މޭ 6 ވަނަ ދުވަހު ދިން ނުރައްކާތެރި ޓެރަރިސްޓު ހަމަލާއަށްފަހު ރާއްޖެއިން ބޭރުގައި ބޭސްފަރުވާ ހޯއްދަވަމުން ގެންދަވާ ރައީސް ނަޝީދު ރާއްޖެއިން ބޭރަށް ވަޑައިގެންނެވުމަފަހު، އިއްޔެ މިވަނީ އަލަށް ނޫސްވެރިންނާ ބަދަލު ކުރައްވާފައެވެ.
މި ބައްދަލުކުރެއްވުން ނަޝީދު ބާއްވަވާފައި މިވަނީ، ފަހަކަށް އައިސް އެމްޑީޕީގެ އެތެރޭގެ ކޯޅުންތަކުގައިވެސް، ކުރިން އާންމު ރައްޔިތުންނާ ހަމައަށް ތިލަވެގެން ގޮސްފައިނުވާ އެތަކެއް މަންޒަރުތަކެއް ތިލަވެ، އަދި މީގެކުރިން އާންމު ރައްޔިތުންނަށް ޖަވާބު ނުލިބޭ އެތަކެއް ސުވާލުތަކަކަށް ރައީސް ސާލިހުގެ ފަރާތުންވެސް ގިނަގުނަ ޖަވާބުތަކެއް ލިބިގެން ގޮސްފައިވަނިކޮށްވެސްމެއެވެ.
މިގޮތުން ބަލާއި، މިވެރިކަން ފެށިގެން އައުމަށްފަހު ދޮޅު އަހަރެއްހާ ދުވަސް ފާއިތުވެގެން ގޮސްފައިވަނިކޮށް ފެންމަތިވެގެން ވެގެންދިޔަ، ރައީސް ނަޝީދާއި ރައީސް ސާލިހުއާ ދެބޭފުޅުންގެ ކޯޅުން އެންމެ ބޮޑުވެގެން ދިޔައީ، މަޖިލިހުގެ ފާއިތުވެދިޔަ ދައުރުގައި މަޖިލިހަށް ހުށަހެޅިގެންދިޔަ ނަފްރަތުގެ ބިލާ ހަމައިންކަން ފާހަގަ ކޮށްލަން ޖެހެއެވެ.
ނަފްރަތުގެ ބިލު މަޖިލިހުގެ ތެރެއިން ފާސްނުކުރެވި، މަޖިލިހުގައި ތިއްބެވި، ރައީސް ނަޝީދުގެ ފެކްޝަނަށް ތާއީދުކުރާ މެމްބަރުން ރައީސް ސާލިހުގެ އިސްތިއުފާއަށްވެސް ގޮވާފައިވަނިކޮށް، ރާއްޖެއިން ބޭރުގައި ހުންނަވައިގެން ނަޝީދު ވަނީ ރައީސް ސާލިހަށް ކުރެއްވަމުން ގެންދެވި ތާއީދު އަބުރާ ގެންދަވާފައެވެ. އަދި ތާއީދު އަބުރާ ގެންދެވުމަށްފަހު ވިދާޅުވެފައިވަނީ، ރައީސް ސާލިހާއެކީ ދެން ސިޔާސީ މަސައްކަތެއް ނުކުރައްވާނެ ކަމަށާއި، ދެން ސިޔާސީ މަސައްކަތް ކުރެއްވުމަށް ބޭނުންފުޅުވަނީ ރައީސް ޔާމިންއާ އެކީގައި ކަމަށެވެ.
ހަމައެއާއެކު ދެން އާންމު ރައްޔިތުންނަށް ތަމްސީލުވެގެން ދިޔައީ، ކުރިން ގިނަބަޔަކަށް ތަސައްވުރު ވެފައެއް ނެތް، މުޅިން ތަފާތު މަންޒަރެކެވެ. އެތައް ދުވަހެއެއްވަންދެން، ރައީސް ނަޝީދު ކުރިޔަށް ނިކުންނަވާ ރައީސް ސާލިހުގެ ސަރުކާރަށް ދެމުންދިޔަ އިންޒާރުތަކާ، ވިދާޅުވަމުން ގެންދެވި ފާޑުވިދާޅުވުންތަކަށް، ޕްރެސް ކޮންފަރެންސަކަށް އަރުވާ ވަރަށް ސާފުބަހުން ރައީސް ސާލިހު ޖަވާބު ދެއްވި މަންޒަރެވެ.
