މޯލްޑިވިއަންގައި މިހާރު އޮތް މެނޭޖްމަންޓާއިމެދު ހިތްހަމަ ނުޖެހި، 7 ޕައިލެޓަކު ވަޒީފާއިން ވަކިވުމާއި، ގުޅިގެން ކުންފުނީގެ ތިން ޑިޕާޓްމަންޓެއްގެ ހެޑުން އެބޭފުޅުން ތިއްބެވި މަޤާމުތަކުން އިސްތިއުފާ ދެއްވައިފިއެވެ.
ޚަބަރު އޮންލައިނަށް މައުލޫމާތު ލިބިފައިވާ ގޮތުގައި މިބޭފުޅުން އަދާކުރައްވަމުންދިޔަ މަޤާމުން އިސްތިއުފާ ދެއްވާފައިވަނީ، ޕައިލެޓުންގެ ކަންބޮޑުވުންތަކަށް މެނޭޖުމަންޓުން ސަމާލުކަމެއް ނުދިނުމުން، އެއްފަހަރާ މިހާބައިވަރު ޕައިލެޓުން ދިއުމުން ކަންކަން މެނޭޖްކުރަން ބޮޑެތި ދަތިތަކާއި ކުރިމަތިވާނެތީއެވެ. މަޤާމުން އިސްތިއުފާ ދެއްވާފައިވާ ބޭފުޅުންނަކީ ކުންފުނީގެ އެންމެ ތަޖުރިބާ ހުރި ބޭފުޅުންކަމަށް މައުލޫމާތު ލިބިފައިވެއެވެ.
އިސްތިއުފާ ދެއްވި މަޤާމުގައި ހިމެނޭ ބޭފުޅުން:
– މޯލިޑިވިއަންގެ ފްލެޓް އޮޕަރޭޝަންގެ ހެޑް މުހައްމަދު ޝުނީޝީ
– ފްލައިޓް އޮޕަރޭޝަންގެ ހެޑްއޮފް ޓްރައިނިން އެންޑް ސްޓޭންޑާސްގެ މަޤާމުގައި ހުންނެވި ބޭފުޅާއާއި،
– ހެޑްއޮޕް އޮތޮރައިޒްް ޓްރައިނިން، އޯގަނައިޒޭޝަން (އޭޓީއޯ) މަޤާމު ފުރުއްވަމުންދިޔަ ބޭފުޅާއެވެ.
މިބޭފުޅުން މަޤާމުތަކުން އިސްތިއުފާ ދެއްވި ނަމަވެސް އަދި ވަޒީފާއިން ވަކިނުވާކަމަށް ވަނީ މައުލޫމާތު ލިބިފައެވެ. މޯލްޑިވިއަންގެ ޕައިލެޓުންތަކެއް ވަޒީފާއިން ވަކިވުމާއި ގުޅިގެން އެކުންފުނީގެ މުވައްޒިފުންނަށް ވަނީ ވަރަށް ބޮޑަށް މާޔޫސްކަން ކުރިމަތިވެފައެވެ. ކުންފުނީގެ މަސައްކަތް ކުރާ މުވައްޒިފުންގެ އެންމެބޮޑު ޝަކުވާއަކީ ކޯވިޑް-19 އާއި ގުޅިގެން ކަނޑާލި މުސާރަތައް އިޔާދަ ނުކޮށްދިނުމެވެ.
މިއަދު ވަޒީފާ ދޫކޮށްލި ޕައިލެޓުނެގެންވެސް އެންމެ ބޮޑު ކަންބޮޑުވުމަކީ އަމިއްލަ ކުންފުނިތަކުން ކޯވިޑާއި ގުޅިގެން ކަނޑާލި މުސާރަ އިޔާދަކޮށްދީފައިވާއިރުވެސް މޯލްޑިވިއަނުން މުސާރަ އިޔާދަ ނުކޮށްދިނުމެވެ.
މޯލްޑިވިއަންގެ މިހާރުގެ މެނޭޖްމަންޓާއިމެދު ހިތްހަމަ ނުޖެހި މިއަހަރުގެ މާރޗް މަހުގެ ތެރޭގައިވެސް ޕައިލެޓުންވަނީ ވަޒީފާއަށް ނުނިކުމެ އިހުތިޖާޖްކޮށްފައެވެ. މީގެކުރިން ދުވަހަކުވެސް މޯލްޑިވިއަންގައި ދިމާނުވާފަދަ ގިނަ މައްސަލަތަކެއް މިހާރު އެކުންފުނީގައި ފާހަގަކުރެވެމުންދާއިރު، މިމައްސަލަތައް ހައްލު ކުރުމަށް މެނޭޖްމަންޓުން އެއްވެސް ވަރަކަށް މަސައްކަތް ނުރާކަމަށް މުވައްޒިފުން ދަނީ ބުނަމުންނެވެ.
އައިލެންޑް އޭވިއޭޝަންގައި 11 ސީޕްލޭން އޮވެއެވެ. ގިނަ ޕައިލެޓުންތަކެއް އެއްފަހަރާ ވަޒީފާ އިން ކެނޑުނަސް، އެ ކުންފުނިން ބުނަނީ އޮޕަރޭޝަންތަކަށް މެދުކެނޑުމެއް ނާންނަ ގޮތަށް މެނޭޖްކުރެވޭނެ ކަމަށެވެ.
