ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަށް ބަދަލުކުރުމަށް ދެކެވޭ ވާހަޔަކީ ރާއްޖޭގެ މުސްތަޤުބަލާއި ގުޅިފައިވާ ވާހަކައެއް ކަމުގައި ރައްޔިތުންގެ މަޖިލީހުގެ ވެލިދޫ ދާއިރާގެ މެމްބަރު މުހައްމަދު އަބްދުﷲ ޝަފީޤު (ފިޔެސް މޯޑު) ވިދާޅުވެއްޖެއެވެ.
ބަރުލަމާނީ ނިޒާމުގެ އަޑު ގަދަވެފައިވާ މިދަނޑިވަޅުގައި އެމްޑީޕީގެ މެމްބަރުންގެ ތެރޭގައިވެސް ވަނީ މި ޚިޔާލު ތަފާތުވުން ބޮޑުވެފައެވެ. މެމްބަރުންގެ ތެރެއިން ރައީސް ނަޝީދަށް ތާއީދު ކުރައްވާ ބޭފުޅުން ގެންދަވަނީ ބަރުލަމާނީ ނިޒާމަށް ތާއީދުކޮށް ތައްޔާރު ކުރަމުންދާ ޕެޓިޝަންގައި ސޮއި ކުރަމުންނެވެ. މިހާތަނަށް 15 ވަރަކަށް އެމްޑީޕީގެ މަޖިލިސް މެމްބަރުން ވަނީ މި ޕެޓިޝަންގައި ސޮއިކޮށްފައެވެ.
ބަރުލަމާނީ ނިޒާމާއި ގުޅިގެން ދެކެވޭ ވާހަތަކަށް އިޝާރާތްކޮށް މުހައްމަދު އަބްދުﷲ ޝަފީޤު ކުރެއްވި ޓްވީޓެއްގައި ވިދާޅުވީ، ބަރުލަމާނީ ނިޒާމުގެ ވާހައަކީ ރައީސް ޞާލިހަށް ދެވަނަ ދައުރެއް ދިނުމާއި، ރައީސް ނަޝީދަށް ބޮޑުވަޒީރުކަން ދިނުމާއި، އަދި މަޖިލިސް މެމްބަރުންނަށް ވަޒީރުކަން ދިނުމާއި ހަމައިން ނިމޭ ވަރަށްވުރެއް މާބޮޑު ވާހަކައެއް ކަމަށެވެ. ބަރުލަމާނީ ނިޒާމުގެ ވާހަކައަކީ އެމްޑީޕީން އަބަދުވެސް ދައްކަމުންދާ ވާހަކައެއްކަމަށް އޭނާ ވިދާޅުވިއެވެ.
ބަރުލަމާނީ ނިޒާމުގެ ވާހަކައަކީ އެމްޑީޕީން އަބަދުވެސް ދައްކާ ވާހަކައެއް. އެވާހަކައަކީ އިބޫއަށް ދެވަނަ ދައުރެއް ދިނުމާއި އަންނިއަށް ބޮޑުވަޒީރުކަން ދިނުމާއި މެންބަރުންނަށް ވަޒީރުކަން ދިނުމަށްވުރެ ބޮޑު ވާހަކައެއް. އެއީ ގައުމުގެ މުސްތަގުބަލާ ގުޅިފައިވާ ވާހަކައެއް.
– މޯޑު ވިދާޅުވިއެވެ.
މިހާރު ވެރިކަން ކުރަމުންދާ ކޯލިޝަނުން އަމަލު ކުރަމުންދަނީ، ކޯލިޝަން މެނިފެސްޓޯއަށް ކަމަށާއި، އެކޯލިޝަންގައި އެއްވެސް ހިސާބެއްގައި ބަރުލަމާނީ ނިޒާމު ގެނައުމަށް ބުނެފައި ނުވާކަމަށް ރައީސުލްޖުމްހޫރިއްޔާ އޮފީހުގެ ތަރުޖަމާން މުހައްމަދު މަބްރޫކް އަޒީޒް ވަނީ ވިދާޅުވެފައެވެ. މަބްރޫކް ވިދާޅުވީ، ބަރުލަމާނީ ނިޒާމުގެ ވާހައަކީ ކޯލިޝަން މެނިފެސްޓޯގައި އޮތް ވާހަކައެއް ނޫންކަމަށެވެ. އަދި ނިޒާމު ބަދަލުކުރާނެ އެކަން ކުރެވޭނީ ރައްޔިތުންގެ ރެފަރެންޑަމަކަށް ގޮސްގެންކަމަށް ރައީސް ޞާލިހު ތަކުރާރުކޮށް ވިދާޅުވެފައިވާކަމަށް މަބްރޫކް ވިދާޅުވިއެވެ.
އޭނާ ވިދާޅުވީ މިހާރު ކުރިއަށްދާ ބަރުލަމާނީ ޕެޓިޝަނަކީ ވަކި ބަޔަކަށް ފެނިގެން ކުރިއަށްދާ ކަމެއްކަމަށެވެ. ނަމަވެސް ބަރުލަމާނީ ނިޒާމު ގެންނަ ނަމަ އެކަން ކުރެވޭނެ ގޮތަކީ ރައްޔިތުންގެ ފެންނަ ނުފެންނަ ވޯޓެއް ނެގިގެންކަމަށް މަބްރޫކް ވިދާޅުވިއެވެ.
ދިވެހިރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަކަށް ބަދަކުރުމަށް ސިޔާސީ މަސްރަހުގައި އަދި ވަކާލާތު ކުރަމުންދާތަން ފެންނަނީ، އެމްޑީޕީގެ ރައީސް ނަޝީދު ގިނިކަންޏާއެވެ. ޚުދު އެމްޑީޕީގެ އެންމެ އިސްފަރާތް ކަމުގައިވާ، ރައީސުލްކުމްހޫރިއްޔާ އިބުރާހިމް މުހައްމަދު ސޯލިހުވެސް، ބަރުލަމާނީ ޒިނާމަކަށް ދިއުމަށް ތާއީދު ނުކުރައްވާކަން ވަނީ ފާއިތުވެދިޔަ ތަނުގައި ދައްކަވާފައިވާ ވާހަކަފުޅުތަކުން ސާފުވެގެން ގޮސްފައެވެ.
ރައީސް ސޯލިހު ވިދާޅުވެފައިވަނީ، ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލުކުރުމުގެ ފުރުސަތު އޮންނާނީ ރައްޔިތުންގެ ފެންނަ ނުފެންނަ ވޯޓަކުން އެކަން ކުރުމަށް ނިންމައިފި ހާލަތެއްގައި ކަމުގައެވެ. އަދި އޭގެ ކުރިން ވިދާޅުވެފައިވަނީ، ވެރިމުގެ ނިޒާމު ބަދަލުކުރުމާ މެދު ވިސްނެވުމަށް ވުރެ، ވައްދުތައް ފުއްދެވޭތޯ މަސައްކަތް ކުރެއްވުން މިވަގުތަށް އެމަނިކްފާނަށް މާމުހިންމު ކަމުގައެވެ.
