ސައިފް އަލީ ޚާންގެ 51 ވަނަ އުފަން ދުވަސް ފާހަގަ ކުރުމަށް ރާއްޖެ އައުމަށް ފަހު އެ ކުޑަކުޑަ އާއިލާ އެނބުރި ގައުމަށް ހިނގައްޖެއެވެ.
ސައިފް އާއި ކަރިނާ ކަޕޫރު އަދި އެމީހުންގެ ދޮށީ ދަރިފުޅު ތައިމޫރާއި ހަގު ދަރިފުޅޫ ޖެހް ވެސް ވަނީ މި ދަތުރުގައި ބައިވެރިވެފައެވެ. ޖެހް އަށް 6 މަސްވެފައި ވާއިރު އެ އާއިލާއިން އެކުއްޖާގެ މޫނު ފެންނަ ފުރަތަމަ ފޮޓޯ ހިއްސާކުރީ ރާއްޖެއަށްކުރި ދަތުރުގެ ތެރެއިންނެވެ.
ސައިފަށް އުފަންދުވަހުގެ ތަހުނިޔާ ކިއުމަށް ކަރީނާ ވަނީ އެ އާއިލާގެ ފޮޓޯއެއް އިންސްޓަގްރާމް ގައި ހިއްސާކޮށްފައެވެ. މިއީ ޖެހްގެ މޫނު ފެންނަ ގޮތަށް ހިއްސާ ކުރި ފުރަތަމަ ފޮޓޯއެވެ. އަދި މުޅި ދުނިޔޭގެ ސަމާލުކަން މި ފޮޓޯ ވަނީ ހޯދާފައެވެ.
ޗުއްޓީ ނިއްމާލުމަށް ފަހު ގައުމަށް އެބުރި ދިއުމުގު ކުރިންވެސް ކަރީނާ ވަނީ ޖެހްގެ އިތުރު ފޮޓޯއެއް ހިއްސާކޮށްފައެވެ. މިފަހަރުގެ ފޮޓޯގައި ފެނިގެންދަނީ ކަރީނާ ދަރިފުޅު އުރާލައިގެން ހުއްޓައެވެ. މިއީ ޖެހް އަށް 6 މަސް ފުރުމުގެ އުފަލުގައި ހިއްސާ ކޮށްފައިވާ ފޮޓޯއެކެވެ.
ހޮނިހިރު ދުވަހު ހިއްސާކުރި މި ފޮޓޯއަށް ގިނަ ބެއެއްގެ ސަމާލުކަން ވަނީ ހުއްޓިފައެވެ. އާދީއްތަ ދުވަހު އެމީހުން އެނބުރި މުމްބާއީއަށް ގޮސްފައި ވާއިރު އެއަރޕޯޓުން މި އާއިލާ ނުކުންނަނިކޮން ނަގާފައިވާ ވީޑީއޯ އާއި ފޮޓޯ ތަކެއް ވަނީ ވައިރަލް ވެފައެވެ. މި ފޮޓޯތަކުން ޖެހް ވަރަށް ރީތިކޮށް ފެނެއެވެ.
ޖެހްގެ މޫނު ފެންނަ ފޮޓޯއެއް އެންމެ ފުރަތަމަ ޕަޕަރާޒީންނަށް ލިބިފައިވަނީ އެމީހުން ރާއްޖެއައުމުގެ ކުރިން ކަރީނާގެ ބައްޕަ ރަންދީރުގެ ގެއަށް ކުރި ޒިޔާރަތުގައެވެ. ނަމަވެސް ރާއްޖެއިން އަނބުރާ މުމްބާއީއަށް ގޮސް އެއަރޕޯޓުން ނުކުމެގެން ދިޔަ ގަޑީގައި ޕަޕަރާޒީންނެގި ޖެހްގެ މޫނު ފެންނަ ގިނަ ފޮޓޯތަކެއް ވަނީ ވައިރަލް ވެފައެވެ.
ކަރީނާ އާއި ސައިފްގެ ފުރަތަމަ ދަރިފުޅު ތައިމޫރަށް އަންނަ ޑިސެމްބަރު މަހުގެ 20 ގައި ފަސް އަހަރު ފުރޭނެ އެވެ. ތައިމޫރަކީ ކަރީނާގެ ފުރަތަމަ ދަރިފުޅު ނަމަވެސް ސައިފްގެ ތިން ވަނަ ދަރިފުޅެވެ. އަދި އެދެމީހުންގެ ހަގު ދަރިފުޅު ޖެހް އާއެކު ސައިފް ގެ 4 ކުދިންވީއެވެ. އޭނާގެ ދޮށީ ދެ ދަރިންނަކީ ކުރީގެ ބަތަލާ އަމްރިތާ ސިންގްއާ ކައިވެނިކޮށްގެން ލިބުނު ބަތަލާ ސާރާ އަލީ ޚާން އާއި އިބްރާހީމް އަލީ ޚާން އެވެ.
ކޮމެންޓު ފޮނުވާ