މަޖިލިސް ރައީސް މުހައްމަދު ނަޝީދުގެ އަވާގައި ޖެހިގެން ބަރުލަމާނީ ނިޒާމު ގެނައުމަށް ދިވެހި އެއްވެސް ރައްޔިތަކު މަސައްކަތް ނުކުރެއްވުމަށް ވެރިކަން ކުރާ ކޯލިޝަންގެ ޖުމްހޫރީ ޕާޓީގެ ލީޑަރު ޤާސިމް އިބްރާހިމް ގޮވާލައްވައިފިއެވެ.
ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލުކުރުމާ ގުޅޭގޮތުން ވާހަކަ ދައްކަވަމުން ގާސިމް ވިދާޅުވީ ދިވެހިރާއްޖެ ވަނީ ކުރިންވެސް ބަރުލަމާނީ ނިޒާމަކަށް ބަދަލުކޮށް އެކަމުގެ ތަޖުރިބާ ކޮށްފައިވާކަމަށާއި ބަރުލަމާނީ ނިޒާމެއްގައި ރައީސެއްގެ ކޯޅުންގަނޑު ބޮޑުވާނެކަމަށެވެ. ބަރުލަމާނީ ނިޒާމަކީ މަޖިލީހުން ހުރިހާ ކަމެއްކޮށް، ހުރިހާ ބާރެއް އެއްބައެއްގެ އަތަށް ނެގުމަށް ގެނެވޭ ނިޒާމެއްކަމަށެވެ. މިއަދު ރާއްޖޭގައި އެނިޒާމު ގެންނަން މަސައްކަތް ކުރަނީ ނަޝީދުގެ އަވާޖެހިގެން އުޅޭ ބަޔަކު ކަމަށާއި، އެކަމަށް ތާއީދު ނުކުރުމަށް ޤާސިމް ވަނީ ގޮވާލާފައެވެ.
ދެންމި ބަރުލަމާނީ ނިޒާމޭ ކިޔައިގެން މި އުޅުއްވާ ބޭފުޅަކީ ރައީސް ނަޝީދު. އޭނަގެ އަވާގައި ޖެހިން އުޅޭ ބަޔަކު އެބައުޅޭ ޕެޓިޝަން ހަދައިގެން އަނެއްކަމެއްކޮށް، އަނެއްކަމެއްކޮށްވެސް.
– ޤާސިމް ވިދާޅުވިއެވެ.
ޤާސިމް ވިދާޅުވީ ބަރުލަމާނީ ނިޒާމަކީ އެއްވެސް ތާކުންތާކު ނުޖެހޭ ނިޒާމެއްކަން، އެގެނީ ވެރިމީހާއަށް 1000 ވޯޓު ލިބޭމީހާއަށްވެސް އާދެވުމުގެ ފުރުސަތު އޮތުމުންކަމަށެވެ. ވެރިޔަކަށް ހުންނަ މީހަކީ ރާއްޖޭގެ ހުރިހާ ރައްޔިތުން ތަމްސީލް ކުރަން އަންނަ ވެރިޔަކަށްވާއިރު، ކުޑަ އާބާދީއެއް އޮންނަ ދާއިރާއެއްގެ މެމްބަރުކަމަށް އިންތިޚާބުވެގެން އަނަން މީހަކު ބޮޑުވަޒީރަކަށް އައްޔަންކޮށް، ރައީސަށް ހުންނަ މީހަކަށް ދައުލަތުން ބޮޑު ޚަރަދު ކުރުމަކީ އެއްވެސް ތާކުން ތާކު ޖެހޭ ކަމެއް ނޫންކަމަށް ޤާސިމް ވިދާޅުވިއެވެ.
