މިމަހުގެ 19ވަނަ ދުވަހު ކ.ރަސްފަރި ފަރަށް އެރި އާގު ބޯޓުގެ މައްސަލަ ރައްޔިތުންގެ މަޖިލީހަށް ހުށަހަޅައިފިއެވެ.
ބޯޓުގެ މައްސަލަ މަޖިލީހަށް ހުށަހެޅުއްވީ ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު މުހައްމަދު ރާއީއެވެ. މައްސަލަ ބަލައި ގަތުމަށް މަޖިލީހުން ފާސްކޮށްފައިވަނީ 35 ވޯޓުންނެވެ. ބަހުސްގެ މަރުހަލާގައި މައްސަލަ ހުށަހެޅުމަށްފަހު ރާއީ ވިދާޅުވީ މިމައްސަލައަކީ ވަރަށް ސީރިއަސް މައްސަލައެއްގެ ގޮތުގައި ބަލަންޖެހޭ ކަމެއްކަމަށެވެ.
ބޯޓުގެ ކެޕްޓަންގެ ބޮޑު އިހުމާލަކުން މިފަދަ ކަމެއް ހިނގާފައިވާއިރު، މިއީ ރާއްޖެފަދަ ނާޒުކު ތިމާވެއްޓެއް އޮތް ޤައުމަކުން ނުހަނު ވިސްނަންޖެހޭ ކަމެއްކަމަށެވެ. މިބޯޓަކީ ކޮންޓައިނަރުތައް ހުރި، ނުވަތަ ތެޔޮ ހުރި ބޯޓަކަށް ވީނަމަ އެސަރަހައްދުގެ ކަނޑަށާއި، ފަރަށް ލިބޭނެ ގެއްލުން އިތުރަށް ބޮޑުވީސްކަމަށް ރާއީދު ވިދާޅުވިއެވެ. މިމައްސަލައަކީ މިފަދަ ކަންކަން ތަކުރާރު ވިޔަ ނުދިނުމަށް ކަމާއި ގުޅުންހުރި އިދަރާތަކުން މަސައްކަތްކޮށް، އަދި މިކަން ހިނގާދިޔަ ގޮތުގެ ތަފްސީލް ހޯދުމަށް ހުށަހެޅި މައްސަލައެއްކަމަށް އޭނާ ވިދާޅުވިއެވެ.
ރަސްފަރީ ފަރަކީ ގުދުރަތީ ގޮތުން ރީތި އަދި ޙިމާޔަތްކޮށްފައިވާ ސަރަޙައްދަކަށްވެފައި، އެ ބޯޓު ފަރަށް އަރާފައިވާއިރު ދިވެހިރާއްޖޭގެ ކަމާގުޅޭ އެއްވެސް އިދާރާއަކަށް އެ ހާދިސާ ހިނގާފައިވާކަން ނޭނގި އޮތްއޮތުމުގެ ސަބަބުން އެ ސަރަޙައްދުގެ ތިމާވެށި ބޮޑު ނުރައްކަލަކަށް ހުށަހެޅިފައިވާކަމަށްވެސް މިމައްސަލާގައި ބުނެފައިވެއެވެ.
ރަސްފަރި ފަރަށް އެރި އާގު ބޯޓު އިއްޔެވަނީ ފުންކޮށްފައެވެ. ޕެނަމާގައި ރަޖިސްޓްރީކޮށްފައިވާ މި ބޯޓު ފަރަން އަރާފައިވަނީ ބޯޓުގެ އިންޖީނެއްގެ ހޫނުމިން މާބޮޑަށް މަތިވެގެން، އިންޖީނު ނިއްވާލުމުގެ ސަބަބުން ބޯޓު ބީހިގެންކަމަށް މަޢުލޫމާތު ލިބިގެންނެވެ.
ކޮމެންޓު ފޮނުވާ