ރާއްޖޭގެ ވެރިކަމުގެ ނިޒާމް ބަރުލަމާނީއަށް ބަދަލުކުރުމަށް ގޮވާލާ ސޮއިކުރަމުންދާ ޕެޓިޝަނަކީ އެމްޑީޕީން ކުރިއަށްގެންދާ ހަރަކާތެއްކަމަށް ގިނަބަޔަކަށް ހީވެފައިވަނީ އެޕާޓިގެ ރަސްމީ ޓްވިޓަރ އެކައުންޓުން ޕެޓިޝަންގައި ސޮއިކުރުމަށް އަންގާތިކަމަށް އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ. ރޮޒައިނާ މިހެން ވިދާޅުވީ، ބަރުލަމާނީ ޕެޓިޝަނުގައި ސޮއިކުރަނީ އެމްޑީޕީއަކުން ނޫން ކަމަށާއި އެކަމުގައި އުޅެނީ އަމިއްލަ ޖަމާއަތަކާއި ރައްޔިތުންގެ މަޖިލީހުގެ އެމްޑީޕީގެ މެމްބަރުންތަކެއް އެމްޑީޕީގެ ޗެއަރޕާސަން ޙަސަން ލަޠީފް ވިދާޅުވުމާއި ގުޅިގެންނެވެ. ރޮޒައިނާ ވަނީ އެކަން ސާފުކޯށްދެއްވީތީ ޗެއަރޕާސަންއަށް ޝުކުރު އަދާކުރައްވާފައެވެ.

ރޮޒައިނާ ވިދާޅުވީ، ބަރުލަމާނީ ޕެޓިޝަންގައި ސޮއިކުރުމަކީ އެޕާޓިގެ ހަރަކާތެއްކަމަށް ބައެއް މީހުންނަށް އޮޅޭ ގޮތްވަނީ ބައެއްގެ އަމިއްލަ ކަމެއްގަ ބައިވެރިވާން އެމްޑީޕީގެ ރަސްމީ ޓްވިޓަރ އެކައުންޓުން އަންގާތީކަމަށް ވެދާނެކަމަށެވެ.

ބައެއް މީހުންނަށް އޮޅޭ ގޮތްވަނީ ބަޔަކު ތާކުކުރާ އަމިއްލަ ކަމެއްގަ ބައިވެރިވާން އެމްޑީޕީގެ ރަސްމީ ޓްވިޓަރ އެކައުންޓުން އަންގާތީކަމަށްވެސް ވެދާނެ.

– ރޮޒައިނާ އާދަމް

އެމްޑީޕީގެ ޗެއަރޕާސަން ޙަސަން ލަޠީފް ވިދާޅުވީ، ބަރުލަމާނީ ނިޒާމަށް ތާއީދު ހޯދުމަށް ކުރިއަށްގެންދާ ޕެޓިޝަނުގައި ސޮއިކުރުމުގެ ކަންކަން އެމްޑީޕީގެ އޮފީހުގައި ނުކުރާކަމަށެވެ. މެންބަރުން އެދޭ އެފަދަ ހަަރަކާތްތަކަށް ޕާޓީގެ ހަރުގެ އާއި ޖަގަހަތައް ބޭނުންކުރާ އުސޫލެއް އެމްޑީޕީގައި އޮންނަކަމަށް ޙަސަން ވިދާޅުވިއެވެ.

ބަރުލަމާނީ ޕެޓިޝަނަކީ އެމްޑީޕީން އެންޑޯޒް ކޮށްގެން ކުރާކަމެއްނޫން: ހަސަން

ބަރުލަމާނީ ނިޒާމު ގެންނަން އެމްޑީޕީގެ ބައެއް މެމްބަރުން ކުރައްވާ ކެމްޕެއިނަށް، އެ ޕާޓީން އެންޑޯޒް ކުރީތޯ ނޫސްވެރިއަކު ސުވާލުކުރުމުން، ޙަސަން ލަޠީފް ވިދާޅުވީ، އެޕާޓިން އެގޮތަކަށް ކަމެއް ކުރާނަމަ އެކަން ކުރާނީ ވަރަށް ސާފުކޮށްކަމަށެވެ. އެމްޑީޕީން އެންޑޯޒް ކޮށްގެން އެ ކެމްޕެއިން ކުރިއަށް ގެންދާނަމަ ހަރުގޭގެ ތެރޭގައި އެހާ ފަނޑު ގޮތަކަށް އެކަން ކުރިއަށް ނުގެންދާނެ ކަމަށްވެސް އެމްޑީޕީގެ ޗެއަރޕާސަން ވިދާޅުވިއެވެ.

ތިބޭފުޅުންނަށް މާސާފުކޮށް އެނގިވަޑައި ގަންނަވާނެ އެމްޑީޕީން ކަމެއް އެންޑޯޒް ކުރާއިރު އެއީކީ ހަރުގެއްގެ ތެރޭގައި އެހެން ވަރަށް ފަނޑު ގޮތަކަށް ހިނގާނެ ކަންކަމެއްނޫން. އެމްޑީޕީން ކަމެއް އެންޑޯޒް ކުރެވިގެންދާއިރު ހަމަޔަގީނުންވެސް މީޑިއާގައި މަސައްކަތް ކުރައްވާ ބޭފުޅުންނަށް އެގިވަޑައިގަންނަވާނެ. އަދި ޕާޓީގެ މެމްބަރުންނަށްވެސް ވަރަށް ސާފުކޮށް އެގޭނެ. ޕަޓީގެ ނުގަންތަކުން ނިންމައިގެން ނޫނީ މިޕާޓީން އެފަދަ ކަންކަމެއް ނުނިންމާނެ. އެހެންނަމަވެސް ޕަޓީގެ ވަރަށް ގިނަ މެމްބަރުން އެކަމުގައި ބައިވެރިވެގެން އުޅޭކަން އަޅުގަނޑު ފާހަގަކުރަން.

– ހަސަން ވިދާޅުވިއެވެ.

ހަސަން ވިދާޅުވީ ޕެޓިޝަންގައި ސޮއިކުރުމުގެ މަސައްކަތް ކުރިއަށްދަނީ ޕާޓީގެ މެމްބަރުންގެ ތެރެއިން ގިނަ ބައެއްހެ އެހީތެރިކަމާއިއެކުގައި ކަމަށެވެ. މި ޕެޓިޝަނަކީ އާންމު ޖަމްއިއްޔާއަކުން އިސްނަގައިގެން ހަދާ ޕެޓިޝަނެއްކަމަށް ހަސަން ވިދާޅުވިއެވެ. އަދި ޕެޓިޝަންގެ އެއްވެސް މަސައްކަތެއް ޕާޓީގެ އޮފީހުގައި ކުރިއަށް ނުދާނެކަމަށް އޭނާ ވިދާޅުވިއެވެ.