ވެރިކަން ކުރާ ކޯލިޝަން ކުރިއަށްދަނީ ވެފައިވާ އެއްބަސްވުމާއި އެއްބަސްވުމާއި އެއްގޮތަށް ނޫންކަމަށާއި، ކޯލިޝަންގެ 90 އިންސައްތަ ހިއްސާ ކުރަނީ އެމްޑީޕީން ކަމުގައި ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެއެވެ.

ޖުމްހޫރީ ޕާޓީން ބޭއްވި ނޫސްވެރިންގެ ބައްދަލުވުމުގައި ޤާސިމް އިބްރާހީމް ވިދާޅުވީ، އެޕާޓީން ޤަބޫލުކުރަނީ 2018 ވަނަ އަހަރުގެ ރިޔާސީ އިންތިޚާބު ކާމިޔާބިކުރުމަށް ކުރެވުނު މަސައްކަތުގެ ތެރެއިން އެއްބަސްވި ގޮތަށް ސަރުކާރުގެ ތެރެއިން ކޯލިޝަންގެ ބައިވެރިންނަށް ފުރުސަތު ލިބިގެންދިއުމަށް ކަމަށެވެ. ރާއްޖޭގެ މިހާރުގެ ހާލަތަށް އިޝާރާތްކުރައްވައި ޤާސިމް ވިދާޅުވީ ޤައުމަށް ކުރިމަތިވެފައިވާ މި ދަތި ދަނޑިވަޅުގައި ސަރުކާރަށް އެއްބާރުލުންދީގެން އިޚްލާސްތެރިކަމާއެކު ޖުމްހޫރީ ޕާޓީން މަސައްކަތްކުރަމުން ގެންދާނެކަމަށެވެ.

އޭނާ ވިދާޅުވީ ކޯލިޝަން އެއްބަސްވުމުގައި އޮތީ ޖުމްހޫރީ ޕާޓީއަށް 25 ޕަސެންޓް، އެމްްއާރުއެމްއަށް 20 ޕަސެންޓް އަދި އަދާލަތު ޕާޓީއަށް 15 ޕަސެންޓް، އެމްޑީޕީއަށް 40 ޕަސެންޓް ދޭ ގޮތަށް ކަމަށެވެ. ނަމަވެސް މިހާރުވެސް ސަރުކާރުގެ ވަޒީފާތަކުގެ 90 ޕަސެންޓް ހިއްސާ ކުރަނީ އެމްޑީޕީން ކަމަށެވެ. އޭނާ ވިދާޅުވީ ކޯލިޝަނުން އެއްބަސްވި ގޮތަށް އަމަލު ނުކުރިނަމަވެސް ކޯލިޝަންގައި ދެމިތިބީ ޤައުމީ މަސްލަހަތުގައި ކަމަށެވެ.

ޖުމްހޫރީ ޕާޓީއަށްވުރެ ޑިމޮކްރެޓިކް އުސޫލުން ހިންގާ ޕާޓީއެއްނެތްކަމަށް ވިދާޅުވަމުން ޤާސިމް ވިދާޅުވީ ކުރިން ހެދި ކޯލިޝަންތައް ރޫޅިގެންދިޔައީ ޖުމްހޫރީ ޕާޓީގެ އެއްވެސް މައްސަލައެއް އޮވެގެންނޫންކަމަށެވެ.

އަޅުގަނޑުމެންގެ އެއްބަސްވުން އޮތީ މި 5 އަހަރު ދުވަހަށް. 5 އަހަރުގެ އެއްބަސްވުމެއްގައި އަޅުގަނޑުމެން މިތިބީ. އެއްބަސްވުމާ އެއްގޮތަށް ކަންތައްތައް ދިޔައަސް އަދި ނުދިޔަސް އެ ނުދާކަމަށް ބަލައިގެން ނޫން އަޅުގަނޑުމެން މިތިބީ. ހެޔޮހިތުން އެކަން ބަލައިގެން މިތިބީ، އިޚްލާސްތެރިކަމާއެކު ޤައުމު ހަމނުޖެހުމުގެ ތެރެއަށް ވައްޓާނުލައި އަޅުގަނޑުމެންނަށް ވެވެން އޮތް އެންމެ ރަނގަޅަށް ސަރުކާރަށް އެހީތެރިވަމުން މިދަނީ.

– ޤާސިމް ވިދާޅުވިއެވެ.

ސަރުކާރުގެ ކޯލިޝަނާ ގުޅޭގޮތުން ނޫސްވެރިއަކު ދެންނެވި ސުވާލަކަށް ޖަވާބު ދެއްވަމުން ރައީސް އިބްރާހީމް މުޙައްމަދު ޞާލިހު ވިދާޅުވެފައިވަނީ ކޯލިޝަން ދެމެހެއްޓުމަކީ އެމަނިކުފާނުގެ ރިޔާސީ ވަޢުދެއް ކަމަށާ، ކޯލިޝަން ރޫޅޭނެ އެއްވެސް ކަމެއް ދިމާނުވާކަމަށެވެ. އަދި ވެރިކަމުގެ 5 އަހަރުގެ ދައުރު ނިމުމާހަމައަށް ކޯލިޝަން ދަމެހެއްޓޭނެކަމަށް ރައީސް ވިދާޅުވިއެވެ.

އެމަނިކުފާނު ވިދާޅުވީ ކޯވިޑް-19އާ ގުޅިގެން ކުރިން ބޭއްވިގޮތަށް ބައްދަލުވުންތައް ނުބޭއްވުނު ނަމަވެސް ކޮންމެ ހަފްތާއަކު ކޯލިޝަންގެ ވެރިންނާ ފޯނުން ކަންކަމުގައި މަޝްވަރާކޮށް ޚިޔާލު ލިބެމުންދާކަމަށެވެ. ރައީސް ވިދާޅުވީ ކޯލިޝަންގެ ތެރޭގައިއޮތް ގުޅުން ރަނގަޅުކަމަށާ، އަދި ކުރިއަށްދަނީވެސް އެއްބައިވަންތަކަމާއެކުކަމަށެވެ.