ބަރުލަމާނީ ނިޒާމް ގެންނަން، ގާނޫނު އަސާސީ އިސްލާހު ކުރުމުގެ ކަންކަން އަވަސްކުރުމަށް ގޮވާލައި ރައީސުލްޖުމްހޫރިއްޔާއަށް ހުށައަޅާ ޕެޓިޝަނަކީ އެމްޑީޕީން އެންޑޯޒްކޮށްގެން ތައްޔާރު ކުރާ ޕެޓީޝަނެއް ނޫންކަމަށް އެމްޑީޕީގެ ޗެއާޕާސަން ހަސަން ލަތީފް ވިދާޅުވެއްޖެއެވެ.

އެމްޑީޕީގެ ރައީސް މުހައްމަދު ނަޝީދާއި، އެމްޑީޕީގެ މަޖިލިސް މެމްބަރުންނާއި، ބައެއް އާންމު މެމްބަރުންވެސް ޕެޓިޝަންގައި ސޮއިކުރުމުގެ މަސައްކަތް ކުރަމުންދާއިރު، މި ޕެޓިޝަނަކީ އެމްޑީޕީގެ އެއްވެސް ކޮމިޓީއަކުން ނޫނީ އެމްޑީޕީން އެންޑޯޒް ކޮށްގެން ހަދާ ޕެޓިޝަނެއްތޯ ބައެއް ފަރާތްތަކުން ދަނީ ސުވާލު އުފައްދަމުންނެވެ.

އެމްޑީޕީގެ އިސް ބޭފުޅުން އެކުލަވާލާ މި ޕެޓިޝަނާއި ގުޅިގެން އެޕާޓީގެ ޗެއާޕާސަން ހަސަން ލަތީފް ވިދާޅުވީ މިއީ އެމްޑީޕީގެ އެއްވެސް ގުނަންތަކަކުން ސޮއިކޮށްގެން ހަދާ ޕެޓިޝަނެއް ނޫންކަމަށެވެ. އެމްޑީޕީން އެންޑޯޒްކޮށްގެން ކުރާ ކަންކަމަކީ މިހާ ފަނޑުކޮށް ކުރެވޭ ކަމެއް ނޫންކަމަށާއި، އެމްޑީޕީން ރަސްމީކޮށް އެންޑޯޒްކޮށް ޕާޓީގެ ގޮފިތަކާއި، ގުނަންތަކުން ނިންމާ ކަންކަމަކީ ވަރަށް ފޯރީގައި ކުރިއަށްދާނެ ކަންތައްތަކެއްކަމަށް ހަސަން ވިދާޅުވިއެވެ.

ތިބޭފުޅުންނަށް މާސާފުކޮށް އެނގިވަޑައި ގަންނަވާނެ އެމްޑީޕީން ކަމެއް އެންޑޯޒް ކުރާއިރު އެއީކީ ހަރުގެއްގެ ތެރޭގައި އެހެން ވަރަށް ފަނޑު ގޮތަކަށް ހިނގާނެ ކަންކަމެއްނޫން. އެމްޑީޕީން ކަމެއް އެންޑޯޒް ކުރެވިގެންދާއިރު ހަމަޔަގީނުންވެސް މީޑިއާގައި މަސައްކަތް ކުރައްވާ ބޭފުޅުންނަށް އެގިވަޑައިގަންނަވާނެ. އަދި ޕާޓީގެ މެމްބަރުންނަށްވެސް ވަރަށް ސާފުކޮށް އެގޭނެ. ޕަޓީގެ ނުގަންތަކުން ނިންމައިގެން ނޫނީ މިޕާޓީން އެފަދަ ކަންކަމެއް ނުނިންމާނެ. އެހެންނަމަވެސް ޕަޓީގެ ވަރަށް ގިނަ މެމްބަރުން އެކަމުގައި ބައިވެރިވެގެން އުޅޭކަން އަޅުގަނޑު ފާހަގަކުރަން.

– ހަސަން ވިދާޅުވިއެވެ.

ހަސަން ވިދާޅުވީ ޕެޓިޝަންގައި ސޮއިކުރުމުގެ މަސައްކަތް ކުރިއަށްދަނީ ޕާޓީގެ މެމްބަރުންގެ ތެރެއިން ގިނަ ބައެއްހެ އެހީތެރިކަމާއިއެކުގައި ކަމަށެވެ. މި ޕެޓިޝަނަކީ އާންމު ޖަމްއިއްޔާއަކުން އިސްނަގައިގެން ހަދާ ޕެޓިޝަނެއްކަމަށް ހަސަން ވިދާޅުވިއެވެ. އަދި ޕެޓިޝަންގެ އެއްވެސް މަސައްކަތެއް ޕާޓީގެ އޮފީހުގައި ކުރިއަށް ނުދާނެކަމަށް އޭނާ ވިދާޅުވިއެވެ.