ރާއްޖޭގެ އިޤްތިޞާދު ނާޒުކު ހާލަތެއްގައި އޮތް މިދަނޑިވަޅުގައި ޤައުމަށް ހެޔޮއެދޭ ބަޔަކު 150 މިލިޔަން ރުފިޔާ ޚަރަދުކޮށް ބަރުލަމާނީ ނިޒާމުގެ ވޯޓު ނެގުމަށް މަސައްކަތް ނުކުރާނެކަމުގައި ރައްޔިތުންގެ މަޖިލީހުގެ މަރަދޫ ދާއިރާގެ އެމްޑީޕީ މެމްބަރު އިބްރާހިމް ޝަރީފް (މަވޯޓާ) ވިދާޅުވެއްޖެއެވެ.

ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލު ކުރުމަށްޓަކައި، އެމްޑީޕީގެ ރައީސް މުހައްމަދު ނަޝީދު އިސްކޮށް ހުންވައިގެން ގެންދަވަނީ ރައީސުލްޖުމްހޫރިއްޔާއަށް ހުށަހެޅުމަށްޓަކައި ބަރުލަމާނީ ޕެޓީޝަނެއް ތައްޔާރު ކުރަމުންނެވެ. ރައީސް ނަޝީދު ވަނީ މިޕެޓިޝަންގައި ވީހާވެސް ގިނަ ބަޔަކު ސޮއިކުރުމަށްވެސް ދަންނަވާފައެވެ.

ބަރުލަމާނީ ނިޒާމު ގެނައުމަށް ކުރަމުންދާ މަސައްކަތާއި ދެކޮޅު ހައްދަވައި ޝަރީފް ވިދާޅުވީ ކޯވިޑް-19އާއި ގުޅިގެން ރާއްޖޭގެ އިޤްތިޞާދު އިންތިހާއަށް ހީނަރު ވެފައިވާ މިދަނޑިވަޅުގައި 150 މިލިޔަން ރުފިޔާ ޚަރަދުކޮށްގެން ނިޒާމު ބަދަލު ކުރުމުގެ ވޯޓު ނެގުމަކީ ޤައުމަށް ހެޔޮއެދޭ ބަޔަކު ކުރާނެ ކަމެއް ނޫންކަމަށެވެ. މިހާލަތުގައި ރައްޔިތުން އަތާއި އަނގަޔާއި ދިމާނުވެގެން އުޅޭއިރު، ދައުލަތުން އިތުރު ޚަރަދުތަކެއް ކޮށްގެން ނިޒާމީ ވޯޓު ނެގުމަކީ ބޭކާރު ކަމެއްކަމުގައި ޝަރީފް ވަނީ ވިދާޅުވެފައެވެ.

ޤައުމު އިޤްތިޞާދީ ފުން އަނދަވަޅެއްގެ ތެރޭގައި އޮއްވައި އަދި ޞިއްޚީ ބޮޑު ކާރިސާއަކުން އަރައި ނުގަނެވި ހިންދެމިނުލެވި އޮއްވައި، ރައްޔިތުން އަތާއި އަނގަޔާއި ދިމާނުވެ ތިިއްބާ، ޤައުމަށް ހެޔޮ އެދޭބަޔަކު ދައުލަތުން 150 މިލިޔަން ރުފިޔާ ޚަރަދު ކޮށްގެން ނިޒާމީ ވޯޓު ނަގަން އުޅެފާނެބާ.

– ޝަރީފް ވިދާޅުވިއެވެ.

Gaumu iguthisaadhee fun valhugadegge therey ovvaa adhi sihhee bodu kaarisaa akun arainuganevi hindhemi nulevi ovvaa, rayyithun athaa angayaa dhimaa nuve thihbaa, gaumah heyo edhey bayaku dhaulathun MVR 150 million kharadhu koggen nizaamee vote nagan ulhefaane baa?

— Ibrahim Shareef (@AdduShareef) August 23, 2021

އޭނާ ވިދާޅުވީ މިފަދަ ކެމްޕެއިނެއް ކުރަން ދައުލަތުން ކުރާ ޚަރަދުގެ އިތުރުން ކެމްޕެއިނަށްވެސް ބޮޑު ޚަރަދެއް ހިނގާނެކަމަށެވެ. އެތައް މިލިޔަން ރުފިޔާއެއް ޚަރަދު ކުރުމަށް ސަރުކާރަށް ޕްރެޝަރު ކުރަމުންދާ މިހާލަތަކީ ދައުލަތުގެ ބަޖެޓް ފޫ ބެއްދުމަށް، 300 މިލިޔަން ރުފިޔާގެ ސްކޫކު 10 ޕަސެންޓް އިންޓަރެސްޓުގައި ވިއްކާފައިވާ ވަގުތެއްކަމަށެވެ.

އަދި މިފަދަ ކެމްޕެއިނެއް ކުރަން ހިންގޭނީ އެތައް 100 މިލިޔަން ރުފިޔާގެ އިތުރަށް ސަރުކާރުގެ ބަޖެޓުން 150 މިލިޔަން ޚަރަދު ކުރުން އެއީ މިވަގުތު ކުރަން ހެޔޮވާ ވަރުގެ ކަމެއްބާ. ސަރުކާރުގެ ބަޖެޓް ފޫ ބައްދަން މިހާރުވެސް 300 މިލިޔަން ރުފިޔާގެ ސްކޫކުއެވަނީ ވިއްކާފަ، 10 ޕަސެންޓް އިންޓަރެސްޓް ރޭޓުގައި.

– ޝަރީފް ވިދާޅުވިއެވެ.

ފިނޭންސް މިނިސްޓްރީން އާންމުކޮށްފައިވާ ދައުލަތުގެ މެދުރާސްތާގެ ދަރަނީގެ ސްޓްރެޓެޖީގައި ވާގޮތުން މިއަހަރު ނިމޭއިރު ދައުލަތުގެ ޖުމްލަ ދަރަނި 79 ބިލިއަން ރުފިޔާއަށް އަރާނެއެވެ. މިއީ ޤައުމީ އުފެއްދުންތެރިކަމުގެ ނިސްބަތުން ބަލާނަމަ 128 އިންސައްތައެވެ. ފާއިތުވި އަހަރު ނިމުނު އިރު ދައުލަތުގެ ޖުމްލަ ދަރަނި ހުރީ އުފެއްދުންތެރިކަމުގެ ނިސްބަތުން 115 އިންސައްތައިގައެވެ. އެއީ 67 ބިލިއަން ރުފިޔާއެވެ.

ފާއިތުވި އަހަރު ނިމުނު ބޭރުގެ ދަރަންޏަކީ 25 ބިލިއަން ރުފިޔާއެވެ. އެހެން ނަމަވެސް މި ހިނގާ 2021 ވަނަ އަހަރު ނިމޭއިރު ބޭރުގެ ދަރަނި 21 އިންސައްތައިން އިތުރުވާނެ ކަމަށް ލަފާކުރެވޭ ކަމަށް ދަރަނީގެ ސްޓްރެޓެޖީގައި ބަޔާންކޮށްފައިވެއެވެ.