ށ. އަތޮޅު ކައުންސިލްގެ މެމްބަރުންނާ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިއަދު ބައްދަލުކުރައްވައިފިއެވެ.
މި ބައްދަލު ކުރެއްވުމުގައި އަތޮޅު ކައުންސިލްގެ މެމްބަރުންވަނީ، އަތޮޅުގެ ރައްޔިތުނަށް މިވަގުތު ކުރިމަތިވެފައިވާ ދަތިތަކާއި ގުޅޭގޮތުންނާއި އަދި ތަރައްގީގެ މަޝްރޫޢުތަކާ ގުޅޭގޮތުންވެސް ރައީސްއާއި މައުލުމާތު ހިއްސާ ކުރައްވާފައެވެ.
މިގޮތުން އަތޮޅު ކައުންސިލްގެ މެންބަރުން ރައީސްއާއި ހިއްސާ ކުރެއްވި ކަންކަމުގެ ތެރޭގައި، އަތޮޅުގެ ފަޅުރަށްތައް ދޫކުރުމުގައި ހުރި ކަންބޮޑުވުންތަކާއި، އަތޮޅުގައި ތަރައްގީވަމުންދާ ރިސޯޓްތަކުގެ މަސައްކަތް އަވަސްކޮށްދެއްވުމަށާއި، އަތޮޅު ތެރޭގެ ދަތުރުފަތުރުކުރުމުގެ ނިޒާމު ހަރުދަނާކުރުމުގެ ގޮތުން ކުރަންޖެގޭ ކަންކަމާއި، އަތޮޅު ހޮސްޕިޓަލްގެ ޞިއްޙީ ޚިދުމަތްތައް ރަގަޅު ކުރުމަށް ކުރަންޖެހޭ މަސައްކަތްތަކާއި، އަތޮޅުގެ އެކި ރަށްރަށުގެ ތަޢުލީމީ ޚިދުމަތްތައް ރަނގަޅުކުރުމަށް ބޭނުންވާ ވަސީލަތްތަކާއި، އަދި މީގެ އިތުރުން، އަތޮޅު ކައުންސިލްގެ އޮފީހުގެ ޢިމާރާތުގެ ޖާގައިގެ ދަތިކަމާއި ގުޅޭ މައުލޫމާތުވެސް ހިމެނެއެވެ.
އަތޮޅު ކައުންސިލުން ރައީސްއާއި ހިއްސާކުރެއްވި މައުލޫމާތުތަކާ ގުޅިގެން، ކަމާ ގުޅުންހުރި މުވައްސަސާތަކާއި މަޝްވަރާ ކުރައްވައިގެން މިމައްސަލަަތއް ހައްލު ކުރުމަށް މަސައްކަތް ކޮށްދެއްވާނެ ކަމަށް ރައީސް ވަނީ ވިދާޅުވެފައެވެ.
ކައުންސިލް މެމްބަރުންނާ ރައީސް ހިއްސާ ކުރެއްވި މައުލޫމާތުތަކުގެ ތެރޭގައި، ށ. ބިލެތްފަހީގައި އެޅުމަށް ހަމަޖެހިފައިވާ އެއަރޕޯޓް ހެދުމަށް ޝައުޤުވެރިވާ ފަރާތްތަކުން މިހާރު ވަނީ ބިޑް ހުށަހަޅާފައިވާ ކަމަށް ރައީސް ވިދާޅުވިއެވެ. އަދި މީގެ އިތުރުން ށ. ފުނަދޫ އެއަރޕޯޓުގައި ރޭގަނޑު ދަތުރުކުރެވޭނެ މަގު ތަނަވަސްކުރުމަށް މަސައްކަތްކޮށްދެއްވާނެ ކަމަށްވެސް ރައީސް ވިދާޅުވެފައި ވެއެވެ. މީގެ އިތުރުން ށ. މިލަންދޫގައި މިނީ ހޮސްޕިޓަލެއް އެޅުއްވުމަށް ނިންމަވާފައިވާ ކަމަށްވެސް ރައީސް ވިދާޅުވިއެވެ.
ރައީސުލްޖުމްހޫރިއްޔާގެ ދެކަނބަލުންގެ ކުރައްވަމުން ގެންދަވާ މިދަތުރުފުޅުގައި، މިލަދުންމަޑުލު އުތުރުބުރީގެ 4 ރަށަކަށާއި، މާޅޮސްމަޑުލު އުތުރުބުރީގެ 4 ރަށަކަށް ޒިޔާރަތްކުރެއްވުމަށް ހަމަޖެހިފައިވެއެވެ. އަދި، މި ރަށްރަށަށް ކުރައްވާ ޒިޔާރަތްތަކުގައި އެދެކަނބަލުން އެރަށްރަށުގައި ހިނގަމުންދާ ބައެއް މަޝްރޫޢުތައް ހިނގަމުންދާ ގޮތް ބައްލަވާލައްވައި، ބައެއް މުއައްސަސާތަކަށް ޒިޔާރަތްކުރައްވައި އެތަންތަނުގެ ޙާލަތު ބައްލަވާލައްވައި، ބައެއް މުއައްސަސާތަކުގެ އިސްވެރިންނާ ބައްދަލުކުރެއްވުމަށް ހަމަޖެހިފައި ވެއެވެ.
މީގެ އިތުރުން ވެސް ރައީސުލްޖުމްހޫރިއްޔާ، ކައުންސިލްތަކާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިތުރުން، މަސްވެރިންނާއި، ދަނޑުވެރިންނާ ބައްދަލުކުރެއްވުމަށް ހަމަޖެހިފައިވެއެވެ. އަދި، ރައީސުލްޖުމްހޫރިއްޔާގެ ދެކަނބަލުންގެ މި ދަތުރުފުޅުގައި ރ. އަލިފުށީގައި މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ ފަރާތުން ޤާއިމުކޮށްފައިވާ ޖޮބް ސެންޓަރުގެ ޚިދުމަތްވެސް އިފްތިތާޙްކޮށްދެއްވުމަށް ހަމަޖެހިފައިވެއެވެ.
