ޤައިދީންނާއި ބަންދުމީހުންގެ ފައިސާއާބެހޭ މުޢާމަލާތްތައް ފަސޭހަކަމާއެކު ބެލެހެއްޓޭނެ ނިޒާމެއް ތަޢާރަފުކޮށްފިއެވެ.
ކަރެކްޝަނުން ތައާރަފްކޮށްފައިވަނީ ޕްރިޒަނާ އެކައުންޓްސް މެނޭޖްމަންޓް ސިސްޓަމް (ޕެމްސް) އެވެ. ޕެމްސްއިން، އާއިލާއިން ކޮންމެ މަހަކު ބަނޑޭރި ޕޭ މެދުވެރިކޮށް ކަނޑައެޅިފައިވާ އަދަދަށް ގައިދިންނާއި ބަންދު މީހުންނަށް ފޮނުވާ ފައިސާ ބެލެހެއްޓޭނެއެވެ. އަދި އެލަވަންސް އުސޫލުން މަސައްކަތްކުރާ ގައިދީންގެ ފައިސާ ވެސް ބެލެހެއްޓޭނެއެވެ. މީގެ އިތުރުން ގައިދީންނާއި ބަންދުމީހުން ވިޔަފާރި އުސޫލުންކުރާ މުއާމަލާތްތައް މޮނިޓާކުރެވޭނެއެވެ.
ގައިދީންނަށް އާއިލާއިން ފައިސާ މިހާރު ފޮނުވޭނީ ހަމައެކަނި ބަނޑޭރިޕޭ މެދުވެރިކޮށް. ގައިދީން ޖަލުގައި ވަޒީފާ އަދާކޮށްގެން ލިބޭ އާމްދަނީ އާއި އާއިލާ އިންފޮނުވާ ފައިސާ މެނޭޖުކޮށް ބެލެހެއްޓުމަށް “ޕްރިޒަނާސް އެކައުންޓް މެނޭޖްމަންޓް ސިސްޓަމް’ އެހީތެރިވެދޭނެ. https://t.co/jnjbB92jVZ
— Ahmed Mohamed (@ahumadhumohamed) September 10, 2021
ޕެމްސްއަކީ މޯލްޑިވްސް ކަރެކްޝަނަލް ސަރވިސްއިން ބޭނުންކުރާ "ޓޯޓަލް އޮފެންޑަރ މެނޭޖްމަންޓް ސިސްޓަމް" އެޓަމްސްގެ އެކައުންޓްސްތަކާބެހޭ މޮޑިއުލްއެވެ. މިގޮތުން އެޓަމްސްއިން ޤައިދީންގެ ހުރިހާ ރެކޯޑްތައް ބަލަހައްޓާއިރު، ޕެމްސްއިން ބަލަހައްޓާނީ އެފަރާތްތަކުގެ ފައިސާއާބެހޭ ރިކޯޑްތަކެވެ.
މި ސިސްޓަމް މެދުވެރިކޮށް ހުރިހާ ޖަލަކާއި ހެޑް އޮފީސް ގުޅުވައިދެއެވެ. މީގެ ސަބަބުން އެއް ޑޭޓާ ބޭސްއަކުން ޤައިދީންގެ ރިކޯޑްތައް ބެލެހެއްޓި، ކަންތައްތައް ކުރުމުގައި ކުރިއަށްވުރެ އަވަސްވެ، ކަރުދާސް ބޭނުންކުރުމާއި ޑަބަލްކޮށްކުރަންޖެހޭ މަސައްކަތްތައް ލުއިވެގެންދާނެކަމަށް ކަރެކްޝަނަލް ސަރވިސްއިން ވިދާޅުވެއެވެ. މި ސިސްޓަމް އަބަދުވެސް ލައިވްކޮށް އަޕްޑޭޓްވަމުންދާނެއެވެ.
އަދި މީގެ ސަބަބުން މަސައްކަތްތަކުގެ ފެންވަރު ރަނގަޅުވެ، އޮފިސަރުންނާއި މުވައްޒަފުން ޒިންމާދާރުވުން އިތުރުވެގެންދާނެކަމަށްވެސް އެ ސަރވިސްއިން ވިދާޅުވެފައިވެއެވެ.