މިގޮތުން، ފާއިތުވެދިޔަ ޖުލައިމަހުގެ 25ވަނަ ދުވަހު ބޭއްވިގެންދިޔަ ރައީސް ސާލިހުގެ ޕްރެސް ކޮންފަރެންސްފައި، ނޫސްވެރިންގެ ސުވާލުތަކަށް ޖަވާބު ދެއްވަމުން ރައީސް ސާލިހު ވަނީ، އޭގެކުރިން ސަރުކާރާމެދު ނަޝީދު ކުރައްވާފައިވާ ތުހުމަތުތަކަށާއި، އަދި ދެއްވަމުންގެންދެވި އިންޒާރުތަކަށާއި، އުފައްދަވަމުންގެންދެވި ޝައްކުތަކަށްވެސް ވަރަށް ފުރިހަމައަށް ސާފުބަހުން ޖަވާބު ދެއްވާފައެވެ.
އަދި ވަކީން ޚާއްސަކޮށް، އެ ޕްރެސް ކޮންފަރެންސްގައި ރައީސް ސާލިހުވަނީ، މަޖިލިހުގެ މެޖޯރިޓީއާއި އަދި އެމްޑީޕީގެ ގައުމީ މަޖިލިހުގެ މެޖޯރިޓީވެސް އެމަނިކްފާނުގެ އަތްޕުޅުގައި އޮތްކަމަށް ވިދާޅުވެ، ސަރުކާރުގެ ވިސްނުމާ ދެކޮޅަށް ގައުމީ މަޖިލިހުގެ ތެރެއިން ނަޝީދު ފާސްކުރައްވަން މަސައްކަތް ކުރެއްވި ބައެއް ގަރާރުތައް ފެއިލްވެގެންދިޔަ ސަބަބުތައްވެސް ވިދާޅުވެ ދެއްވާފައެވެ.
ރައީސް ސާލިހުގެ މި ވާހަކަފުޅުތަކާ ގުޅޭގޮތުން އެއްވެސް އެއްޗެއް ވިދާޅުނުވެ، ދޮޅުމަހެއް ހާދުވަހު ހަނު ހުންނެވުމަށްފަހު ނަޝީދު އިއްޔެ ބޭއްވެވި ޕްރެސް ކޮންފަރެންސްގައި، ދެބޭފުޅުންގެ ދެމެދުގައި އުފެދިފައިވާ ޚިލާޔާލު ތަފާތުވުންތަކާ، އަދި ކުރިން ގަދަބަސް ވިދާޅުވަމުން ގެންދެވި ރައީސް ނަޝީދުގެ ރާގު ފެނިގެންދިޔައީ މުޅިންހެން ކަހަލަ ގޮތަކަށް ބަދަލުވެގެން ގޮސްފައިވާ މަންޒަރެވެ.
ރާގު މުޅިން ތަފާތު!
ގިނަ ދުވަސްތަކަކަށްފަހު ރައީސް ނަޝީދު ބޭއްވެވި ނޫސް ކޮންފަރެންސްގައި ނޫސްވެރިންވަނީ، ރައީސް ސާލިހާއި ރައީސް ނަޝީދާއި ދެބޭފުޅުންގެ ދެމެދުގައި އުފެދިފައިވާ އެތަކެއް ޚިޔާލުތަފާތު ވުމަކާއި ގުޅުވައިގެން ސުވާލު ކޮށްފަައެވެ. މީގެތެރޭގައި އެމްޑީޕީގެ ގައުމީ މަޖިލިހުގެ މެޖޯރިޓީއާއި، ރައްޔިތުންގެ މަޖިލިހުގެ މެޖޯރިޓީ ރައީސް ސާލިހުގެ އަތްޕުޅުގައި އޮތްކަމަށް ރައީސް ސާލިހު ވިދާޅުވި ވިދާޅާޅުވުމާއި، އަދި ރައީސް ސާލިހަށް ސިޔާސީގޮތުން ދެން ތާޢީދު ނުކުރައްވާނެކަމަށް މީގެކުރިން ނަޝީދު ވިދާޅުވި ވިދާޅުވުމާއި ގުޅޭގޮތުންނާއި އަދި މީގެއިތުރުންވެސް ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލުކޮށްލުމަށް ކުރައްވަމުން ގެންދަވާ މަސައްކަތްޕުޅާ ގުޅޭގޮތުންވެސް ނޫސްވެރިންވަނީ ނަޝީދަށް ސުވާލު އަމާޒުކުރައްވާފައެވެ.
