މަޖިލިސްގެ ނާއިބް ރައީސް އީވާ އަބްދުﷲ އާއި، މަޖިލީހުގެ އެހެންވެސް ބައެއް މެމްބަރުންނަށް ރައީސް ނަޝީދަށް ދިން ހަމަލާއަށްފަހު އިންތިހާއަށް ނުރައްކާ ކުރިމަތި ވެފައިވާކަމަށް ރައްޔިތުންގެ މަޖިލީހުގެ ހުޅުދޫ ދައިރާގެ މެމްބަރު އިލ؛ޔާސް ލަބީބު ވިދާޅުވެއްޖެއެވެ.
މަޖިލީހުގެ މިއަހަރުގެ ފަހު ދައުރުގެ ޖަލްސާތައް ފަށުމުގެ ގޮތުން މިއަދު އޮތް ފުރަތަމަ ޖަލްސާގައި ވާހަކަ ދައްކަވަމުން އިލްޔާސްވަނީ ރާއްޖޭގައި ދީނީ ހަރުކަށި ވިސްނުން ފުޅާވަމުންދާ މިންވަރަށް ބަލައި ކަންބޮޑުވުން ފާޅު ކުރައްވާފައެވެ. އިލްޔާސް ވިދާޅުވީ ރައީސް ނަޝީދަށް ދިން ހަމަލާއަށްފަހު ތަހުގީގު ކުރިއަށްދާ ގޮތް ލަސްވުމާއި، ރައީސް ނަޝީދާއި، އެމަނިކުފާނުގެ އާއިލާއަށް އޮތް ބިރުވެރިކަމަކީ މިއަދުވެސް ފެންނަން އޮތް ކަމެއްކަމަށެވެ.
އަދި މިބިރުވެރިކަމުގެ ތެރެއިން މިއަދު ނުރައްކާ މަޖިލީހުގެ ނާއިބް ރައީސް އީވާ އަބްދުﷲ އާއި، މަޖިލީހުގެ އެހެން ބައެއް ބައެއް މެމްބަރުންނަށްވެސް ކުރިމަތި ވެފައިވާކަމަށް އިލްޔާސް ވިދާޅުވިއެވެ. އެގޮތުން ހަމަލާ ދޭން އުޅޭ މީހުން މެމްބަރުންނަށް ފާރަލައި އުޅޭ ނޫޅޭ ގޮތް ބަލައި، ހަދަމުންދާކަމީ ނުހަނު ކަންބޮޑުވާ ކަމެއްކަމަށް އިލްޔާސް ވިދާޅުވިއެވެ.
މިހާރުވެސް އަޅުގަނޑުމެންނަށް ފެނިގެންދާ ކަމަކީ މަޖިލިސްގެ ނާއިބް ރައީސް އަދި އިއްޒަތްރެރި އެތައް މެމްބަރުން ތަކަކަށް އެތައް ނުރައްކަލެއް އެބަހުރި. އެމީހުންނަށް ފާރަލައި، އެބޭފުޅުން އުޅުއްވާ ތަންތަން ބަލައި ހަމަލާއެއްދޭން އުޅޭކަމަށް ތުހުމަތުކުރެވޭ.
– އިލްޔާސް ވިދާޅުވިއެވެ.
އޭނާ ވިދާޅުވީ ދީނީ ގޮތުން ހަރުކަށި ވިސްނުމައި ފިކުރުތަކުގެ މީހުން ހިފައި ހައްޔަރުކޮށްގެން ނޫނީ އެއްވެސް މީހަކަށް އިންސާފެއް ނުލިބޭނެ ކަމަށެވެ. ރައީސް ނަޝީދު އަމިއްލަ ފުޅަށް އެމަނިކުނަށް އޮތް ނުރައްކާ މިއަދު ހާމަ ކުރިކަމީ ރާއްޖޭގެ އެއްވެސް ރައްޔިތަކަށް އެކަމުން ރައްކާތެރި ކަމެއް ނެތްކަން ހާމަވާ ކަމެއްކަށް އިލްޔާސް ވިދާޅުވިއެވެ. ރައީސް ނަޝީދަކީ ފުރިހަމަ ރައްކާތެރިކަމާއި ސެކިއުރިޓީ ދޭންޖެހޭ މީހަކަށްވާއިރު، އެކަން ކަށަވަރު ކުރެވޭނެ މިންވަރާއިމެދުވެސް އިލްޔާސް ވަނީ ސުވާލު އުފައްދަވާފައެވެ.
އިލްޔާސް ވަނީ ރައީސް ނަޝީދު ވީހަސްވެސް އަވަހަކަށް ރާއްޖެއަށް ވަޑައިގެން އަލުން ޚިދުމަތަށް ނިކުންނަވަން ބޭނުންވާ އެތައް ބަޔަކު އެބަތިބި ކަމަށާއި، އެކަން ކުރެވޭނީ އެޖާގަ ލިބިގެންކަމަށެވެ. ނުރައްކަލުގެ ހާލަތުގައި ގައުމު އޮއްވައި އެފުރުސަތު ތަނަވަސް ނުވާނެކަމަށާއި، ފުލުހުން ރައީސް ނަޝީދުގެ ތަހުގީގް ވީހާވެސް ބާރަށް ކުރިއަށް ގެންގޮސް ހަރުކަށި ފިކުރުގެ މީހުން ހައްޔަރުކޮށް އަނދިރި ދައުލަތް އެކީ ހުއްޓުވަން ޖެހޭކަމަށް އޭނާ ވިދާޅުވިއެެވެ.
