ކާށިދޫ ދާއިރާގެ މެމްބަރު އަބްދުﷲ ޖާބިރު އަތުން މަޝްހޫރު ވިޔަފާރުވެރިޔާ، އަދި ޖުމްހޫރީ ޕާޓީގެ ލީޑަރުޤާސިމް އިބްރާހިމް 10،000،000 މިލިޔަނަށްވުރެ ގިނަ ރުފިޔާ ފަހުން ދޭ ގޮތަށް ނަގައި، އެފައިސާ ނުދައްކާތީ ހައްގު ހޯދުމަށް ޖާބިރު ޕޮލިހަށް މައްސަލަ ވައްދައިފިއެވެ.
ކަމިޝަނަ އޮފް ޕޮލިސް މުހައްމަދު ހަމީދަށް އެޑްރެސްކޮށް ޖާބިރު ފޮނުވި ސިޓީގައި ބުނެފައިވަނީ 2018 ވަނަ އަހަރު ބޭއްވުނު ރިޔާސީ އިންތިޚާބުގެ ދުވަސްވަރު ރައީސް އިބްރާހީމް މުޙައްމަދު ޞާލިޙަށް އިންތިޚާބު ކާމިޔާބު ކޮށްދިނުމުގެ މަސައްކަތަށް ކުރަމުންދިޔައިރު ސިޔާސީ ކަންކަމަށް ޚަރަދު ކުރުމަށްޓަކައި ރައީސް ޞާލިޙް އާ ޙަވާލު ކޮށްފައިވާ -/13,000,000 (ތޭރަމިލިޔަން) ރުފިޔާގެ ތެރެއިން، ސިޔާސީ މަސައްކަތަށް -/5,000,000ރ (ފަސްމިލިޔަން) ރުފިޔާ ބޭނުންވާ ކަމަށް މ. މާފަންނުވިލާ ޤާސިމް އިބްރާހީމް ވިދާޅުވި ކަމަށެވެ. އެފައިސާ ޤާސިމް އިބްރާހީމްއާ ޙަވާލު ކުރުމުގެ އިޛުނަ އަކަށް ރައީސް ޞާލިޙް އެދުމުން، ސިޔާސީ ގޮތުން ޤާސިމް އިބްރާހީމް އަށް ލިބޭ ފައިދާ ދެފަރާތަށްވެސް އޮންނަ ގޮތުގެމައްޗަށް ޝަރުތުކޮށް -/5,000,000 ރ (ފަސްމިލިޔަން ރުފިޔާ) ޤާސިމް އިބްރާހީމް އާ ޙަވާލު ކުރުމާއިމެދު ޢިއްތިރާޝް ނެތް ކަމަށް ބުނުމާއި ގުޅިގެން، އެ ޢަދަދުގެ ފައިސާ ރައީސް ޞާލިޙް ވަނީ ޤާސިމް އިބްރާހީމްއާއި ޙަވާލު ކޮށްފައިކަމަށެވެ.
ރައީސް ޞާލިޙްގެ އަތުގައި ބެހެއްޓިފައިވާ ޖާބިރުގެ ފައިސާގެ ތެރެއިން ޤާސިމް އިބްރާހީމް ނެގި -/5,000,000ރ (ފަސްމިލިޔަން) ރުފިޔާގެ ބޭނުން ކޮށްގެން ޤާސިމް އިބްރާހީމް ކުރިއަށް ގެންދިޔަ ސިޔާސީ މަސައްކަތުގެ ތެރެއިން އެމް.ޑީ.ޕީ އާއި ޤާސިމް އިބްރާހީމްގެ ޕާޓީ ކަމުގައިވާ ޖުމްހޫރީ ޕާޓީއާއެކު ސޮއިކުރެވުނު ކޯލިޝަން އެއްބަސްވުމެއްގެ ދަށުން ރައީސް ޞާލިޙްގެ ސަރުކާރުގެ ތެރެއިން އެންމެބޮޑު ސިޔާސީ މަންފާ ޤާސިމް އިބްރާހީމް ނަންގަވަމުން ގެންދަވާއިރު، ޖާބިރުގެ އަތުން ފައިސާ ނެގުމުގައި ކުރި ޝަރުޠާއި ޚިލާފުވެ، މަކަރާއި ހީލަތް ހަދާފައިވާތީ، މިމައްސަލާގައި އިންޞާފުވެރި ކަމާއިއެކު ދެފުށް ފެންނަ ތަޙްޤީގެއް ހިންގަވައި، އޭނާއަށް ލިބެންޖެހޭ ޙައްޤު ލިބިގެންދާނެ ގޮތުގެމަތިން ފިޔަވަޅު އަޅުއްވައި ދެއްވުމަށް ޖާބިރު ވަނީ އެދިފައެވެ.