މިހުރިހާ ސުވާލުތަކަކަށްވެސް ނަޝީދު ދެެއްވާފައިވަނީ ފިނި ޖަވާބުތަކެއްކަން ފާހަގަ ކޮށްލެވެއެވެ. އަދި ބައެއް ކަންކަމަށް ތަފާތު މޭރުންތަކެއް ނެރުއްވާ، ނަޝީދު ޖަވާބު ދެއްވާފައިވަނީ، ސަރުކާރާ ދޭތެރޭ އޮތް ޖަޒުބާތު އާންމު ކުރެއްވުމަކާ ނުލާކަންވެސް ފާހަގަކޮށްލެވެއެވެ.
މީގެތެރޭގައި، އެމްޑީޕީގެ ގައުމީ މަޖިލިހުގައި ބަރުލަމާނީ ނިޒާމާ ގުޅޭގޮތުން، ގިނަ މެމްބަރުން ގައުމީ މަޖިލިހުގައި ވާހަކަ ނުދައްކަވަނީ، ނަޝީދު ދެކެވަޑައި ގަންނަވާ ގޮތުގައި، އެއީ އެ މެމްބަރުންގެ ދާއިރާތަކުގައި ބަރުލަމާނީއަށް އޮތް ތާއީދު ވަރަށް ރަގަޅަށް އެމެމްބަރުންނަށް ވަޒަން ކުރެއްވޭތީ، ދާއިރާތަކުގެ އިހްސާސްތަކާ ދެކޮޅަށް ވާހަކަ ދެއްކެވުމަކީ ބުއްދިވެރިކަމަކަށް ނުވެދާނެތީ ކަމުގައި ނަޝީދު ވިދާޅުވިއެވެ. ނަޝީދު ވިދާޅުވީ، ދާއިރާތަކުގައި ބަރުލަމާނީ ނިޒާމަށް ތާއީދު އޮއްވާ ކުއްލިއަކަށް، މެމްބަރުން އެކަމާ އަދި މިވަގުތު އެއްޗެއް ބުނުން އެއީ ރަގަޅުކަމެއް ކަމަށް ނުވާނެތީވެ، ބަރުލަމާނީ ނިޒާމާ ގުޅޭގޮތުން އެމްޑީޕީގެ ގައުމީ މަޖިލިހުގައި މެމްބަރުން އެނިޒާމުގެ ވާހަކަ ނުދައްކަވަނީ ކަމުގައެވެ.
ބަރުލަމާނީ ނިޒާމާ ގުޅޭގޮތުން އެމްޑީޕީގެ ގައުމީ މަޖިލިހުގައި، އެއްޗެއް ނުބުނެ އެތިބޭ ސަބަބަކީ، އެބޭފުޅުންނަށްވެސް އެގިވަޑައިގަންނަވާ އެބޭފުޅުންގެ ކޮންސްޓިޓުއެންސީ ތަކުގައި، ދާއިރާތަކުގައި އެނިޒާމަށް ތާއީދު އޮތް މިންވަރު. އެހެންވީމަ ކުއްލިއަކަށް، އެބޭފުޅުން އެކަމާ އަދި މިވަގުތު އެއްޗެއްބުން އެއީ ރަގަޅު ކަމަކަށް ނުވާނެތީވެ އެބޭފުޅުން ވިދާޅުނުވެ ތިބެނީ.
ނަޝީދު ވިދާޅުވެފައި ވެއެވެ.
ހަމަ އެއާއެކު، ނަޝިދުއާއި ރައީސް ސާލިހާ ދެބޭފުޅުން ދެމެދުގައި އެންމެ ބޮޑަށް ޚިޔާލު ތަފާތުވެގެންދިޔަ އެއްމަސަލަ ކަމުގައިވާ ނަފްރަތުގެ ބިލާ ގުޅޭގޮތުންވެސް މި ޕްރެސް ކޮންފަރެންސްގެ ވަކިހިސާބެއްގައި ނަޝީދުވަނީ އަލި އަޅުއްވާ ލައްވާފައެވެ. ނަފްރަތުގެ ބިލާ ގުޅޭގޮތުން ނަޝީދު ވާހަކަ ދައްކަވާފައިވަނީ، ރައީސް ސާލިހަށް ކުރެއްވި ތާއީދު އަބުރާ ގެންދެވުމަށް ކުރިން ނިންމެވި ނިންމެވުން މިހާރު އަބުރާ ގެންދެވީތޯ ސާފުކުރެއްވުމަށް ނޫސްވެރިޔަކު ކުރެއްވި ސުވާލުގެ ޖަވާބު ދެއްވަމުންނެވެ.
