ރައީސުލްޖުމްހޫރިއްޔާ ދިރިއުޅުއްވާ ރަސްމީގެކޮޅު، މުލިއާގެ ކައިރިއަށްގޮސް، އެތަން ގޮއްވާލަނެކަމަށްބުނެ އިންޒާރުދިން މީހާ ބަންދުން ދޫކޮށްލައިފިއެވެ.
ޖުލައި މަހުގެ 9 ވަނަ ދުވަހު މުލީއާގެ ކައިރިއަށްގޮސް ދެމީހަކު ވަނީ އެމީހުން އެވަގުތު ގެންގުޅުނު ފޮށިގަނޑެއްގައި ބޮމެއް އޮތްކަމަށް ބުނެ އިންޒާރުދީފައެވެ. އަދި އެތަން ގޮއްވާލާނެކަމަށް ބުނުމާއެކު ސަލާމަތީ ބާރުތަކުންވަނީ އެމީހުން ހައްޔަރުކޮށްފައެވެ. އެންމެ ފުރަތަމަ މި ދެމީހުން ހިފެހެއްޓީ މުލިއާގޭގެ ސަލާމަތީ ކަންކަން ބަލަހައްޓަން ތިބި ސިފައިންނެވެ. އަދި ވަގުތުން ފުލުހުންގެ ޚާއްސަ ޓީމެއް ވަނީ އެ ސަރަހައްދަށްގޮސް، އެމީހުން ގެންގުޅުނު ފޮށިގަނޑާއި އެމީހުން ބަލައި ފާސްކޮށް ދެ މީހުން ހައްޔަރުކޮށްފައެވެ.
މި މައްސަލައިގައި ހައްޔަރު ކުރި 2 މީހުންގެ ތެރެއިން އެކަކު މީގެ ކުރިން ވަނީ ދޫކޮށްލާފައެވެ. ދެވަނަ މީހާވެސް މިހާރުވަނީ ބަންދުން ދޫކޮށްލާފައެވެ. އޭނާ ބަންދުން ދޫކޮށްލާފައިވަނީ މުއްދަތު ޖެހުމަށް ކޯޓަށް ގެންދިއުމުން އޭނާ ބަންދުގައި ބަހައްޓަންޖެހޭ ކަމެއް ފާހަގަނުވުމުންނެވެ.
މި މައްސަލާގައި ހައްޔަރުކުރި ދެމީހުންނަކީވެސް މަސްތުވާތަކެތީގެ ރެކޯޑް އޮންނަ ދެމީހުންނެވެ. މި މައްސަލާގައި ފަހުން ދޫކޮށްލި މީހާގެ މައްޗަށް ފުލުހުން ކުރަނީ ޓެރަރިޒަމްގެ އަމަލެއް ހިންގާނެކަމުގެ އިންޒާރުދިނުން ނުވަތަ ބިރު ދެއްކުމުގެ ތުހުމަތާއި ބިރު ދެއްކުމާއި ދޮގު ހަބަރު ދިނުމުގެ ތުހުމަތެވެ.