މީގެ އިތުރުން 2013 ވަނައަހަރު ބޭއްވުނު ރިޔާސީ އިންތިޚާބުގެ ދުވަސް ވަރުގައި ތ. ތިމަރަފުށީގައި ހުރެ -/5,000,000ރ (ފަސްމިލިޔަން ރުފިޔާ ޖާބިރުގެ އަތުން އަތުލައި، އެފައިސާ އަނބުރާ ނުދީ ވާތީއާއި، މީގެ އިތުރުން ޖުމްހޫރީ ޕާޓީއަށްވެސް އޭނާގެގެ އަތުން ހޭދަތައް ކުރުވައި، އެޕާޓީން ބޭރުކޮށްފައިވާކަމަށް ޖާބިރު ވިދާޅުވިއެވެ.
ޤާސިމް އިބްރާހީމް ގެ ޕާޓީގެ ޓިކެޓްގައި ކާށިދޫ ދާއިރާގެ ގޮނޑިއަށް ކުރިމަތިލައި ކެމްޕެއިން ކުރަމުން ދިޔަ ހިނދު، އެ ދަނޑިވަޅުގައިވެސް އަނބުރާ އަދާކޮށްދޭނެ ކަމަށް ބުނެ، ޖާބިރުގެ އަތުން 500,000 $US (ފަސްލައްކަ) އެމެރިކާ ޑޮލަރު ނަގައި، އެފައިސާގެ ތެރެއިން 200,000 $US (ދެލައްކަ) ޑޮލަރުގެ ފައިސާ ދިވެހި ރުފިޔާ އިން އަޅުގަނޑަށް އަދާ ކުރުމަށްފަހު، އަނެއް 300,000 US (ތިންލައްކަ) އެމެރިކާ ޑޮލަރުގެ ފައިސާ ނުދިނުމަށްޓަކައި، އެފައިސާ ކެމްޕެއިން ދަތުރު ތަކަށް ކަނޑާލައިފި ކަމަށް ޖާބިރު ބުނެފައިވެއެވެ. އަދި އެފައިސާ އޭނާގެ އަތުން ނެގުމުގައި ވެސް މަކަރާއި ޙީލަތް ހަދާފައިވާ ފަރާތެއް ކަމަށް ޤާސިމް އިބްރާހީމް ވާތީ، މި ސިޓީގައި ބަޔާން ކުރެވުނު މަކަރާއި ޙީލަތުގެ 3 މައްސަލައިގެ ތަޙްޤީގު (އެއްފަހަރާ) ކުރިއަށް ގެންގޮސް އެންމެހާ ޙައްޤުތައް އޭނާއަށް ލިބޭނެ ގޮތުގެ ފިޔަވަޅު އަޅުއްވައި ދެއްވުން ޖާބިރު ވަނީ އެދިފައެވެ.
މިސިޓީ ގައި ފުރަތަމަ ބަޔާން ކުރެވުނު -/5,000,000ރ (ފަސްމިލިޔަން) ރުފިޔާ ނެގިކަން ޅ. ހިންނަވަރު ނޫރާނީގެ އިބްރާހީމް މުޙައްމަދު ޞާލިއަށް އެނގިވަޑައިގަންނަވާނެ ކަަމަށާއި، އަދި އަނެއް 300,000 USs (ތިންލައްކަ) އެމެރިކާ ޑޮލަރުގެ މައްސަލައާއި، 2013 ވަނަ އަހަރު -/ 5,000,000ރ (ފަސްމިލިޔަން ރުފިޔާ ނެގިކަމަށް ހެކިވާނެ ފަރާތަކީ މ. ހިކިގުލްއަލާގެ އަޙްމަދު މުޙައްމަދު ކަމަށް ޖާބިރު ވިދާޅުވިއެވެ.
