ރާއްޖޭގައި އެއްވެސް އިރެއްގައި ބޮޑުވަޒީރަކު ހުންނަން ޤަބޫލުނުކުރައްވާކަމަށް ޖުމްހޫރީ ޕާޓިގެ ލީޑަރު ޤާސިމް އިބްރާހީމް ވިދާޅުވެއްޖެއެވެ. ޤާސިމް މިހެން ވިދާޅުވީ، އެމަނިކުފާނަކީ ބޮޑުވަޒީރުގެ މަގާމަށް ވަރަށް ރަނގަޅު ބޭފުޅެއް ކަމުގައި އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝިދު ވިދާޅުވުމާއިގުޅިގެން ނުސްވެރިޔަކު ދެންނެވި ސުވާލަކަށް ޖަވާބުދެއްވަމުންނެވެ.

ޤާސިމް އިބްރާހީމް ވިދާޅުވީ، އެއްވެސް އިރެއްގައި ބޮޑުވަޒީރަކު ހުންނަން އެމަނިކުފާނު ގަބޫލު ނުކުރައްވާކަމަށާއި، އަބަދުވެސް ތާއީދުކުރަނީ ރިޔާސީ އިންތިޚާބަށްކަމަށެވެ. ޤާސިމް ވިދާޅުވީ، ބަރުލަމާނީ އޮންނަ ޤައުމުތަކުގައި ވެރިކަން އަވަސް އަވަހަށް ބަދަލުވެ ރައްޔިތުންނަށް ނިކަމެތިވާތަން ފެންނަކަމަށެވެ. ނަމަވެސް ރާއްޖޭގެ ރައްޔިތުންނަށް އެހެންވުމަށް އެދިވަޑައިނުގަންނަވާކަމަށްވެސް ޤާސިމް ވިދާޅުވިއެވެ.

ކޮންމެ ނިޒާމެއް އޮތަސް ވެރިކަމަށް އަންނަ މީހެއްގެ ސަބަބުން ތަރައްޤީ އަންނަނީ. އޭގ މިސާލަކީ ސިންގަޕޫރު.  އެއީ ބަރުލަމާނީ ނިޒާމް އޮންނަ ތަނެއް. ރައީސް އެއީ ވެރިއަކަށް ހުންނަ މީހެއް. ބޮޑު ޚަރަދެއްކުރަންޖެހޭ މީހެއް.

– ޤާސިމް އިބްރާހީމް

ޤާސިމް އިބްރާހީމާއި ގުޅޭގޮތުން އެމްޑީޕީގެ ވަޓްސްއަޕް ގްރޫޕްގައި ރައީސް ނަޝީދު ވިދާޅުވެފައިވަނީ، ގާސިމަކީ ބޮޑުވަޒީރުކަން ކުރުމަށް ވަރަށް ރަނގަޅު ބޭފުޅެއް ކަމަށެވެ. އަދި އިސްލާހީ މަސައްކަތުގައި ގާސިމް ކުރެއްވި މަސައްކަތް އެންމެ ގާތުން ފެނިވަޑައިގެންނެވި ބޭފުޅަކީ އެމަނިކުފާނު ކަމަށް ވިދާޅުވެ ގާސިމަށް ނަޝީދު ތައުރީފް ވެސް ކުރައްވައިފައިވެއެވެ.

ޤާސިމަކީ ބަރުލަމާނީ ނިޒާމަށް ވަރަށް ބޮޑަށް ދެކޮޅު ހައްދަވާ ބޭފުޅެކެވެ. ރާއްޖޭގައި އޮންނަން ފެންނަ ނިޒާމަކީ ރިޔާސީ ނިޒާމުކަން މީގެ ކުރިން ރައްޔިތުން އޮތީ ނިންމާފައި ކަމަށް ވިދާޅުވަމުން، ގާސިމް ވިދާޅުވެފައިވަނީ ރައްޔިތުން މަތީ އައުލަބިއްޔަތުން އެކަން ނިންމާފައި ވަނިކޮށް، ދައުރުގެ މެދު ތެރެއާއި ހަމައަށް ނާންނަނީސް ބަރުލަމާނީ ނިޒާމުގެ ވާހަކަ މާގަދަޔަށް ދައްކަނީ ކޮން ކަމެއްކައިކަންވެސް އެގޭ ކަމަށާއި، ރައްޔިތުންނަށް އެންމެ ފައިދާހުރި ނިޒާމަކީ، ރިޔާސީ ނިޒާމުކަން އެގި ކަށަވަރުވާ ކަމަށެވެ. އަަދި ކޮންމެ ނިޒާމެއް އޮތަސް، ކަން ކުރެވިގެންދާނީ، ވެރިކަމަށް އަންނަ މީހެއްގެ ގާބިލްކަމާއި، ތަޖުރިބާގެ މައްޗަށް ކަމަށްވެސް ގާސިމް ވިދާޅުވިއެވެ.

2008 ވަނަ އަހަރު ދިވެހިން ބަލައިގަތް ފެހި ޤާނޫނު އަސާސީއަށް އަމަލުކުރަން ފެށުމުގެ ކުރިން ރާއްޖޭގައި އޮންނަން ބޭނުންވާ ވެރިކަމުގެ ނިޒާމު ކަނޑައެޅުމަށް ނެގި ރައްޔިތުންގެ ފެންނަ ނުފެންނަ ވޯޓުގައި 95،619 މީހުން ވޯޓުދީފައިވަނީ ރާއްޖޭގައި އޮންނަން ފެންނަނީ ރިޔާސީ ނިޒާމުކަމަށެވެ. ބަރުލަމާނީ ނިޒާމު އޮންނަން ފެންނަކަމަށް ވޯޓުދީފައިވަނީ 58،504 މީހުންނެވެ. މި ވޯޓުގައި 199،841 މީހުން ވޯޓުލުމަށް ރަޖިސްޓްރީކުރިއިރު، ވެރިކަމުގެ ނިޒާމު ކަނޑައެޅުމަށް ވޯޓުދީފައިވަނީ 155،890 މީހުންނެވެ.