ރައީސް ޔާމީންނަށް ޙުކުމް އިއްވެވި ފަނޑިޔާރުން ތިއްބަވާނީ ޕީޕިއެމްގެ ވެރިކަމެއްގައި ޖަލުގައިކަމަށް ޕީޕީއެމްގެ ނާއިބު ރައީސް އިބްރާހީމް ޝުޖާޢު ވިދާޅުވުމާއި ގުޅިގެން، އެއީ ފަނޑިޔާރުންނަށް ބިރުދެއްކުމުގެ ޢަމަލެއްކަމަށް ދީނީ ޢިލްމުވެރިޔާ ޑރ.މުޙައްމަދު އިޔާޒް ޢަބްދުއްލަޠީފް ވިދާޅުވެއްޖެެވެ.

ރޭ އިދިކޮޅުން އިންތިޒާމްކޮށްގެން މާލޭ ކާނިވާ ސަރަހައްދުގައި ބޭއްވި “އައްޑަނަ” ޖަލްސާގައި ވާހަކަފުޅު ދައްކަވަމުން ޝުޖާޢު ވިދާޅުވީ، ރައީސް ޔާމީންގެ މައްޗަށް ޙުކުމް އިއްވެވި ފަނޑިޔާރުންގެ މައްސަލަ ބައްލަވާނެކަމަށެވެ. އޭނާ ވިދާޅުވީ 2023ގައި ޤާއިމްކުރެވޭނީ ޕީޕީއެމްގެ ސަރުކާރެއްކަމަށާއި، އެ ސަރުކާރުގައި އެ ފަނޑިޔާރުންގެ މައްސަލަ ބެލޭނެކަމަށެވެ. ޝުޖާޢު ވިދާޅުވީ، ރައީސް ޔާމީންގެ މައްޗަށް ޙުކުމް އިއްވެވި ބެންޗުގައި ހިމެނިވަޑައިގެންނެވި ފަނޑިޔާރުންނަށް ވަޒީފާގެ ކުރިއެރުން ދެއްވަނުން އުޅުއްވާކަން އެނގިވަޑައިގަންނަވާނެކަމަށާއި، ޕީޕީއެމްގެ ވެރިކަމެއްގައި ހައިކޯޓުގައިވެސް އެ ފަނޑިޔާރުން ނުއިންނަވާނެކަމަށް ވިދާލުވެ ޝުޖާއު ވަނީ އެ ފަނޑިޔާރުން ތިއްބަވާނީ ޖަލުގައިކަމުގެ އިންޒާރު ދެއްވާފައެވެ.

ޝުޖާއުގެ އެ ވާހަކަތައް އިޝާރާތްކުރައްވާ ޑރ.އިޔާޒް ވިދާޅުވީ، އެއީ ފަނޑިޔާރުންނަށް ބިރުދެއްކުމުގެ ޢަމަލެއްކަމަށެވެ. އަދި ކިތަންމެ ގާތް މީހަކު ނަމަވެސް ކުއްވެރިވެއްޖެކަން ޝަރްޢީ ކޯޓަކަށް ޘާބިތުވެ އެކަމާ ހިތްހަމަ ނުޖެހޭނަމަ، ހަދަންޖެހޭ ގޮތަކީ މަތީ ކޯޓަކަށް އިސްތިއުނާފު ކުރުންކަމަށާއި، އިންޒާރު ދިނުމެއް ނޫންކަމަށް ޑރ.އިޔާޒް ވިދާޅުވިއެވެ. އަދި ކޮންމެ ކަމެއްގައިވެސް ހަމަ އާއި އުޞޫލު އޮންނާނެކަމަށްވެސް ޑރ.އިޔާޒް ވިދާޅުވިއެވެ.

މިއީ ފަނޑިޔާރުންނަށް ބިރުދެއްކުމުގެ ޢަމަލެއް. ކިތަންމެ ގާތް މީހަކު ނަމަވެސް ކުއްވެރިވެއްޖެކަން ޝަރްޢީ ކޯޓަކަށް ޘާބިތުވެ އެކަމާ ހިތްހަމަ ނުޖެހޭ ނަމަ، ހަދަންޖެހޭ ގޮތަކީ މަތީ ކޯޓަކަށް އިސްތިއުނާފު ކުރުން. އިންޒާރު ދިނުމެއް ނޫން. ކޮންމެ ކަމެއްގައި ވެސް ހަމަ އާއި އުޞޫލު އޮންނާނެ.

— Dr.Mohamed Iyaz (@dr_iyaz) September 4, 2021

ރޭ އިދިކޮޅުގެ ޖަލްސާގައި ޝުޖާޢު ވިދާޅުވީ، ރައީސް ޔާމީނަށް ޙުކުމް އިއްވެވުމުގައި އެންމެ އިސްކޮށް ހުންނެވީ ޢަލީ ރަޝީދުކަމަށާއި، އޭނާވެސް ޖަލަށް ލައްވާނެކަމަށެވެ.

ޝުޖާޢު މިހެން ވިދާޅުވެފައިވާއިރު، ރައީސް ޔާމީން ފަސް އަހަރަށް ޖަލަށްލައި 5 މިލިއަން ޑޮލަރުން ޖޫރިަނާކުރި ޙުކުމް އިއްވެވި އޭރު ކްރިމިނަލް ކޯޓުގެ އިސް ޤާޟީއަކަށް ހުންނެވި އަޙްމަދު ޙައިލަމް ސަސްޕެންޑުކުރައްވާ އިސް ޤާޟީއަކަށް ޢަލީ ރަޝީދުއ ައްޔަންކުރެއްވުމަށްފަހުއެވެ. އަދި އޭގެ ފަހުން ޢަލީ ރަޝީދު ވަނީ ސުޕްރީމް ކޯޓުގެ ފަނޑިޔާރަކަށް އައްޔަންކުރައްވާފައެވެ.

ސަރުކާރަށް ފާޑުވިދާޅުވެ ވާހަކަފުޅު ދައްކަވަމުން ޝުޖާއު ވިދާޅުވީ، މި ސަރުކާރުގައި ތިއްބެވީ “ވަގުން”ކަމަށާއި، އެންމެ ފަހުވަގުތު އެބޭފުޅުން ރައިސް އިބްރާހީމް މުޙައްމަދު ޞާލިޙް ދޫކޮށްވަޑައިގަންނަވާނެކަމަށެވެ.