ނައިފަރުގެ 3 މަޝްރޫޢަކާ ގުޅޭގޮތުން 3 ވަޒީރަކާ ސުވާލުކުރުމަށް އެދާއިރާގެ މެމްބަރު އަހުމަދު ޝިޔާމް ހުށަހަޅުއްވައިފިއެވެ.
ޝިޔާމް މިއަދު ހުށަހަޅުއްވާފައި ވަނީ ނައިފަރު އައިސްޕްލާންޓްގެ މަސައްކަތާއި ގުޅޭގޮތުން ސުވާލުކުރެއްވުމަށް ފިޝަރީޒް މިނިސްޓަރ ޑރ. ހުސައިން ރަޝީދު ހަސަން މަޖިލީހަށް ހާޒިރުކޮށްދިނުމަށާއި، ނައިފަރުގެ ފަނާއި ނަރުދަމާގެ މަސައްކަތާއި މަގުހެދުމުގެ މަސައްކަތާގުޅޭގޮތުން ސުވާލުކުރެއްވުމަށް ހައުސިން މިނިސްޓަރ މުޙައްމަދު އަސްލަމް ހާޒިރުކޮށްދިނުމަށާއި، ނައިފަރު ޒުވާނުންގެ މަރުކަޒުގެ މަސައްކަތާއި ގުޅޭގޮތުން ސުވާލުކުރެއްވުމަށް ޔޫތު މިނިސްޓަރ އަޙްމަދު މަހްލޫފު މަޖިލީހަށް ހާޒިރުކޮށްދިނުމަށެވެ.
މީގެތެރެއިން މިނިސްޓަރ މަހްލޫފު އަދިވެސް ހުންނެވީ އެބޭފުޅާގެ މަސައްކަތްތަކުން ސަސްޕެންޑްކޮށްފައެވެ.
ޝިޔާމް ވިދާޅުވީ ނައިފަރު އައިސްޕްލާންޓާއި ޔޫތު ސެންޓަރުގެ ވައުދަކީ ރައީސް އިބްރާހީމް މުޙައްމަދު ޞާލިހްގެ ރިޔާސީ ވައުދު ފުޅެއް ކަމަށާއި ދައުރު މިހާތަނަށް ދިޔައިރުވެސް އެއްވެސް ސިފައެއްގައި މި 2 ތަނުގެ މަސައްކަތް ކުރިއަށް ނުދާކަމަށެވެ.
މީގެ އިތުރުން ނައިފަރުގެ ފަނާއި ނަރުދަމާގެ މަސައްކަތަކީ 85 އިންސައްތަ މަސައްކަތް ނިމިފައި ވަނިކޮށް އެމަސައްކަތް ކުރި ކުންފުންޏާއެކު ވެފައިވާ އެއްބަސްވުން އުވާލާފައި ވާ މަސައްކަތެއް ކަމަށެވެ. މީގެއިތުރުން ސަރުކާރުން ފަހުން މިމަސައްކަތް އެމްޑަބްލިއުއެސްސީ އާއި ހަވާލުކޮށްފައި ވީނަމަވެސް މަސައްކަތް ލަސްވުމުން، މިއަހަރަށް ބަޖެޓްކޮށްފައި އޮތް މަގުހެދުމުގެ މަސައްކަތްވެސް ލަސްވެފައި ވާކަމަށެވެ.
މަޖިލީސް ޗުއްޓީގައި އޮތުމަށްފަހު މާދަމާ މަޖިލީހުގެ ޖަލްސާތަށް އަލުން ފަށާނެއެވެ.
