ބަރުލަމާނީ ނިޒާމުގައި މެމްބަރުން ތިބޭނީ ވަޒީރުންގެ ގޮތުގައި ކަމަށާއި، އަދި ވަޒީރުންގެ ގޮތުގައި މެމްބަރުން ތިބޭނަމަ، މިހާރަށްވުރެ ވޯޓު ވިއްކުން މަދުވާނެކަމަށް ރައްޔިތުންގެ މަޖިލިހުގެ ރައީސް މުހައްމަދު ނަޝިދު ވިދާޅު ވެއްޖެއެވެ.

ނަޝީދު އޭނާގެ އެލެކްސް ޓުވިޓަރ އެކައުންޓުން ކުރެއްވި ޓުވީޓެއްގައި ވިދާޅުވެފައިވަނީ، އަބަދުވެސް ވަގުން އުޅޭނެ ކަމަށާއި، އެހެންނަމަވެސް، ވައްކަން ކުރުން މަދުކުރެވޭނީ ހަމައެކަނި ބަރުލަމާނީ ނިޒާމުގައި ކަމަށެވެ. ނަޝީދު ވިދާޅުވީ، ބަރުލަމާނީ ނިޒާމުގައި ވައްކަން މަދުކުރެވޭނީ، ކަންކަން ޓްރާންސްޕޭރެންޓު ވެފައި، އަދި ކޮންމެ ދުވަހަކުވެސް ވަޒީރުންނާއި އަދި ބޮޑުވަޒީރު މަޖިލިސްގައި ޖަވާބުދާރީ ކުރާތީ ކަމުގައެވެ.

ރާއްޖޭގެ ބޮޑުވަޒީރަކަށް ވެވަޑައިގަތުމަށް ބޭނުންފުޅުވެ، ބަރުލާމާނީ ނިޒާމަށް ވެރިކަމުގެ ނިޒާމު ބަދަލު ކޮށްދެއްވުމަށް މީގެކުރިން ނަޝީދު ރައީސުލްޖުމްހޫރިއްޔާ އިބުރާހިމް މުހައްމަދު ސާލިހުގެ އަރިހުންވެސް އެދިވަޑައިގެންފައިވާއިރު، މަޖިލިސް ރައީސް ނަޝީދު އިސްވެ ހުންނަވާ، ރާއްޖޭގެ މިހާރު ވެރިކަން ކުރަމުންދާ ރިޔާސީ ނިޒާމު އުވާލާ، ބަރުލަމާނީ ނިޒާމެއް ގެނައުމަށްޓަކާ މިހާރު ގެންދަވަނީ ޕެޓިޝަނެއްގައިވެސް ސޮއި ކުރައްވަމުންނެވެ. މިގޮތުން ޕެޓިޝަންގައި އާންމު ރައްޔިތުންވެސް ސޮއި ކުރަން ފަށާފައިވާއިރު، މިހާތަނަށް މި ޕެޓިޝަންގައި، މަޖިލީހުގައި އެމްޑީޕީގެ ސުޕަރ މެޖޯރިޓީ އޮންނަ އެ ޕާޓީގެ ޕާލަމެންޓްރީ ގުރޫޕުން ސޮއިކޮށްފައިވާ ކަމަށް މީޑިއާތަކަށް މައުލޫމާތު ލިބިފައިވަނީ 13 މެމްބަރުންނެވެ.

އެމްޑީޕީގެ ޕާލަމެންޓްރީ ގުރޫޕުގެ ބައެއް މެމްބަރުން މިހާތަނަށް ޕެޓިޝަންގައި ސޮއި ކުރައްވާފައިވާއިރު، އެޕާޓީގެ ޕާލަމެންޓްރީ ގްރޫޕްގެ ތެރޭގައި، ޕެޓިޝަނާ ގުޅޭގޮތުން ޚިޔާލުތަފާތުވުން ހުރިކަންވެސް ފާހަގަ ކޮށްލެވެއެވެ. މިގޮތުން މި ޕެޓިޝަންގައި މެމްބަރުން ސޮއި ކުރައްވަން ފެއްޓެވި ފަހުން، ރާއްޖެއަށް ހެޔޮ އެދޭ ބަޔަކު ދައުލަތުން 150 މިލިއަން ރުފިޔާ ޚަރަދުކޮށްގެން ނިޒާމީ ވޯޓް ނަގަން އުޅެފާނެތޯއޭ ވިދާޅުވެ، އެމްޑީޕީގެ ޕާލަމްނެޓްރީ ގްރޫޕުގެ މެމްބަރުން އައްޑޫ މަރަދޫ ދާއިރާގެ މެމްބަރު އިބްރާހިމް ޝަރީފް ވަނީ ސުވާލު އުފައްދަވާފައެވެ. އިބްރާހިމް ޝަރީފް ވިދާޅުވީ ނިޒާމީ ވޯޓުގެ ކެމްޕެއިނަށް 100 އެތަށް މިލިއަން ރުފިޔާ އެއް ޚަރަދުވާނެ ކަމަށެވެ.

އަދި، ދައުލަތުގެ ބަޖެޓުން އެފަދަ ވޯޓެއް ނެގުމަށް 150 މިލިއަން ރުފިޔާ މި ދަނޑިވަޅުގައި ޚަރަދުކުރުން އެއީ މިވަގުތަށް ކުރަން ހެޔޮވާވަރުވެ ކަމެއްތޯވެސް ޝަރީފް ވަނީ ސުވާލު ކުރައްވާފައެވެ. އަދި މިހާރު ވެސް ސަރުކާރުން 300 މިލިއަން ރުފިޔާގެ ސުކޫކެއް 10 ޕަސެންޓް އިންޓަރެސްޓް ރޭޓުގައި ވިއްކާފައިވާ ކަމަށް އޭނާ ވިދާޅުވިއެވެ.

މީގެއިތުރުންވެސް، ކޯލިޝަންގެ މެނިފެސްޓޯގައި، ބަރުލަމާނީ ނިޒާމެއްގެ ވާހަކަ ނެތްކަމަށް ވިދާޅުވެ، ސަރުކާރުގެ ތަރުޖަމާން މަބުރޫކު އަޒީޒު ދެއްކެވި ވާހަކަފުޅު، ބައެއް މީޑިއާތަކުން ރިޕޯޓު ކޮށްފައިވާ ޓުވީޓުތައް، އެމްޑީޕީގެ ޕާލަމެންޓްރީ ގްރޫޕުގެ މެމްބަރު، އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ރީޓުވީޓު ކުރައްވާފައިވާކަންވެސް ފާހަގަ ކޮށްލެވެއެވެ.

މީގެ އިތުރުންވެސް، 65 މެމްބަރުންގެ މައްޗަށް އެކުލެވޭ، އެޕާޓީގެ ޕާލަމެންޓްރީ ގުރޫޕުގެ ގިނަ މެމްބަރުން ޕެޓިޝަންގައި ސޮއި ކުރައްވާފައި ނުވާއިރު، ރައީސް ނަޝީދު އިސްވެ ހުންނަވާ، ތައްޔާރު ކުރައްވަމުން ގެންދަވާ ޕެޓިޝަނާ ގުޅޭގޮތުން، އަދިވެސް ގިނަ މެމްބަރުން ތިއްބެވީ ހަނުކަން ފާހަގަ ކޮށްލެވެއެވެ.