ބިންމަތީގައި ފަސާދައާއި، މަސްލަހަތު ގެއްލޭ ގޮތަށް ޝަރުއީ މަރުހަލާއިން ކަންކަން ނިންމައިގެން ނުވާނެކަމަށް އަދާލަތު ޕާޓީގެ އިލްމުވެރިންގެ މަޖިލީހުގެ ދެ އިލްމުވެރިން ކަމުގައި ޝައިޚު އަލީ ޒައިދުއާއި، ޝައިޚު އިޔާޒު ވިދާޅުވެއްޖެއެވެ.
ކުރީގެ ރައީސް ޔާމީނަށް ހުކުމްކުރި 3 ފަނޑިޔާރެއްހެ އޯޑިއޯ ލީކުވެ ދައްކަވާފައިވާ ވާހަތަކާއި ގުޅިގެން ޑރ.އިޔާޒު ވިދާޅުވީ ކުށެއް ނުކުރާ މީހަކީ ކުށެއް ކުރި މީހަކަށް ހެދުމަކީ އިންސާފެއް ނޫންކަމަށެވެ. އަދި ކުއްވެރިޔަކު ކުށްވެރި ނުވާ މީހަކަށް ހެދުމަކީވެސް އިންސާފެއް ނޫންކަމަށެވެ. ހައްޤު ގޮތުގައި އަދުލު އިންސާފު ގާއިމް ކުރުމަކީ މުޖުތަމައުގެ މަސްލަހަތާއި ގުޅިފައިވާ ކަމަކަށްވާއިރު، އެމަގުން ޝަރީއަތުން ކަންކަން ނިމެންޖެހޭކަމަށް ޑރ.އިޔާޒު ވިދާޅުވިއެވެ.
ކުށެއް ނުކުރާ މީހަކު ކުއްވެރިޔަކު ކަމުގައި ހެދުން, އަދި ކުއްވެރިޔަކު ކުށެއް ނުކުރާ މީހަކު ކަމުގައި ހަދަން މަސައްކަތް ކުރުމަކީ ބިންމަތީ ފަސާދަ އުފެއްދުމުގެ ގޮތުން ކުރެވޭނެ އެންމެ ނުބައި އެއްކަންތައް. ރުހުނަސް ނުރުހުނަސް ޙައްގުވާނީ ޙައްގަށް. ބާޠިލްވާނީ ބާޠިލަށް.
– ޑރ.އިޔާޒު ވިދާޅުވިއެވެ.
މިމައްސަލާގައި ޝައިޚު ޒައިދު ވިދާޅުވީ ފަނޑިޔާރުންނަކީ އަބަދުވެސް ނަޒާހާތް ތެރި ބަޔަކަސް ވާންޖެހޭ ކަމަށެވެ. އަމިއްލަޔަށް ކުރާ ހުކުމާއިމެދު އަމިއްލަޔަށް ސުވާލު އުފައްދައި، އެކަމުގައި އަމިއްލަ މަސްލަހަތަށް ފައިދާވާގޮތަށް ކަންކަން ކޮށްފައިވާކަމަށް ވާހަކަ ދެއްކުމަކީ އިންސާފުން ބޭރުންވުންކަމަށް ޒައިދު ވިދާޅުވިއެވެ.
ފަނޑިޔާރުންނަކީ ވަރަށް ނަޒާހާތްތެރި ބަޔަކަށް ވާންޖެހޭ! ފަނޑިޔާރަކު އަމިއްލައަށް ތިމަންނަ ހުކުމް ކުރީ ގޯސްކޮށޭ އެކިކަހަލަ ނުފޫޒު ތަކުގައި ޖެހުނޭ ނުވަތަ ވަކި ފަރާތަކަށް މަންފާ ހޯދާދޭން މަސައްކަތް ކުރީމޭބުނާ ހިސާބުން އޭނާއެ މަޤާމަށް ޝަރުތުހަމަ ނުވޭ! މިއީ ވަރަށް ސީރިއަސް މައްސަލައެއް. އަމިއްލަ ނަފްސަށް ނުބައި ކަމަކަށް އިޤުރާރުވާނަމަ އެއްވެސް އިތުރު ހެއްކެތް ނޭނުން ނުވާނެ! އެއީ އެ އިޤްރާރަކީ އެންމެ ބޮޑު ހެކި ކަމުގައިވާތީ. ނަމަވެސް މީހަކު އަނެއްކާ އެއަށް ތުހުމަތު ކުރަންޏާ، ތުހުމަތު ކުރާ ފަރާތުން ހެކި ގެންނަން ވާނެ! ނޫނީ އެތުހުމަތު ބާތިލްވާނެ.
– އަލީ ޒައިދު ވިދާޅުވިއެވެ.
ކުރީގެ ރައީސް އަބްދުﷲ ޔާމީނަށް ކުރި ހުކުމާ ގުޅޭ ގޮތުން އެ ހުކުމް އިއްވި ބެންޗުގައި އިންނެވި ތިން ފަނޑިޔާރަކު ވާހަކަ ދައްކަވާ އޯޑިއޯތަކެއް މިހާރު ވަނީ އާންމުވެފައެވެ. އެ އޯޑިއޯތަކުގައި އެ ފަނޑިޔާރުން ވަނީ ރައީސް ޔާމީނަށް އިއްވި ހުކުމާމެދު ސުވާލު އުފެދޭނެ އެތައް ވާހަކަތަކެއް ވިދާޅުވެފައެވެ. އެއް ފަނޑިޔާރަކު ވިދާޅުވި ގޮތުގައި އެ ހުކުމަކީ ފަނޑިޔާރުންނަށް މަޖުބޫރު ކުރުވައިގެން އިއްވެވި ހުކުމެކެވެ. އެހެން ފަނޑިޔާރަކު ވިދާޅުވީ ހުކުމްގައި އޮތް އެއްޗެއްވެސް އެނގިވަޑައިނުގަންނަވާ ކަމަށާ ބެންޗުގައި އިންނެވީ ސަރުކާރުން އަންގަވައިގެން ކަަމަށެވެ.
އެ އޯޑިއޯތަކާއި ގުޅިގެން ޕީޕީއެމް އާއި ޕީއެންސީގެ ޖޮއިންޓް ކައުންސިލް ބައްދަލްވުމެއް ރޭ ވަނީ ބާއްވާފައެވެ. ބައްދަލްވުމަށް ވަނީ ރައީސް ޔާމީން އެއްވެސް ޝަރުތެއް ނެތި މިނިވަން ކުރުމަށް ގޮވާލާ ގަރާރެއް ހުށައަޅާފައެވެ. މި އިސްލާހާއެކު ގަރާރު ފާސްކުރީ ބައްދަލްވުމުގައި ބައިވެރިވި މެންބަރުންގެ އިއްތިފާގުންނެވެ.
