ކުރީގެ ރައީސް އަބްދުﷲ ޔާމީން އަބްދުލް ޤައްޔޫމް އެއްވެސް ޝަރުތަކާއި ނުލައި ވަގުތުން ވަގުތަށް މިނިވަން ކުރުމަށް ގޮވާލައި ކުއްލި ޤަރާރެއް އިދިކޮޅު ޕްރޮގްރެސިވް ކޮންގްރެސް ކޯލިޝަނަށް ހުށަހަޅައިފިއެވެ.
އިދިކޮޅު ޕްރޮގްރެސިވް ކޮންގްރެސް ކޯލިޝަންގެ ލީޑަރޝިޕުން މިރޭ ބޭއްވި ކޯލިޝަންގެ ކުއްލި ކައުންސިލަށް ހުށަހެޅި ޤަރާރުގައި ބުނެފައިވަނީ ރައީސް ޢަބްދުﷲ ޔާމީން ޢަބްދުލްޤައްޔޫމްގެ މައްޗަށް ކްރިމިނަލް ކޯޓުން ކޮށްފައިވާ ޙުކުމަކީ ޣައިރު ޤާނޫނީ ޙުކުމެއްކަމަށް އެކޯލިޝަނުންނާއި ދިވެހި ރައްޔިތުންގެ ތެރެއިން ގިނަ ބަޔަކު ބުނަމުން ދަނިކޮށް، މިއަދު ޢާންމުވެފައިވާ އޯޑިއޯ ތަކަކުން، އެމައްސަލަ ބެއްލެވި 5 ފަނޑިޔާރުންގެ ބެންޗުގައި ހިމެނިވަޑައިގަންނަވާ 3 ފަނޑިޔާރަކު އެޙުކުމަކީ ގަދަބާރުން އެ ފަނޑިޔާރުންނަށް ބިރު ދައްކާ ނުފޫޒު ފޯރުވާ، ރަހީނުކޮށްގެން އަދި އޮޅުވާލައިގެން ކުރެވިފައިވާ ހަމަ ޙަޤީޤަތުގައިވެސް ނުޙައްޤު ޙުކުމެއްކަމަށް އެ ފަނޑިޔާރުންވެސް ޤަބޫލު ކުރާކަން މިއަދު ވަނީ ރައްޔިތުންނަށް ހާމަވެ، ސަރުކާރު ފަޟީޙަތްވެފައި ކަމަށެވެ.
އެހެންކަމުން އެ ޙުކުމަކީ ޣައިރުޤާނޫނީ ޙުކުމެއްކަމަށް ފަނޑިޔާރުންގެ ބެންޗުގެ އަޣްލަބިއްޔަތު ބުނަމުން ދާތީ، އެ ޙުކުމަކީ ބާޠިލު ޙުކުމެއްކަމަށް ކަނޑައެޅުމާއެކު، މިހާރުން މިހާރަށް ރައީސް ޢަބްދުﷲ ޔާމީން ޢަބްދުލްޤައްޔޫމް އެއްވެސް ޝަރުތަކާ ނުލާ މިނިވަން ކުރުމަށް ޤަރާރުގައި ގޮވާލާފައިވެއެވެ.
މިޤަރާރަށް ކައުންސިލްގައި ދަނީ ބަހުސް ކުރެވެމުންނެވެ. މިރޭ މި ޤަރާރު ފާސްކުރުމަށްފަހު، ކޯލިޝަނުން އަމަލު ކުރާނެ ގޮތެެއް ހާމަ ކުރާނެކަމަށް ވަނީ ބުނެފައެވެ.
އޯޑިއޯ ލީކުވުމާއި ގުޅިގެން ޖޭއެސްސީން ބުނެފައިވަނީ އަމިއްލަ ފަރުދަކު ވިޔަސް، ދައުލަތުގެ ކަމެއް ހިންގުމާ ހަވާލުވެ ހުރި މީހަކު ވިޔަސް ފަނޑިޔާރުންގެ މަސައްކަތާ ބެހި ނުފޫޒު ފޯރުވާ ކަމަށް ކުރެވޭ ތުހުމަތުތައް ވަކިން ހާއްސަ އިސްކަމެއް ދީގެން ބަލާނެ ކަމަށެވެ. އެންމެ ފުރަތަމަ މިއަދު ލީކުވީ ގާޒީ ފާއިޒު، މީހަކާ ވާހަކަ ދައްކާ ރެކޯޑިން އެކެވެ. އެއަށް ފަހު ގާޒީ އަލީ އާދަމާއި ސަމީރުގެ އޯޑިއޯތަކެވެ. އެ އޯޑިއޯތަކުގައި ވަނީ ޔާމީންގެ މައްސަލައިގެ ތެރެއަށް ނުފޫޒު ފޯރުވާފައިވާ ކަމަށް ދޭހަވާ މޭރުމަކުން ވާހަކަ ދައްކައިފަ އެވެ.
ރައީސް ޔާމީންގެ މައްސަލަ ބަލަން ފަސް ފަނޑިޔާރުންގެ ބެންޗެއް އެކުލަވައިލީ އެ މައްސަލަ ކުރިން ބެއްލެވި ގާޒީ އަހުމަދު ހައިލަމް ސަސްޕެންޑު ކުރުމުން އެ މައްސަލައާ ހަވާލުވި ގާޒީ އަލީ ރަޝީދުގެ ނަޒާހަތްތެރިކަމާ މެދު ޔާމީންގެ ފަރާތްޕުޅުން ސުވާލު އުފައްދަނިކޮށެވެ.
ޔާމީން ޖަލަށް ލާން ހުކުމް ކުރެއްވި ފަހުން ގާޒީ އަލީ ރަޝީދު ސުޕްރީމް ކޯޓަށް އައްޔަން ކުރުމުން ވެސް ޔާމީންގެ ވަކީލުންނާއި އިދިކޮޅުގެ ފާޑުކިޔުން އަމާޒުވި އެވެ. އެ ފަރާތްތަކުން ބުނާ ގޮތުގައި އެއީ ޔާމީންގެ މައްސަލަ ވަކި ގޮތަކަށް ނިންމުމުގެ ބަދަލުގައި ގާޒީ އަލީ ރަޝީދަށް ދިން "ޕްރޮމޯޝަން" އެކެވެ.
