މެއި 6ގެ ހަމަލާއަށްފަހު ބޭސްފަރުވާއަށް މިވަގުތު ރާއްޖެއިން ބޭރުގައި ހުންނެވަން ޖެހުމަކީ މުސާރަތަކާއި، އިނާޔާތް ނުނަގަންޖެހޭ ސަބަބެއް ނޫންކަމަށާއި، އަދި މަޖިލީހުގެ ރައީސްގެ މަޤާމުންބެސް އިސްތިއުފާ ދެއްވަންޖެހޭ ސަބަބެއް ނޫންކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ހަމަލާއަށް ފަހު ފުރަތަމަ ފުރަތަމަ ފަހަރަށް ބޭއްވި ނޫސްވެރިންގެ ބައްދަލުވުމުގައި، ނަޝީދު މިއަދު ވިދާޅުވީ އެމަނިކުފާނު މިހާރުވެސް މަޖިލިސް އިން ދޭ މުސާރަ ނަންގަވާކަމަށެވެ. އެމަނިކުފާނަކީ، ލިބޭ މުސާރައިގެ އިތުރުން އެހެން އެއްވެސް ގޮތަކުން ފައިސާ ލިބޭނެ ގޮތެއް ހުރި މީހަކަށް ނުވުމުން މުސާރަ ނަންގަވާކަމަށެވެ. އަދި އެމަނިކުފާނަށް ދިމާވި ހާލަކީ އަމިއްލައަށް ހޯއްދެވި ހާލަތެއް ނޫންކަމަށާއި، މިހާލަތުގައި ބޭސްފަރުވާއަށާއި، ބޭރުގައި ހުންނަންޖެހޭ ޚަރަދު ކުރުމަށް ބޮޑެތި ހޭދަތައް ކުރަންޖެހޭކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ އެމަނިކުފާނު މަޖިލިސްގެ ރައީސްގެ މަޤާމުންވެސް އިސްތިއުފާ ދެއްވަންޖެހޭ ފަދަ ހާލަތެއް ނާންނަކަމަށެވެ. އަދި އެމަނިކުފާނު ބޭސްފަރުވާއަށް ރާއްޖެއިން ބޭރުގައި ހުންނެވުމަކީ މަޖިލިސް ހުއްޓުމަކަށް އަންނަޖެހޭ ސަބަބެއްވެސް ނޫންކަމަށެވެ. ރައީސް ނަޝީދު ވިދާޅުވީ މަޖިލިސްގެ މަސައްކަތްވެސް އަދި އެމްޑީޕީގެ މަސައްކަތްތައްވެސް ބަރާބަރަށް ކުރިއަށްދާކަމަށެވެ.
ރައީސް ނަޝީދު ވިދާޅުވީ އެމަނިކުފާނު ޞިއްޚީ ކަމެއްގައި ރާއްޖެއިން ބޭރުގައި ހުންނެވިއިރު، މަޖިލިސްއަށް ދޮޅު އަހަރު ވަޑައި ނުގެން މުސާރަ ބަރާބަރަށް ނެންގެވި މެމްބަރުން ތިއްބެވިކަމަށެވެ. އަދި އެބޭފުޅުނަކީ މާލީ ގޮތުން ބޮޑެތި ތަނަވަސްކަން ހުރި ބޭފުޅުންނަށްވާއިރު، އެބޭފުޅުންވެސް އެހާލަތުގައި މުސާރަ ބަރާބަށް ނަންގަވަމުން ގެންދެވިކަމަށެވެ.
2 Responses
ކުރިންބުނި ހެޔޮއެދޭ ފަރާތެއްގެ އެހީގައޭ ބޭސްކުރަނީ!؟
މައިކާލެއަކޭމީހެއް