ވެރިޔަކަށް ހުންނަ މީހަކަށް 1000 މީހުންގެ ވޯޓުން އާދެވޭނެ، އޭމަ ނުޖެހޭ ރައްޔިތުންނާއި ހަމައަށްވެސް ދާކަމަށް. ކުޑަދަށުން ދުވަމުން އޭނާ އުޅުނީމަ ނިމުނީ. އަޅުގަނޑުގެ އާދޭހަކީ. އަދި އަޅުގަނޑު ދަންނަވަން އޮތީ ބަރުލަމާނީ ނިޒާމަށް ތިބޭފުޅުން ތާއީދު ނުކުރާށޭ. އެއްވެސް ރައްޔިތަކު ތާއީދު ނުކުރާށޭ. އެއީ ޤައުމަށް ހެޔޮ އެދިގެން ވެރިކަން ކުރާނެ މީހެއްނޫން. އެނިޒާމުގައި ވަޒީރަކީވެސް، މެމްބަރަކީވެސް ހަމައެއްބައެއް، ހުރިހާ ލާރިއެއް އަޅަނީ އެއްޖީބަކަށް. ކޮރަޕްޝަން ހިންގާނީވެސް އެމީހުން. އެކަން ބަލަން ދާންޖެހޭނީވެސް އެތަނަށް. އެމީހުން ބަލަން ތިބޭނީވެސް.
– ޤާސިމް ވިދާޅުވިއެވެ.
ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމު ބަދަލު ކުރުމަށް ރައީސް ނަޝީދު ގެންދަވަނީ ރައީސަށް ހުށަހެޅުމަށް ޕެޓިޝަނެއް ތައްޔާރު ކުރަމުންނެވެ. ނަމަވެސް ރައީސް އޮފީހުން ބުނެފައިވަނީ މި ޕެޓިޝަނަކީ ބަރުލަމާނީ ނިޒާމަށް ދާންޖެހޭ ސަބަބެއް ނޫންކަމަށެވެ. އަދި މިހާރު އޮތް ކޯލިޝަން މެނިފެސްޓޯގައި ބަރުލަމާނީ ނިޒާމުގެ ވާހައެއް ނެތްކަމަށް ރައީސް އޮފީހުގެ ތަރުޖަމާނު ވަނީ ވިދާޅުވެފައެވެ. މި ޕެޓިޝަން ރައީސުލްޖުމްހޫރިއްޔާގެ އިތުރުން ރައްޔިތުންގެ މަޖިލީހަށްވެސް ހުށައަޅާނެ ކަމަށް މިކަން އިންތިޒާމު ކުރާ ފަރާތުން ބުނެއެވެ.
ރާއްޖޭގައި މިހާރު މިއޮތް ވެރިކަމުގެ ނިޒާމު ބަދަލުކުރެވޭނީ އާންމު ރައްޔިތުންގެ ވޯޓަކުން ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްވަނީ ވިދާޅުވެފައެވެ. 2008 ވަނަ އަހަރު ދިވެހިން ބަލައިގަތް ފެހި ޤާނޫނު އަސާސީއަށް އަމަލުކުރަން ފެށުމުގެ ކުރިން ރާއްޖޭގައި އޮންނަން ބޭނުންވާ ވެރިކަމުގެ ނިޒާމު ކަނޑައެޅުމަށް ނެގި ރައްޔިތުންގެ ފެންނަ ނުފެންނަ ވޯޓުގައި 95،619 މީހުން ވޯޓުދީފައިވަނީ ރާއްޖޭގައި އޮންނަން ފެންނަނީ ރިޔާސީ ނިޒާމުކަމަށެވެ.
ބަރުލަމާނީ ނިޒާމު އޮންނަން ފެންނަކަމަށް ވޯޓުދީފައިވަނީ 58،504 މީހުންނެވެ. މި ވޯޓުގައި 199،841 މީހުން ވޯޓުލުމަށް ރަޖިސްޓްރީކުރިއިރު، ވެރިކަމުގެ ނިޒާމު ކަނޑައެޅުމަށް ވޯޓުދީފައިވަނީ 155،890 މީހުންނެވެ.