މިސުވާލުގެ ޖަވާބު ނަޝީދު ބޮޑަށް އަމާޒު ކުރައްވާފައިވާފައިވަނީ، ދެބޭފުޅުންގެ މެދުގައި އުފެދުނު ހަަމަނުޖެހުމުގެ އަސްލަކީ، ނަފްރަތުގެ ބިލްކަމުގައި މޭރުން ކުރައްވަމުންނެވެ. ނަޝީދު ވިދާޅުވެފައިވަނީ، ނަފްރަތުގެ ބިލްވަނީ އަދިވެސް މަޖިލިހުގައި ކަމަށާއި، އެމަނިކްފާނު ދެކެވަޑައިގަންނަވާ ގޮތުގައި އަދިވެސް އެބިލް ސަރުކާރުން ހުށަހެޅެއްވި މަހުފޫމުގައި ފާސްވެގެންދާނެ ކަމުގައެވެ.
އަޅުގަޑު ދެންނެވި ވާހަކާގައި އަޅުގަޑަށް ދެންނެވޭނީ، އަޅުގަޑު ދެންނެވިން ނަފްރަތުގެ ބިލު އެއީ އަޅުގަޑު ދެކޭ ގޮތުގައި މުހިންމު ކަމެއް އޮތް ބިލެކޭ. ދެން މިހާރު އަޅުގަޑަށް ފެންނަ ފެނުމުގައި އެބިލު މިހާރު އެދަނީ ރަގަޅަށް ބަހުސް ކުރެވެމުން، އަދި އެބިލު އަޅުގަޑުމެން މިދެކޭ ގޮތުގައި އެ އޮތް މަހުފޫމުގައި އޮތްގޮތަށް އިރާދަކުރެއްވިއްޔާ ފާސްވެގެން ދާނެ.
ނަޝީދު ވިދާޅުވެފައި ވެއެވެ.
އެހެންކަމުން، ބެލެވޭ ގޮތުގައި، ނަޝީދު ހުންނެވީ، އަދިވެސް، ނަފްރަތުގެ ބިލް އެންމެ ފުރަތަމަވެސް އޮތްގޮތަށް ފާސްވެގެން ދާނޭކަމުގެ އުއްމީދުގައެވެ. އަދި އެއުއްމީދު ހާސިލްވަމުން ދާދިއުމުގެ ނަތީޖާއެއްގެ ގޮތުން، އޭރު އަބުރާ ގެންދެވިކަމަށް ވިދާޅުވި ތާއީދު މިހާރު އެއުސޫލުން އަބުރާ ގެންދަވައިގެން ހުންނެވިކަމަށް، މިޕްރެސް ކޮންފަރެންސްގައި ދެއްކެވި ވާހަކަފުޅުން ތަރުޖަމާކުރެވިގެން ގޮސްފައެއް ނުވެއެވެ.
އެހެންނަމަވެސް ފާހަގަކޮށްލަންޖެހޭ އެންމެ މުހިންމު ނުކުތާއަކީ، ޖުލައި 25ގައި ރައީސް ސާލިހު ބޭއްވެވި ޕްރެސް ކޮންފަރެންސްގައި، މިބިލާއި ގުޅޭގޮތުން ސަރުކާރުގެ ސްޓޭންޑް ވަރަށްވެސް ސާފުކޮށް ސަރީހަ އިބާރާތުން ރައީސް ސާލިހު ވިދާޅުވެ ދެއްވާފައިވާކަމެވެ. ރައީސް ސާލިހު ވިދާޅުވެފައިވަނީ، ސަރުކާރުން އެންމެ ފުރަތަމަ ހުށަހެޅުއްވި ގޮތަށް ދެން މަޖިލިހުން އެބިލް ފާސްކުރަން ސަރުކާރުން ބޭނުން ނުވާ ކަމުގައެވެ.
