ރައީސުލްޖުމްހޫރިއްޔާ އިބުރާހިމް މުހައްމަދު ސާލިހުވެސް އެދިވަޑައިގަންނަވާނީ، ބަރުލަމާނީ ނިޒާމަކަށް ދިއުމަށް ފެންނަ ނުފެންނަ ވޯޓެއް ނެގުމަށްކަމަށް، ރައްޔިތުންގެ މަޖިލިހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

އިނގިރޭސި ވިލާތުގައި ހުންނަވައިގެން މިއަދު ކުރިއަށް ގެންދެވި ނޫސްވެރިންގެ ބައްދަލުވުމުގައި ރައީސް ނަޝީދު ވިދާޅުވީ އެމަނިކްފާނަކީ އަބަދުވެސް ބަރުލަމާނީ ނިޒާމަށް އިންތިޒާރު ކުރާ މީހެއްކަމަށާއި، އެކަމަކީ އެމްޑިޕީގެ އެއްވެސް މެމްބަރަކަށް އޮޅިފައި އޮންނާނޭ ކަމެއް ނޫންކަމަށެވެ.

މި ނިއުސް ކޮންފަރެންސްގައި ނަޝީދު ވިދާޅުވީ، އެމްޑިޕީ މިފަހަރުގެ ރިޔާސީ އިންތިޚާބަށް ތައްޔާރުވަމުން ދިޔައިރު، ޕާޓީގެ ފަރާތުން އެކުލަވާލެވުނު މެނިފެސްޓޯގައިވެސް، ވެރިކަމުގެ ނިޒާމަކަށް ބަދަލުކުރުމަށް އެދޭކަން ހާމަކޮށްފައި ވާނެކަމަށާއި، އަދި އެއީ އެމްޑީޕީގެ އަމާޒެއްކަންވެސް ވަަރަށް ބޮޑަށް ސާފު ކޮށްދީފައި ވާނެކަމަށެވެ.

އޮންލައިންކޮށް ކުރިޔަށް ދިޔަ މި ޕްރެސް ކޮންފަރެންސްގައި ނަޝީދު ވިދާޅުވީ، ފާއިތުވެދިޔަ ރިޔާސީ އިންތިޚާބުގައި، އެކީ ވާދަކުރުމަށް ނިންމަވާ ގުޅިފައިވާ ޕާޓީތަކުން އެކުލަވާލި މެނިފެސްޓޯގައިވެސް، ޖުމުހޫރީ ޕާޓީ ފިޔަވާ، އެމްއާރުއެމްއާއި، އަދާލަތު ޕާޓީވެސް ނިޒާމު ބަދަލުކުރުމުގެ ގޮތުން ފެންނަ ނުފެންނަ ވޯޓަކަށް ދިއުމަށް އެއްބަސްވެ ވަޑައިގެންފައި ވާކަމުގައެވެ. ނަޝީދު ވިދާޅުވީ، އެހެންކަމުން އެމަނިކްފާނު ދެކެވަޑައިގަންނަވަނީ، މިކަމުގައި އެޕާޓީތަކުގެ އިންކާރުކުރުމެއް ނުވާނެ ކަމަށްކަމުގައެވެ.

އަދި ވިދާޅުވީ ހަމަ ކަށަވަރުންވެސް، މި ފެންނަ ނުފެންނަ ވޯޓެއް ނެގުމާ ގުޅޭގޮތުން އެމްޑީޕޭގެ އިންކާރު ކުރުމެއް ނުވާވާނެކަމަށާއި އެއީ ރައީސުލްޖުމްހޫރިއްޔާވެސް އެދިވަޑައިގަންނަވާނޭ ގޮތް ކަމުގައެވެ.

އެއީ އަޅުގަޑުވެސް، އަޅުގަޑަށް ޔަގީން ކަށަވަރު ރައީސުލްޖުމްހޫރިއްޔާވެސް އެދިވަޑައި ގަންނަވާނެ ގޮތް.

