން މިހާރު ވެސް ދަނީ ކުރަމުންނެވެ.