ކޮންމެއަކަސް، އެތައް ދުވަހަކަށްފަހު، އަދި ވަކީން ޚާއްސަކޮށް، މީގެކުރިން ސަރުކާރާމެދު ނަޝީދު ފާޅުކުރައްވާފައިވާ އުދާސްތަކާއި އަދި އެތަކެއް ޝަކުވާތަކަކަށް ރައީސް ސާލިހު ވަރަށް ސާފު ބަހުން ޖަވާބުދެއްވާ އަދި ވަރަށް ގިނަކަންކަން ސާފުކޮށް ދެއްވާފައިވަނިކޮށް، ނަޝީދު ބޭއްވެވި މި ޕްރެސް ކޮންފަރެންސް ފާހަގަ ވެގެންދިޔައީ، ނަޝީދު ވަރަށް ގިނަ ކަންކަމުގައި ދޫދެއްވައިގެން ޝުއޫރު ފާޅުކުރެއްވި، ނުވަތަ ވާހަކަފުޅު ދެއްކެވި ޕްރެސް ކޮންފަރެންސެއްގެ ގޮތުގައެވެ.
މިގޮތުން، މަޖިލީހުގެ މެޖޯރިޓީ ހިފަހައްޓަވާނޭކަމަށް ރައީސް ސާލިހު ވިދާޅުވެފައިވާ ވިދާޅުވުމަށް އިޝާރާތް ކުރައްވާ ނަޝީދު ވިދާޅުވެފައިވަނީ، އެއީ އެމަނިކްފާނުވެސް ހަމަ ބޭނުންފުޅުވާ ގޮތްކަމަށާއި، އަދި އެމަނިކްފާނުވެސް ހުންނެވީ މަޖިލިސް މެޖޯރިޓީ ސަރުކާރަށް ހޯއްދަވާ ދެއްވުމަށް އިސް ނަންގަވައިގެން ކަމުގައެވެ.
ރައީސުލްޖުމުހޫރިއްޔާ ވިދާޅުވީ ސަރުކާރަށް މަޖިލިހުގެ ތާއީދު ކޮންމެހެން ބޭނުންތެރިއޭ، އެއީ އަޅުގަޑަށްވެސް އިގޭ ވާހަކައެއް. ރައީސުލްޖުމުހޫރިއްޔާއަށްވެސް އެގިވަޑައިގަންނަވާ ވާހަަކައެއް. އަދި މިވަގުތު އެކަން އޮތީ އެހެންކަމަށް ރައީސުލްޖުމްުހޫރިއްޔާ ވިދާޅުވީ، އެއީ އަޅުގަޑަށް ޔަގީންކަމެއް، އަދި އިރާދަ ކުރެއްވިއްޔާ އެގޮތަށް އެކަން ބޭއްވުމަށް އަޅުގަޑުމެން އެންމެންވެސް މަސައްކަތް ކުރާން ޖެހޭނެ.
މީގެ އިތުރުންވެސް، ބަރުލާނީ ނިޒާމެއް ގެންނަވަން ކުރައްވަމުން ގެންދަވާ މަސައްކަތްތަކަށްވެސް ރައީސް ސާލިހުގެ ތާއީދު ފުރިހަމަޔަށް އޮތްކަމަށްވެސް މި ޕްރެސް ކޮންފަރެންސްގައި އެތައް ގޮތަކުން ނަޝީދުވަނީ ވިދާޅުވެ ދެއްވާފައެވެ. މިގޮތުން ކޯލިޝަން ޕާޓީތަކުން ފާޅުގައި އަދިވެސް ނިޒާމް ބަދަލުކުރުމަށް ދެކޮޅު ހަދަމުން ދިޔަނަަމަވެސް، އަދި ކޯލިޝަން މެނިފެސްޓޯގައި ނިޒާމު ބަދަލުކުރުމުގެ ވާހަކަ ނޯންނާނޭކަމަށް ސަރުކާރުންވެސް ކުރިން ހާމަކޮށް، ބަރުނަމާނީ ނިޒާމު ގެނައުމަށް ކުރެވެމުންދާ މަސައްކަތްތަކަށް ސަރުކާރުން ޖަވާބު ދެއްވާފައިވަނިކޮށް، ބަރުލަމާނީ ނިޒާމަކަށް ވެރިކަމުގެ ނިޒާމު ބަދަލު ކޮށްލުމަށް އެމްއާރުއެމްއާއި އަދާލަތު ޕާޓީގެ ތާއީދު އޮތްކަމަށް ވިދާޅުވަމުން، ނަޝީދު ވިދާޅުވެފައިވަނީ، ނިޒާމު ބަދަލުކުރުމަށް ފެންނަ ނުފެންނަ ވޯޓަކަށް ދިއުމަށް ރައީސުލްޖުމްހޫރިއްޔާވެސް ތާއީދު ކުރައްވާނޭ ކަމުގައެވެ.