ނަޝީދު ވިދާޅުވިއެވެ.

މި ނޫސްވެރިންގެ ބައްދަލުވުމުގައި، ޖުމްހޫރީ ޕާޓީ ފިޔަވާ ކޯލިޝަންގެ އެހެން ޕާޓީތަކުން ނިޒާމް ބަދަލުކުރުމަށް ފެންނަ ނުފެންނަ ވޯޓަކަށް ދިއުމަށް އިންކާރު ނުކުރާނެ ކަމަށް ނަޝީދު ވިދާޅުވި ނަމަވެސް، ނަޝީދު ބޭއްވި ޕްރެސް ކޮންފަރެންސް ނިމުތާ ކުޑަ އިރުކޮޅެއް ތެރޭގައި އެމްއާރުއެމްއިން ކުރި ޓްވީޓެއްގައި ބުނެފައިވަނީ ރާއްޖޭގައި އޮންނަން ފެންނަކަމަށް އެޕާޓީއަށް ފެންނަ ނިޒާމަކީ ރިޔާސީ ނިޒާމުކަމަށެވެ. އަދި އެނޫން ނިޒާމެއް ރާއްޖެއަށް ގެނައުމަށް ތާއީދުކޮށް، އެއްވެސް ބަޔަކާއި އެގްރިމަންޓް ހަދައި، ވާހަކަ ދައްކާފައި ނުވާނެކަމަށްވެސް އެމްއާރުއެމްއިން ވަނީ ބުނެފައެވެ.

ނަޝީދުގެ ވާހަކަފުޅާ ގުޅޭގޮތުން، ޖުމްހޫރީ ޕާޓީގެ ޑެޕިއުޓީ ލީޑަރު އަމީން އިބުރާހިމް ވިދާޅުވެފައިވަނީ، ވެރިކަމަށް އައުމަށް އެކުލަވާލި އިއްތިހާދު މެނިފެސްޓޯގައި ނެތްކަމެއް، ވަކި މީހަކު ނުވަތަ ވަކި ޕާޓީއަކުން ބޭނުންވެގެން މެނިފެޓޯއަށް ވައްދަން މަސައްކަތް ކުރިޔަސް އެކަމަށް ނުކުރެވޭނެކަމުގައެވެ.

މިއަދު ޕްރެސް ކޮންފަރެންސްގައި، ނަޝީދު ވިދާޅުވީ ނިޒާމީ މައްސަލާގައި ރައްޔިތުންގެ ފެންނަ ނުފެންނަ ވޯޓެއް ނެގުނަކީ ރައީސް ޞާލިހު ދެކޮޅު ކަމެއް ނޫންކަމަށާއި، އަދި މިކަން ކުރެވެން އޮތީ ނިޒާމުގެ ވޯޓު ނަގައިގެން ރައްޔިތުންގެ ޚިޔާލު ހުރިގޮތް އެގުމުންކަމަށެވެ.

އެހެންނަމަވެސް ނިޒާމު ބަދަލުކުރުމަށް ނަޝީދު ކުރައްވަމުން ގެންދަވާ މަސައްކަތްތަކާ ގުޅޭގޮތުން ސަރުކާރުން ބުނެފައިވަނީ، އަމަލު ކުރަމުންދަނީ ކޯލިޝަން މެނިފެސްޓޯއަށް ކަމަށާއި، އެމެނިފެސްޓޯގައި ބަރުލަމާނީ ނިޒާމުގެ ވާހަކައެއް ނެތްކަމަށެވެ. ރައީސް އިބުރާހިމް މުހައްމަދު ސާލިހު ވިދާޅުވެފައިވަނީ، އެމަނިކްފާނުގެ އަމާޒުހުރީ ހަމައެކަނި ތަރައްގީގެ ވައުދުތައް ފުއްދުމަށް ކަމަށެވެ.