ކޯވިޑް-19 އާއި ގުޅިގެން ރާއްޖެއިން އަޅާފައިވާ ފިޔަވަޅުތައް ވަރުގަދަ ކުރުމަށް ކުރީގެ ރައީސް މައުމޫން އަބްދުލް ޤައްޔޫމް ގޮވާލައްވައިފިއެވެ.
ރައީސް މައުމޫން މިފަދައިން ވިދާޅުވީ ސްރީ ލަންކާގައި ކޯވިޑް ފެތުރެމުންދާ ނިސްބަތް އާދަޔާ ޚިލާފަށް މަތިވެ އަދި މަރުވާ މީހުންގެ ނިސްބަތްވެސް އިތުރުވެ، ގައުމުގެ ސިއްޙީ ނިޒާމަށް އާދަޔާ ޚިލާފަށް ބާރުބޮޑުވާން ފެށުމާއި ގުޅިގެން، ސްރީ ލަންކާ ރެއިން ފެށިގެން 10 ދުވަހަށް ލޮކްޑައުން ކުރުމަށް އެގައުމުގެ ސަރުކާރުން ނިންމުމުންނެވެ.
ސްރީލަންކާއަކީ ދިވެހިންގެ އެތައްހާސް ބަޔަކު ދިރިއުޅެމުންދާއިރު، ރާއްޖެގެ ގިނަ ބަޔަކު ލަންކާއަށް ގޮސްއައިސް ހަދައެވެ. ލަންކާގެ ހާލަތު ގޯސްވަމުންދާ މިހާލަތުގައި ރާއްޖެއިން އިތުރު ފިޔަވަޅު އަޅަންޖެހޭކަމަށް ރައީސް މައުމޫން ވަނީ ވިދާޅުވެފައެވެ. އަދި މިއީ މިހާރު ދީފައިވާ ލުއިތައް އިތުރަށް ހަރުދަނާކޮށް، ފިޔަވަޅުތައް ވަރުގަދަ ކުރަންޖެހޭ ވަގުތުކަމަށްވެސް ރައީސް މައުމޫން ވިދާޅުވިއެވެ.
ކޯވިޑްފެތުރުން ކޮންޓްރޯލް ކުރުމަށްޓަކައި ޝްރީލަންކާގައި ރޭއްސުރެފެށިގެން މިމަހުގެ 30 ވަނަދުވަހުގެ ނިޔަލަށް ލޮކްޑައުން އިޢުލާންކޮށްފި. ރާއްޖޭގައި އަޅާފައިވާ ފިޔަވަޅުތައްވެސް އިތުރަށް ހަރުދަނާކުރަން ޖެހޭ.
– މައުމޫން ވިދާޅުވިއެވެ.
ކޯވިޑްފެތުރުން ކޮންޓްރޯލް ކުރުމަށްޓަކައި ޝްރީލަންކާގައި ރޭއްސުރެފެށިގެން މިމަހުގެ 30 ވަނަދުވަހުގެ ނިޔަލަށް ލޮކްޑައުން އިޢުލާންކޮށްފި. ރާއްޖޭގައި އަޅާފައިވާ ފިޔަވަޅުތައްވެސް އިތުރަށް ހަރުދަނާކުރަން ޖެހޭ @HPA_MV
— Maumoon Abdul Gayoom (@maumoonagayoom) August 21, 2021
މިފަހްތާގެ ބުދަ ދުވަހު އެކަނިވެސް ސްރީ ލަންކާގައިވަނީ، ކޯވިޑް ބަލީގައި 187 މީހަކު މަރުވެ އަދި 3,793 މީހަކު ޕޮޒިޓިވް ވެފައެވެ. މިއީ ކޯވިޑް އަގައުމުގައި ފެތުރެން ފެށިފަހުން އެއް ދުވަހެއްގައި އެންމެ ގިނަ އަދަދަކަށް ކޯވިޑް ބަލީގައި މީހުން މަރުވެފައިވާ ދުވަހެވެ. 32 މިލިއަން މީހުންގެ އާބާދީއެއް އޮންނަ ސްރީލަންކާގައި ކޯވިޑް19ގެ ޑެލްޓާ ވޭރިއެންޓް ފެތުރެމުން ދިއުމާގުޅިގެން، އެގައުމުގެ ހޮސްޕިޓަލްތަކަށް ވަނީ ބާރު ބޮޑުވެފައެވެ.
މިހާރުވެސް ސްރީ ލަންކާގައިވަނީ ވައިރަސް ފެރުތުން ކޮންޓްރޯލް ކުރުމުގެ ގޮތުން ފިޔަވަޅުތައް އަޅާފައެެވެ. މިގޮތުން ސްލޫކްތަކާއި، ޖިމްތަކާއި، ސުވިމިން ޕޫލްތައް ބަންދުކޮށް، ކައިވެނި ހަފްކާތަކާއި އަދި މިއުޒިކް ޝޯވްތައްވެސް ބޭއްވުން މިހާރުވެސް އެގައުމުގައި ވަނީ މަނާކުރެވިފައެވެ. އަދި މީގެއިތުރުން، މިހަފްތާގެ ހޯމަ ދުވަހުން ފެށިގެން ކޮންމެ ދުވަހަކުވެސް ރޭގަޑު 10އިން ފަތުހު 4އާއި ހަމައަށް ވަނީ ކާފިއުވެސް ހިންގަން ފަށާފައެވެ. ސްރީ ލަންކާގެ އާބާދީގެ ހަތަރުބައި ކޮށްފަ އެއްބަޔަށް މިހާރުވަނީ ވެކްސިން ދީ ނިންމާފައެވެ. މީގެ ތެރޭގައި ގިނައީ ޗައިނާގެ ސިނަފާމް ވެކްސިނެވެ.