ނަޝީދުގެ ޑީއެންއޭ ރައީސަށް އެގިވަޑައިގަންނަވާ!
ރައީސް ސާލިހުގެވެސް އަދި ނަޝީދުގެވެސް ގާތް ބައެއް ބޭފުޅުން ވިދާޅުވާ ގޮތުގައި، ޖުލައި 25ގައި ރައީސް ސާލިހު ބޭއްވެވި ޕްރެސް ކޮންފަރެންސްއަކީ، ފާއިތުވެދިޔަ ތަނުގައި ނަޝީދު ބައެއް ކަންކަމުގައި ދެއްކެވި ހަރުކަށިކަމާއި، އަދި ވިދާޅުވަމުން ގެންދެވި ގަދަ ބަސްތަކަށް ރައީސް ސާލިހު ދެއްވި ވަރަށް ފުރިހަމަ ފަރުވާއެކެވެ.
ސަބަބަކީ، އެމްޑީޕީގެ އެތެރޭގެ ކޯޅުންތައްކުގެ ހުޅު ރޯވެ، އަދަމުންދާތާ އެތައް ދުވަހެއް ފާއިތުވެ، އަދި އެންމެ ފަހުން ނަޝީދު ސީދާކޮށް ރައީސް ސާލިހަށް އަމާޒުކޮށް އެތަކެއް ބޮޑެތި ފާޑުވިދާޅުވުންތަކެއް އަމާޒުކުރައްވާ އަދި އެތަކެއް ތުހުމަތެއް ކުރައްވަމުން ގެންދެވިއިރުވެސް، ރައީސް ސާލިހު ވަނީ ހަނު ހުންނަވާފައެވެ. އަދި އެންމެ ފަހުން، މަޖިލިހުގައި ނަޝީދުގެ ފެކްޝަނަށް ނިސްބަތްވާ ބައެއް މެމްބަރުން ރައީސް ސާލިހުގެ އިސްތިއުފާއަށް ގޮވާ، އެތަކެއް ހައިޖާންތަކެއް ހިގައިދިޔަ އިރުވެސް ރައީސް ސާލިހުވަނީ ހަނު ހުންނަވާފައެވެ.
އެހެންނަމަވެސް، މިގޮތުގައި އެތަކެއް ދުވަހެއް ފާއިތު ކުރެއްވުމަށްފަހު، ޖުލައި 25ވަނަ ދުވަހުގެ ޕްރެސްގައި ރައީސް ސާލިހުވަނީ، ޝައްކެއް އުފެދިގެން ދިއުމަށް އެއްވެސް ޖާގައެއް ނުދެއްވާ، ނަޝީދުގެ ހުރިހާ އުދާސްތަކަށްވެސް ފުރިހަމަޔަށް ޖަވާބު ދެއްވާފައެވެ.
ގަބޫލުކުރެވޭ ގޮތުގައި، ރައީސް ސާލިހު ހުންނެވީ ނަޝީދުގެ ޖަޒުބާތުތަކާއި، އުދާސްތަކާއި، އަދި ކުރައްވަމުންގެންދަވާ ޝަކުވާތަކާއި، ދެއްވަމުން ގެންދަވާ އިންޒާރުތަކަށްވެސް ދޭންޖެހޭ ފަރުވާއާއި އަދި ނަޝީދުގެ ޑީއެންއޭވެސް ރަގަޅަށް ދެނެވަޑައިގެންނެވެ. އަދި އެންމެ އެކަށީގެންވާ ވަގުތު، ދެއްވަންޖެހޭ ފަރުވާ ދެއްވައިގެން ކުޅިފަސް ހޯއްދަވަމުން ރައީސް ސާލިހު ކުރިޔަށް ވަޑައިގަންނަވަމުން ގެންދަވާކަމާމެދު ޝައްކުކުރާނެ ޖާގައެއް އަދި މިވަގުތަށް އޮތް ކަމުގައި ދެންނެވޭކަށް ނެތެވެ.
ހަމަ އެއާއެކު، ކުއްލިއަކަށް ރައީސް ނަޝީދުގެ ރާގު މުޅިން ބަދަލުވެގެން ދިޔަދިއުން ގިނަބަޔަކު މޭރުން ކުރަނީ، ރައީސް ސޯލިހު ދޫނުދެއްވާ ގަދަކޮށްލެއްވީމަ ނަޝީދު އަމާންދެއްވި ދެއްވުމެއްގެ ގޮތުގައެވެ.
